Zakariya 5:1-11
5 Ndakamusazve majiso ndovona muphukutu waimburuka.
2 Ngirozi yakandivhunjisa kudari: “Uri kuvonenyi?”
Ndakaidavira kuti: “Ndiri kuvona muphukutu wecimburuka. Iwona uno makumaviri o makovhadho* o urebu no gumi ro makovhadho o upambhi.”
3 Ngo kudaro, iyona yakandivhunja kudari: “Uku ndikona kutukwa kuri kwenda pasi pese. Ngokuti mundhu wese ari kuba aaripi kupanicwa, pikija zvakatahwa ku divi rimweni ro muphukutu uwu kuti anofanera kupanicwa. Mundhu wese ari kupika zvo kunyepa aaripi kupanicwa, pikija zvakatahwa ku divi rimweni ro muphukutu uwu kuti anofanera kupanicwa.
4 ‘Ndakatuma kutukwa uku,’ izvi ndizvona zvinonanga Jehovha wo hondo, ‘ikona kunozonghwina mu nyumba mo mbavha no mu nyumba ma wiya anopika zvokunyepa ngo zina rangu; kuzopeja nyumba yake, matabwa ake no mapuwe ake.’”
5 Tevere, ngirozi yaibhuyaya na inini yakandikhwederera yondivhunja kudari: “Ndapota, musai majiso ako uvone ciro ico ciri kubudaro.”
6 Inini ndakaivhunjisa kudari: “Cicinyi ico?”
Iyona yakandidavira kudari: “Uwo mujiyo wo efa* uri kubuda.” Yakaenderera mberi yeciti: “Aya ndiwona mavonekero o vandhu vakashata vo nyika yese.”
7 Ngo kudaro, ndakavona cidumaijo co rodhondo co mutovhe cakaduhumuhwa, mukatimo mainga muno mwanakaji wakagara.
8 Iyona yakati: “Mwanakaji uu anodanijwa kuti Ushati.” Iyona yakamuhwirija mumujiyo mo efa, tevere yakamufungira ngo hasha ngo cidumaijo co mutovhe cinorema.
9 Tevere, ndakamusa majiso ndovona vanakaji vaviri veciviya, vecimburuka maningi mu mbhepo. Ivona vainga vano mapapiro* inga mapapiro o thupu. Vakamusa mujiyo wiya voenda pakati no pakati po denga no nyika.
10 Inini ndakavhunjisa ngirozi yaibhuyaya na inini kudari: “Vari kwenda kwapi no mujiyo wo efa?”
11 Iyona yakadavira kudari: “Ku nyika yo Shinari,* kwavanozovakira nyumba mwanakaji uwu. Nyumba ikapera, mwanakaji uwu anozodihwa kondhoyo pa ndau yake yaanofanera.”
Masoko o Pasi
^ Kovhadho imwe inoezana no 44,5 yo masentimetro. Vonanyi Masoko Okuengejera B14.
^ Gama ngo Gama: “efa” iri kunangwari apa imujiyo kana kuti sestu yaishandiswa pa kupima efa. Iyona yainga no 22 ritru. Vonanyi Masoko Okuengejera B14.
^ Kana: “mapapa.”
^ Zvinoreva: “Bhabhironi.”
