Zakariya 6:1-15
6 Ngo kudaro, ndakamusazve majiso angu ndovona ngoro* murongomuna jo hondo jaivha pakati po matundhu maviri. Matundhuwo ainga o utare.
2 Ngoro* yokutanga yaikweviwa ngo haci jo kupsuka, ngoro yocipiri yaikweviwa ngo haci jo kusvipa.
3 Ngoro* yocitatu yaikweviwa ngo haci jokucena, ngoro yocirongomuna yaikweviwa ngo haci jino mavara no jino makhamba-makhamba.
4 Ndakavhunjisa ngirozi yainga yecibhuya na inini kudari: “Mambo wangu, izvi zvinorevenyi?”
5 Ngirozi yakandidavira kudari: “Iji imujimu murongomuna jo kumatenga jiri kubuda pasure po kuva pamberi pa Mambo wo nyika yese.
6 Ngoro ino haci jo kusvipa iri kwenda ku nyika yo kanjikazi, ino haci jokucena iri kwenda kumbhiri ko jombe; ino haci jino mavara iri kwenda ku nyika yo kakusi.
7 Jino makhamba-makhamba jainga jecida kwenda kootenderera nyika yese.” Ngo kudaro, iyena wakati: “Endanyi, tendereranyi nyika yese.” Ijona jakatanga kufamba pa nyika yese.
8 Ngo kudaro, iyena wakandidaninja wondivhunja kudari: “Vonai, haci jiri kwenda ku nyika yo kanjikazi, jaiita kuti mujimu wa Jehovha uzorore mu nyika yo kanjikazi.”
9 Jehovha wakandivhunjazve kudari:
10 “Torai zviro zvina Eridhai, Tobhija na Jedhaya zvavakavhaya nazvo ku vandhu vakasungwa. Pa njiku yondhoyo, munodikana kwenda ku nyumba ya Josiya mwana wa Sofoniya pamwepo na vaya vakavha ku Bhabhironi.
11 Iwewe unodikana kutora sirivha no goridhi uite korowa huru woisimija mu musoro mo mupiri mukuru Joshuwa mwana wa Jehozadhaki.
12 Muvhunjei kudari:“Jehovha wo hondo anoti: “Mwanarume uu zina rake ndi Thobwe, iyena anozotumbuka pa ndau yake kamare, ozovaka themberi ya Jehovha.
13 Ndiyena anozovaka themberi ya Jehovha, ozokujwa. Iyena anozogara pa cigaro cake ozotonga. Anozovazve mupiri pa cigaro cake, pozova no citenderano co runyararo pakati pavo vovaviri.*
14 Korowa huru iyi, inozova mu themberi ya Jehovha kuitira kurangarira Eremi, Tobhija, Jedhaya na Eni mwana wa Sofoniya.
15 Vaya vari ndhambo vanozoviya vovakavo themberi ya Jehovha.” Imwimwi munozoziva kuti Jehovha wo hondo ndiyena wandituma kwamuri. Izvi zvinozoitika kudari imwimwi mukazwira izwi ra Jehovha Mwari wenyu.’”
Masoko o Pasi
^ Kana: “kareta.”
^ Kana: “Kareta.”
^ Kana: “Kareta.”
^ Zvinoreva: “umambo hwake no upiri hwake.”
