Zakariya 7:1-14
7 Mu gore ro cirongomuna ra mambo Dhariyo, mu njiku yo cirongomuna yo mweji wo cipfumbamwe, zvinoreva mweji wa Kishirevhi.* Jehovha wakavhunja Zakariya masoko aya:
2 Vandhu vo ku Bheteri, vakatuma Sharezeri na Regemu-mereki pamwepo no vanarume vake, kuti vadeketere kuitihwa unyasha ndi Jehovha,
3 vecivhunja vapiri vo themberi ya Jehovha wo hondo pamwepo no vaporofeti kudari: “Ndinodikana kucema* pa mweji wo cishanu no kuzira inga zvandinoanja kuita ko makore akawanda here?”
4 Jehovha wo hondo wakandivhunjazve kudari:
5 “Vhunjai vandhu vese vo nyika iyi no vapiri kudari: “Pamaizira no kucumba mu mweji wo cishanu no wocinomwe ko makumanomwe o makore, maizviitira inini here?
6 Pamaiha no kumwa, amucaizviitirepi imwimwi kuti mugute?
7 Amucaidikanepi kuzwira masoko a Jehovha aakazivisa ecishandisa vaporofeti vo kare, pa mukuvo wokuti Jerusarema no madhorobha akaritendeneja ainga acagahwa no runyararo, pa nguva yokuti mu Negebhi no mu Shefera mainga mucagahwa here?’”
8 Jehovha wakavhunjazve Zakariya kudari:
9 “Jehovha wo hondo anonanga kudari: ‘Tonganyi ngo ururami, tajanyi vamweni ngo rudo ucikacinji no usizi.
10 Mucabira noni no ndherera,* munyikanja no murombo. Mucaronga kuitirana zvakashata.’
11 Asi ivona vakaramba kuzwa. Ngo kuzvikuja, vakandifuratira vofunga njeve javo kuti vatame kuzwa.
12 Vakaita kuti mwoyo yavo iite inga yo buwe rakavanga maningi. Avazivi kuzwira mutemo no masoko a Jehovha wo hondo akaviiswa ngo mujimu wake ecishandisa vaporofeti vokare. Ngo kudaro, Jehovha wo hondo wakacamwa maningi.”
13 “‘Zvecivoneka kuti ivona avazivi kundizwa pandaivadaninja, inini adizivi kuvazwavo pavaindidaninja, izvi ndizvona zvinonanga Jehovha wo hondo.
14 Ndecishandisa dutu, ndakavandhandhanisa ku majinja avainga vacikazivi. Nyika yavakasiya yakaita mathere, apana wakapinda ndikona nee wakahwirireyo. Ngokuti ivona vakaita kuti nyika yakanaka ive ciro cinothyisa.’”
Masoko o Pasi
^ Vonanyi Masoko Okuengejera B15.
^ Kana: “kurira.”
^ Mundhu wakafihwa ndi baba kana mai.
