Zakariya 8:1-23
8 Ndakaashirazve soko ra Jehovha wo hondo reciti:
2 “Izvi ndizvona zvinonanga Jehovha wo hondo: ‘Ndinozongwarira Ziyoni, hina, ndinozoringwarira ngo mwoyo wangu wese.’”
3 “Jehovha anonanga kudari: ‘Ndinozohwirira ku Ziyoni ndozogara mu Jerusarema. Jerusarema rinozodaninjwa dhorobha rakagondeka.* Dundhu ra Jehovha wo hondo rinozodaninjwa kuti dundhu rakacena.’”
4 “Jehovha wo hondo anonanga kudari: ‘Harahwa jorume no jokaji jinozohwirira jogarazve mu mabazari o Jerusarema. Imwe nga imwe inozova no ndonga yayo munyara ngo ndava yo ukarahwa.
5 Mu mabazari o dhorobha munozozara ngo varimbhwane no vasikane vanonga vecitamba.’”
6 “Jehovha wo hondo anonanga kudari: ‘Pikija hazvo njiku iji jakava inga jinonesa ku vandhu vakasara, kunanga kuti jingavavo inga jinonesa kwandiri?’ Izvi ndizvona zvinonanga Jehovha wo hondo.”
7 “Jehovha wo hondo anonanga kudari: ‘Ndiri kuponesa vandhu vangu, ndecivavhisa munyika jo kumavhazuva no kumavirirra.
8 Inini ndinozovahwirija vozogara mu Jerusarema. Ivona vanozova vandhu vangu, inini ndozova Mwari wavo mu ugondeki no ururami.”
9 “Jehovha wo hondo anonanga kudari: ‘Vangisanyi nyara jenyu,* imwimwi muri kuzwari masoko aya ecibhuiwa ngo vaporofeti. Masoko ondhowo, akanangwa pa mukuvo wakadihwa maambo pa nyumba ya Jehovha wo hondo kuti themberi ivakwe.
10 Nguva iyi icito yaguma, vandhu pamwepo no zvinyama avacaipagahwi pa basa ravaiita. Ngo ndava yo muvengi, akucainga no rugarisiko kuti vandhu vafambe, ngokuti inini ndakaita kuti vandhu vamukirane.’
11 “‘Asi wari, andizotaji vandhu vese vakasarari inga zvandakamboita kare,’ izvi ndizvona zvinonanga Jehovha wo hondo.
12 ‘Ngokuti kunozosimwa mbeu yo runyararo, muuvha unozobara mucero. Nyika inozoivhisa, matenga anozoviisa cando. Inini ndinozoita kuti zviro zvese izvi, zvive ndhaka yo vandhu vakasara.
13 Imwimwi vo nyumba ya Judha no yo Iziraeri makava vandhu vanotukwa pakati po majinja, asi inini ndinozomuponesa. Imwimwi munozova makomborero. Mucathya! Vangisanyi nyara jenyu.’*
14 “Jehovha wo hondo anonanga kudari: ‘“Kudari inga zvandakasunga kumuviisira dambujiko ngo ndava yo majicekuru enyu akandinyangajisa,” izvi ndizvona zvinonanga Jehovha wo hondo, “ndotama kucinja murangariro wangu,
15 wari ndasunga kuitira zvakanaka Jerusarema no nyumba ya Judha. Mucathya!”’
16 “‘Imwimwi munodikana kuita zviro izvi: Bhuyanyi cokwadi ku umwe no umweni. Matongero amunoita pa musuvo jenyu, ngaave ocokwadi oita kuti pave no runyararo.
17 Mucaitirana zvakashata nee amudikani kuda mbhiko jokunyepa ngokuti inini ndinozonda zviro zvese izvi,’ izvi ndizvona zvinonanga Jehovha.”
18 Soko ra Jehovha wo hondo rakandigumirazve reciti:
19 “Jehovha wo hondo anonanga kudari: ‘Kuzira ko mweji wo cirongomuna, kuzira ko mweji wo cishanu, kuzira ko mweji wo cinomwe no kuzira ko mweji wo cigumi, unozova mukuvo wo kudakara no kutamba wo nyumba ya Judha, ari mabuso anodakajisa. Ngo kudaro, idanyi cokwadi no runyararo.’
20 “Jehovha wo hondo anonanga kudari: ‘Inozoguma njiku yokuti vandhu no vagari vo madhorobha mazinji vanozoviya.
21 Vagari vo dhorobha rimwe vanozoenda ku vagari vo dhorobha rimweni vonanga kudari: “Ngatende, ngatende koodeketerera unyasha hwa Jehovha no kupsaka Jehovha wo hondo. Itusu tinozoendavo.”
22 Vandhu vazinji no majinja ano simba vanozoviya koopsaka Jehovha wo hondo mu Jerusarema, kuti vadeketerere Jehovha kuti avaitire unyasha.’
23 “Jehovha wo hondo anonanga kudari: ‘Mu njikujo gumi ro vanarume vo ndumi jese jo majinja vanozobata, hina vanozobata, kubatisisa kamare nguvo* yo Mujudha* veciti: “Tinoda kwenda na imwimwi, ngokuti tazvizwa kuti Mwari anemwi.”’”
Masoko o Pasi
^ Gama ngo Gama: “ro cokwadi.”
^ Kana: “Cunganyi.”
^ Kana: “Cunganyi.”
^ Kana: “kumbhiri ko nguvo.”
^ Gama ngo Gama: “mwanarume wo Mujudha.”
