Jakobe waizviziva kuti Jehovha ndiyena basi waidikanwa kunamatwa, pikija wainga acikazivi kumboashira mupango wainanga izvo. (Ex 20:3-5) Ngokudaro, Jehovha paakavhunja Jakobe kuti ahwirire ku Bheteri, Jakobe wakavhunja vese vaainga navo kuti varase zvimwari zvavainga nazvo. Jakobe wakacira zvimwari zvese kubatanijavo no mbhete javo jese. (Gn 35:1-4) Zvokadi kamare, Jehovha wakadakara maningi ngo zvakaithwa ndi Jakobe.

Nyamasi uno, tingaitenyi kuti tinamate Jehovha basi? Cokutanga, tinodikana kuva ndhambo no zviro zvinobatanija zvimwari zvokunyepa kana zvo madhimoni. Izvi zvinobatanija kurasa zvese zvakabatana no zvo madhimoni. Zvinosisira maningi kurangarira mutambo jatinosana kuvona. Inga muezaniso, zvivhunjisenyi kudari: ‘Inini ndinodakarira kuvona kana kuverenga ngo pamusoro po vandhu vanopsipsina ngazi yo vamweni kana vandhu vanoha vamweni here? Ndinovona mabungaijo anokhombija zviro zvo masaramuso no uroi inga akanaka here?’ Tinodikana kugara ndhambo no zviro zvese zvaanonyenya Jehovha.—Ndu 97:10.

VONANYI VHIDHIYO INOTI ‘VANGANYI KURHWA NA DHIABHU,’ PERAPO DAVIRANYI MUVHUNJO JINOTEVERA:

• Ngozvapi zvainga zveciitika no mujiji wo Bhaibheri anozwi Pariza?

• Ngenyi tinodikana kupsaka besero ro vakuru kudari ariwese akava no zvineso zvo madhimoni?

• Kudari tecida besero ra Jehovha, zviro zvapi zvatinodikana kurasa?

• Pariza wakasunga kuitenyi?

• Mungaitenyi kuti mutame kukwevejehwa ngo madhimoni?