NGENYI ZVINOSISIRA: Vokuzojwa no mavhuta amweni vari kukoka vandhu vese kuti vazomwe “kumwa yo uhomi.” (Ap 22:17) Kumwa iyi yokuezanisira inoimirira nasiriro yese ya Jehovha kuitira kusujunura vandhu vake mu ushaishi no rufu. Kuti tibesere vandhu vano zvirovejeso no zvitendhwa zvakasiyana-siyana, tinodikana kucumaera ‘masoko akanaka acingaperi’ mu njira ingadakarihwa ndi umwe nga umwe.—Ap 14:6.

MAITIHWE AZVO:

• Sananyi shwiro no vhesi inozobaya mwoyo jo vandhu vo mundima mwenyumo. Kangaije mungasana kubhuisana ko kuezanisira kana shwiro imweni yamakashandisa perapo mobudirira. Ngoyapi shwiro kana tsamba inonasa kudakarihwa? Pano ciitiko cakaitika sambi-sambi ciri kubhuiwa ngo vandhu vazinji here? Ngozvapi zvaizodakarihwa ngo vanarume kana vanakaji?

• Pa mabhuyo enyu, shandisanyi macungamijiro no zvirovejeso zvinoanja kuithwa mundima mwenyumo.—2 Kor 6:3, 4

• Nasanyi kuziva mabhuku no mavhidhiyo ari Mubhokiso redu Rokujijisa kuti muzokhombije ariwese anokhombija kudakarira

• Bhasharinyi mabhuku no mavhidhiyo o mu ndumi jo vandhu vamunosongana navo mu ndima mwenyumo

• Zwiranisanyi shwiro yenyu kuti izwirane no zvinodiwa ndi samuzi. (1 Kor 9:19-23) Inga muezaniso, ngozvapi zvamungananga kudari mukaziva kuti samuzi wavha kufihwa ngo ariwese?

VONANYI VHIDHIYO PERAPO DAVIRANYI MUVHUNJO JINOTEVERA:

• Mucumaeri watanga ngo kubhuisana ngo shwiro yapi na samuzi?

• Zvicinyi zvainga zvaitika mu upenyu hwa samuzi?

• Ngoyapi tsamba yava yaushoni pa mugariro wondhowo, zve ngenyi?

• Mungacinjisa kudini macumaerere enyu kuti mubaye mwoyo yo vandhu vo mundima mwenyumo?