Nasiriro yo kujinga inojivirira ungano zve inopangira vaya vanoshaisha vacikakhauyi. (1 Kor 5:6, 11) Kudari tikabesera mbhangiro ja Jehovha, tinonga tecikhombija rudo. Kuitisa kudini kuti mbhangiro yo kujinga inokhombija rudo zvecivoneka kuti inosuruvarisa vese, kubatanija ukama na vaya vanotongaro shwiroyo?

Panyezuru po zvese, kudari tikabesera nasiriro yo kujinga, tinonga ticikhombija kuti tinoda Jehovha no ndhungamiriro jake jakacena. (1 Ped 1:14-16) Tinokhombijazve rudo kuno mundhu wajingwaro. Pikija nokuti mbhangiro inosuruvarisa iyona inoviisa “micero yo kunyarara no urungami.” (Heb 12:5, 6, 11) Kudari tikashamwarijana no vandhu vakajingwa kana vakazvijinga vega, tinonga tecinghwinira matongere a Jehovha. Ceujanyi kuti Jehovha anopangira vandhu vake ‘inga bzo vanofanera.’ (Jr 30:11) Ngo kudaro, ngatienderere mberi tecikura mu zvoumwari no kubesera matongero a Jehovha, ticikaruzi vetero yokuti mundhuwo anozohwirirazve kuna Baba vedu vano unyasha.—Is 1:16-18; 55:7.

VONANYI VHIDHIYO INOTI IVANYI WAKAGONDEKA NGO MWOYO WESE, PERAPO DAVIRANYI MUVHUNJO JINOTEVERA:

• Mazwiro api angava no vabari kudari mwana wavo akasiya kushandira Jehovha?

• Ungano ingabeseresa kudini mbhuri ino mundhu wakajingwa?

• Ciitiko capi co mu Bhaibheri cinokhombija kuti kugondeka kuna Jehovha kunosisira maningi kupinda kugondeka pa mbhuri?

• Tingakhombija kudini kuti kugondeka kwedu kuna Jehovha kunosisira kupinda mbhuri yedu?