Ngenyi tinodakarira maningi magungano edu makore ese? Inga mabuso aiithwa ngo Vaiziraeri, magungano edu nyamasi uno, anotipa mukana wo kunamata Jehovha pamwepo no mazana pikija no zviuru zvo vatendi doni vedu. Tinodakarira maningi zvatinojija ngo kuti zvinotibesera kuti tikhwedere phedo na Jehovha. Tinodakarazve maningi ngo mukuvo watinopeja no shamwari jedu pamwepo no ukama. Kudakarira uku kunotiita kuti tipeje njiku jese ndhatu tecienda kugungano.

Kudari tikawana mukana wokuva takabatana, atidikani kurangarira zvingatibesera basi asi tinodikana kurangarira ngo manera atingakhombijiravo rudo kuno vamweni. (Gal 6:10; Heb 10:24, 25) Kudari tikaita zviro zvakadari inga kubatirira musuvo kuti ariwese anghwine kana kubatira basi ndau yatinoda kugara, tinonga tecikhombija kuti tiri kupsaka zvinodakajisa vamweni. (Fil 2:3, 4) Magungano anotipa mukana unodakajisa maningi wokuwana shamwari imbza. Urongwa ucito watanga, paunopera no pamukuvo wokuenda kocenga-cenga, ndiwona mukuvo watingapsaka kubhuya no vandhu vaticikazivi. (2 Kor 6:13) Shamwari ijo jinozova shamwari jedu kwenda no kwenda! Kusiyapo izvo, kudari vandhu vacikashandiri Jehovha vakativona tecikhombijirana rudo, ivona vanozodavo kujijira zvizinji ngo pamusoro pa Jehovha.—Jo 13:35.

VONANYI VHIDHIYO INOTI “RUDO AHUPERI”! MAGUNGANO O NYIKA JESE, PERAPO DAVIRANYI MUVHUNJO JINOTEVERA:

• Pa magungano o 2019 o nyika jese, hama jakavha nyika jimweni jakakhombijiswa kudini rudo?

• Ngenyi rudo no kubatana ko vandhu va Jehovha kunoshamaisa?

• Ngo japi mugariro jo rudo wo Cikristu jakagogomejehwa ngo hama jo Mukhumbi Unotonga?

• Rudo hwo Cikristu wakabatanijisa kudini hama jo Aremanya no Koreya dhu Suri?

• Tinodikana kusunga kuitenyi?