Zviro zvinovoneka zvinoita kuti mujiji apurutane zve zvinomubesera kuti azwisise no kueujira zvaakajija. Mujijisi wedu Mukuru Jehovha, anoshandisa zvinovoneka kuitira kutijijisa zvijijo zvinosisira. (Gn 15:5; Jr 18:1-6) Ndizvonavo zvakaitwa ngo Mujijisi Mukuru, Jesu. (Mt 18:2-6; 22:19-21) Zvimweni zvatinovona zviri kubudirira mu makore ano, kushandiswa ko mavhidhio. Muri kushandisa zvakanaka mavhidhio pamunojijisa mujiji wenyu wo Bhaibheri here?

Gumi ro mavhidhio akanasirihwa kuitira kutibesera kujijisa zvijijo zvo bhurushura Masoko Akanaka Anobva Kuna Mwari! Kunasa kunanga, musoro umwe nga umwe wo vhidhio unozwirana no mubvunjo jakasvipa jinowanika mukati mo bhurushura. Mabhurushura anoshandisihwa mu foni anobatanija ma link anotieujira vhidhio imwe na imwe painodikana kukhombijwa. Mukuengejera, mavhidhio amweni akasiyana-siyana anozajisa zviri mu Bhokiso redu Rokujijisa.

Muri kubhuisana ngo cijijo co Bhaibheri kangaije ciri kunesa mujiji wenyu kuti azwisise? Kana mujiji wenyu ari kusongana no cineso? Psakisisanyi mu mavhidhio o jw.org® no JW Broadcasting® kuti muwane imwe yaizomubesera. Kangaije imwimwi no mujiji wenyu mungamavona mwese zve mobhuisana.

Mweji umwe nga umwe, mavhidhio mapsa anobudiswa. Pakumavona, rangariranyi manera amungashandisa kuti mujijise vamweni.