Ngozi jinoitika jega jiri kunyanya kuitika maningi nyamasi uno. Ngozi painoitika, vandhu vanobesera no vanotungamirira basa iri vanodikana kunasa kurongwa. Pakukwanirisa izvi, Mukhumbi Unotonga wakaumba Bauhwa Rinobesera Vawihwa ngo Ngozi mu mabheteri ese.

Hama jinoshanda pa bauhwa iri kudari jikaziva kuti kuripo kwaitika ngozi, ngokukasika jinobhuya no vakuru vomundharaundhemo kuti jizive besero rinodiwa ngo hama no hambzaji. Kudari ngozi yaitikaro yakakura maningi zvokuti vacumaeri avakwanisi kubesana ngocavo, bheteri rinogaja hama jinokwanirisa kuti jitungamirire pa basa iri rokubesera vawihwa ngo ngozi. Hama iji jingakumbira vangajipira kana mupiro jo zviro zvimweni zvinodiwa no kutotenga zviro zvimweni no kuzvikovanisa.

Pano muviyo jaushoni jinowanika ngo kuita zviro ngo njira iyi. Izvi zvinoita kuti patame kuva no mabasa akawanda pacina dikano, kuvereketesana, kumosha mare yakawanda no materiyari. Zvese izvi zvaizoitika kudari hama jikaita zvajicikazivi kuvhunjwa.

Hama jakagajwa ngo bheteri jinozovona mutengo wo mare unodiwa no mutengo wo hama jinodiwavo kuti jibesere pa basa iri rokubesera vawihwa ngo ngozi. Ivona vanganasa kuzivana no vatungamiriri vo mundharaundhemo avo vokuti kazinji vanobesera kuti basa redu rifambe ushoni. Ngo kudaro, amudikani kuita muhengo-muhengo, kutumira zviro kuti mubesere kana kutoita hwendo kuenda kundau yawihwa ngo ngozi mucizivi kukumbihwa.

Pikija zvakadaro, panoitika ngozi itusu tinoda kubesera. (Vah 13:16) Itusu tinoda hama jedu. Waro tingaitisa kudini kuti tibesere? Zvinosisira maningi kuita mukumbiro kuitira vawihwa ngo ngozi na vaya vari kubesera. Tingatoitavo mupiro kuitira kubesera basa ro cine ro pasi pese. Ecitungamirihwa ngo Mukhumbi Unotonga mabheteri ndiwona anokwanisa kuvona kuti mare iyi ngo papi painganasa kushandiswa. Kudari tino cido cokubesera tingakhombija zvondhozvo ngo kutara petisau kuitira Voluntários locais de Desenho e Construnção (DC-50).

VONANYI VHIDHIYO INOTI: KUZARA KO KUMWA KWAKAITIKA KU BHARAZIRI, PERAPO DAVIRANYI MUVHUNJO UNOTEVERA:

Ngozvapi zvinomushamaisa pamunovona kuvangisira ko Zvapupu zva Jehovha pasure pokuitika kuzara ko kumwa ku Bharaziri mu gore ra 2020?