Jesu wakati: “Makaaxira biresi, ipanyi vo biresi.” (Mt 10:8) Tinobatisisa ndhungamiro iyi yakajeka ngo kutama kutengesera vandhu makhopi o maBhaibheri kana mabhuku akacinjikira mu Bhaibheri. (2 Kor 2:17) Kunja kwa izvi, mabhuku aya ano cokwadi cinosisira maningi cinobva mu Soko ra Mwari. Simba guru no mare inopera ngo kuita basa iri, kubatanija mabhuku anodhindhwa no kutumihwa ku ungano jese jo pa nyika. Ngokudaro, tinodikana kutora basi aya atinoda.

Shandisanyi ungwaru pamunoga mecipa mabhuku ku vamweni, pikija mecipa ucapupu hwo pambhene. (Mt 7:6) Kunja ko kupa basi mabhuku ku vaya vanodakaria, itanyi simba kuti mubhuye navo kuti muvone kudakarira kwavo. Mungakwanisa kudavira kuti hina pa mubvunjo jiri pa bhokiso rinotevera? Kudari mecikwanisa kuvona kudakarira kwake, zviri nane kumupekeja tarathadho. Zvokdi kamare, kudari iyena wakakumbira revhista kana bhuku rimweni, ngo mudakaro wese mupekejenyi khopi imwe.—Mazwi 3:27, 28.