Sambiri pano kusengerera ka Jehovha no nyika iyi, kunozopera. Zviara zvokunyepa zvinozoparajwa, mubatanijwa wo majinja unozohwisa vandhu va Mwari zve Jehovha anozoparaja vandhu vakashata pa Armagedhoni. Makristu ari kuvetera kuvona zviitiko izvi zvinodakajisa.

Icokwadi kuti, atizivi zvese zvinobatanijwepo ngo pamusoro po dambujiko guru. Inga muezaniso, atinasi kuziva njiku yo rinozotanga. Atizivizve mathangwe anozoitisa kuti vatungamiriri vo nyika vaparaje zviara. Atizvizivi kuti zvinozotora mukuvo wakadini, nee cicinyi cinozoita kuti kubatana ko majinja kuhwise vandhu va Mwari. Atizvizivizve kuti Jehovha anozoitisa kudini kuti aparaje vandhu vakashata pa Armagedhoni.

Asi Bhaibheri rinotipa masoko ese atinoda kuti tisote kumbeji ngo cicunge no kuthemba kwese. Inga muezaniso, tinozviziva kuti tiri kurarama kumbhiri ko “njiku jo kupejisira.” (2 Tim. 3:1) Itusu tinozviziva kuti mazuva okuparajwa ko zviara zvokunyepa “anozopunguhwa” kuti ciara cokadi citame kuparajwa. (Mat. 24:22) Tinozviziva kuti Jehovha anozoponesa vandhu vake. (2 Ped. 2:9) Itusu tinozviziva kuti wiya wakakheta Jehovha kuti apeje vakashata no kuponesa uzinji hukuru pa Armagedhoni wakarurama zve anosimba.—Apo. 19:11, 15, 16.

Ngo ndava yo zviitiko zvo kumbeji, “vandhu vanozopera simba ngo kuthya.” Asi kudivi redu azvizovi zvakadaro. Itusu tinozviziva kuti Jehovha wakaitenyi kuti aponese vashandiri vake kareko. Kuverenga zviitiko zvinobhuya ngo pamusoro paizvi no kurangarijisisa ngo pamusoro pazvo zvinotiita kuti ‘tiime no kumusa musoro,’ tecithemba kuti ruponeso hwedu huri kukhwedera.—Ruk. 21:26, 28.