Mucipiri, njiku 11 ya Nyahwiriri, maKristu mazinji acikacaiti basa anoviya ku Cirangarijo. Ivona vakatotangavo kugogoma kuitira upenyu asi ngo mathanghwe mazinji vakatanga kurembejeka, amwe akona anowanika mu bhurushura Hwiriranyi kuna Jehovha. (Heb 12:1) Asi, vacikacaiti basa vacindori kusisira kuna Jehovha, uwo wakavatenga ngo ngazi yo Mwana wake. (Mait 20:28; 1 Ped 1:18, 19) Tingavabeseresa kudini kuti vahwirire ku ungano?

Vakuru vo ungano vanopsaka kuwana no kubesera maKristu acikacaiti basa kudari inga muhavisi anopsaka ngo simba rese bvuta rabuda pa mushambi. (Lc 15:4-7) Izvi zvinokhombija rudo wo kungwarira wa Jehovha. (Jr 23:3, 4) Itusu tese, haiwa vakuru basi, tingakwanisa kuvangisavo vakadari. Kuvangisira kwedu pa kutatija kunaka mwoyo no mazwiro o ushamwari zvinokuja Jehovha zve tingava no mupocero wakanakisisa. (Mazwi 19:17; Mait 20:35) Ngo kudaro, rangariranyi ngo pamusoro po mundhu wamungavangisa, zve mozviita mucikanonoki!

VONANYI VHIDHIO INOTI VANGISANYI VAYA VACIKACAITI BASA, ZVE PERAPO VONANYI MUBVUNJO JINOTEVERA:

• Abbey wakaitenyi paakandosongana co Capupu caacaiziva cainga cicikacaiti basa?

• Ngenyi tinodikana kukhwederera vakuru kudari tikarangarira kubesera ari wese acikacaiti basa?

• Abbey wakanasirira kudini kuti aendezve koobvakacira Laura hocipiri?

• Abbey wakakhombijisa kudini kuvangirira, kusengerera zve rudo paakaeja kuvangisa Laura?

• Zvicinyi zvatingajija kubva pa muezaniso wa Jesu unowanika pana Luka 15:8-10?

• Makomborero api akavepo ngo kuvangisira kubesera Laura?