Cirangarijo cinotipa mukana waushoni kuti tirangarije ngo makomborero o kumbeji o kuti anokwanisika ngo muripo akadari enga kumuswa ko vakafa. Jehovha aazivi kumboronga kuti vandhu vafe. Cimwe co zviri kutihwaja maningi i kufihwa ngo mundhu wotinoda. (1 Kor 15:26) Jesu wakahwajihwa ngo kuvona vajiji vake vacirira ngo kufa ka Razaro. (Jo 11:33-35) Zvecivoneka kuti Jesu i citatijo cakaperera ca Baba wake, tingakwanisa kuva no cokwadi kuti Jehovha ari kuhwajihwavo ngo kutivona takasuruvara ngo kufihwa ngo vadiwa vedu. (Jo 14:7) Jehovha ari kuvetera ngo cidaka-daka cese mukuvo waanozoviisa vashandiri vake kubva mu kufa, na itisuvo tinodikanavo kuitavo kudaro.—Job 14:14, 15.

Zvecivoneka kuti Jehovha ndi Mwari wakarongeka, zvakareruka kutenda kuti kumuka ko vakafa kunozoitwa ngo njira yakarongeka. (1 Kor 14:33, 40) Kunja ko njaumba, kunozova no urongwa hwo kuashira vo kumuswa ko vakafa. Munorangarijisisa ngo kumuswa ko vakafa, maningi-ningi mu mukuvo wo kusuruvara here? (2 Kor 4:17, 18) Munobonga Jehovha ngo kunasirira muripo no kukhombija mu Matahwa kuti vakafa vanozoponazve here?—Kol 3:15.

• Ngoyapi yo shamwari jenyu no ukama hwomuri kuvetera kuzovonazve kumbejiyo?

• Ngowapi wo vanonangwa mu Bhaibheri womunoda maningi kuzowanana no kuzobhuya nae?