Hama no Hambzaji Jinodiwa:

Tikahwirira ku zana ro cimakumanomwe N.V.I.Y., muporofita Ezekieri wakapuwa civoniso cinoshamaisa. Wakavona karu yakakura, ngoro yo kudenga, yaivonerehwa ngo Mukuru-Kuru wo mudenga no pasi. Cainyanya kushamaisa maningi pa karu iyi i manera oyaifamba. Yaigogoma inga murazvu, nee payaicinja koyakasota—yaikwanisa kucinja icizivi kudereja magogomere ayo pikija payaihwirira sure!—Ezek. 1:4, 9, 12, 14, 16-27.

Civoniso ici cinoticeuja kuti divi ro kudenga ro sangano ra Jehovha mukuvo wese riri kufamba. Waro divi ro pasi keni? Gore ro basa rakapera rakanasa kuvonesa zvakajeka kuti Jehovha ari kufambisa vandhu vake vo pasi ngo mudanyu jinoshamaisa!

Muno mu Estadhos Unidhus, mbhuri yo Bheteri yaibatikana maningi pa kuthutha kubva Bhrukrini kuenda ku cine ro nyika yese, ku Warwick, Novha Yorki, ingavo kuenda mu nyumba jimweni no mu ndima jimweni. Mabheterita mazinji o macine amweni kutenderera nyika yese ari kubatikanavo ngo kuvaka, kuvakisazve, kunasa kuvangisa zvivako kana kuthutha kuenda mu ndau jimweni. Imwimwivo keni? Pikija mucizivi kubatikana pa kuthutha kamare, pacina kukakanija makabatikana ngo njira jimwenivo.

Mukhumbi Unotonga unobaiwa mwoyo kamare no kuvangiswa ngo kuvona vandhu va Mwari kutenderera nyika yese vakabatikana kupinda kare pavanonga veciteverera mudanyu jo sangano ra Jehovha. Vazinji vakathutha kuti vaende kooshandira kunodiwa maningi vacumaeri. Vamweni vakathutha kuti vacumaere ngo njira imbza, inga mu ndima inoverekethwa ndumi yo nyikanja. Vazinji vakaeja njira yo kucumaira yainga iri imbza zve yovacizivi kurovejana nayo. Vamwenivo vakaengejera basa ravo ngo njira jimwenivo. MaKristu ese akagondeka, kubatanija vaavasharuka no vanohwaja-hwaja, vari kugogoma mu muphikizano wo upenyu—voramba vacifamba mu basa ra Jehovha, ngo kudaro vobesera kupseruja Sathana ngo kunyepa kwake!—1 Kor. 9:24.

Ivanyi no gwinyiso ro kuti mujimu wamunotatija uri kuvoneka maningi ndi Jehovha. (Heb. 6:10) Kuzwira kwenyu ngo kuda kwese kunotirangarijisa Abhirahama na Sara. No 70 o makore Abhirahama wakathutha kubva Karidhea dhorobha ro Ur woenda no mbhuri yake ndhambo no Kanani, kwaaizorarama mumatende pa makore zana akazotevera o upenyu hwake. Mujimu wakadini ucikanangiki waakavonesa no mukaji wake!—Gn. 11:31; Mait. 7:2, 3.

Muri kuvonesavo mujimu uu here? Mwese muri kucungirira makagondeka pa mukuvo uno unonesa muri kuita zvakatibvunja Jesu kuti tiite. Iyena wakati: “Endanyi, jijisanyi vandhu  vese no kuvabapatiza mu zina ra Baba no ro Mwana no ro Mujimu Mucena”.—Mt. 28:19.

Pikija Jesu wakashandisa gama ro kuti “endanyi” zvinovonesa kuti tinodikana kufambira mberi, takavanga kamare. Zvinodakajisa maningi kuvona zvizinji zvakaithwa ngo vateveri va Kristu vari kuramba vacivangisira kubvira gore raperari! Zvakareruka kuvona kuti nyara yakavanga ya Jehovha yo makomborero yainga pa basa ro kutokotesa masoko akanaka o Umambo ku majinja ese.—Mc. 13:10.

Vazinji vari kudavira masoko akanaka. Mutengo wo vacumaeri gore raperari wakakwana 8.340.847, jijo jo Bhaibheri jakaitiswa jaikwana 10.115.264 mweji ngo mweji. Zvokadi kamare, ngoro yo kudenga iri kugogoma zve naimwimwivo! Rambanyi meciita basa rakanaka pa mukuvo mushoma wasarari Jehovha acito afunga musovo wo ruponeso.

Kufanera kwakadini ko tsamba yo gore ro 2017 inoti “Gondai [Jehovha] Mwari, itai bzakanaka”! (Ndu. 37:3) Pamunozwira magama aya, itanyi zvakanaka ngo kuitira Jehovha basa rakacena, muri kutatija kuti munomugonda. Tapota mukuvo wese ceujanyi kuti amuripi mwega. Magama a Jesu anozokwanirisika okuti: “Zivanyivo kuti ndinemwi njiku jese mbhera kupejisira ko nyika.”—Mt. 28:20.

Ivanyi no cokwadi co kuti Jehovha acaramba ecikomborera basa renyu rokugondeka. Mupiro wenyu ungava mudoko kana mukuru, zvinosisira kuna Jehovha ngo zvokuti muri kupa zvamunokwanisa zve ngo mwoyo wese. Zvipo zvese izvi zvinobaya mwoyo wake zve anozviashira ngo kudakara. (2 Kor. 9:6, 7) Waro rambanyi mecikhwedera phedo na Baba wenyu vo rudo ngo kuita mukumbiro mukuvo wese, kujija Soko ra Mwari, kuenda kumusongano jo ciKristu zve kuenda koocumaira no kuvangisira.

Mbhera ‘nguva doko’ ii yasara ya Dhiabhu ipere, mupandukiri uu mushati wakasunga kushandisa njira jese jaanokwanisa kuti atipause kuti tisie kuramba takagondeka kuna Jehovha. (Ap. 12:12) Rambanyi muri phedo na Jehovha, Dhiabhu anozomukonehwa. (Ndu. 16:8) Tapota zivanyi kuti tinomuda maningi zve tinobonga maningi besero renyu ro zvinodiwa zvo Umambo hwa Tenji mu mazuva ano okupejisira.

Hama jenyu,

Mukhumbi Unotonga wo Zvapupu zva Jehovha