Abhirahama wakabvunja Izaki kuti ade Jehovha zve agonde zvigondiso zvese zva Jehovha. Asi Izaki paainga waano 25 o makore, Jehovha wakakumbira kuti Abhirahama aite ciro cimweni caizonesa maningi. Cainga ciro capi?

Mwari wakati kuna Abhirahama: ‘Ndapota torai mwana wako umwe basi zve umupire inga muripo pa dundhu ro nyika yo Moria.’ Abhirahama aacaitorangarira kuti ngenyi Jehovha waimukumbira kuti aite izvo. Asi iyena wakazwira Jehovha.

Pa mangwanani akatevera, Abhirahama wakatora Izaki no vashandiri vake vaviri zve voenda ku dundhu ro Moria. Pasure po njiku ndhatu, ivona vakavona ngo dhambo dundhu iri. Abhirahama wakabvunja vashandiri vake kuti vavetere iyena na Izaki vaienda kopa muripo. Abhirahama wakapa huni Izaki kuti athware zve Abhirahama wakabata cipanga. Izaki wakabvunjisa babake kudari: ‘Ciri kwapi cinyama camunozopira?’ Abhirahama wakati: ‘Mwanangu, Jehovha anozotipa.’

Pavakazoguma pa dundhu riya, ivona vakavaka dandiro. Perapo, Abhirahama wakasunga nyara no murenje ja Izaki zve womudira pa nyezuru po dandiro.

Abhirahama wakabata cipanga. Pa nguva yondhoyo, ngirozi ya Jehovha yakamudanija yeciti: ‘Abhirahama! Ucauraya mujaheo! Wari ndinozviziva kuti iwewe unogonda Mwari ngokuti wakatenda kupira mwana wako umwe ega.’  Perapo Abhirahama wakavona cibvuta cakasungwa pa zimiti. Ngo kukasika iyena wakasunungura Izaki zve wakapira cibvuta ciya kuciripi Izaki.

Kubvira pa njiku yondhoyo, Jehovha wakadanija Abhirahama inga shamwari yangu. Unoziva ngenyi? Abhirahama waiita zvese zvaaikumbihwa ndi Jehovha kuti aite, pikija paacainasa kuzwisisa kuti ngenyi Jehovha waimukumbira kuti aite kudaro.

Jehovha wakagondisa ko cipiri eciti kuna Abhirahama: ‘Ndinozokukomborera zve ndinozoengejera vana vako kana mubarihwana wako.’ Izvi zvaireva kuti Jehovha waizokomborera vandhu vese vaushoni ngo pamusoro po mbhuri ya Abhirahama.