Mosi na Aroni vakaenda koobvunja Faro masoko a Mwari okuti: ‘Kudari ukatama kusia vandhu vangu vapinde, ndinozotumira mamundhunji pa nyika yese.’ Mamundhunji mazinji akanghwina mu nyumba jo vaEjipita, azvinenyi jo vakakhupuka kana varombo. Nyika yese yakazara ngo ndhunji. Asi mu nyika yo Gosheni, kwairaramari vaIziraeri, akucaingepi no ndhunji. Rakatanga dambujiko ro cirongomuna, dambujiko rakahwajisa vaEjipita basi. Faro wakadeketera eciti: ‘Bvunjai Jehovha abvise ndhunji iji. Vandhu vake vangapinda.’ Asi Jehovha paakabvisa ndhunji jiya, Faro wakacinja murangariro wake. Faro wakakwanisa kujija cijijo ciri cese here?

Jehovha wakati: ‘Kudari ukatama kusia kuti vandhu vangu vapinde, zvinyama zvo vaEjipiti zvese zvinozohwaja zve zvofa.’ Pa njiku yakatevera, zvinyama zvakatanga kufa. Asi zvinyama zvo vaIziraeri azvizivi kufa. Pikija zvakadaro Faro wakavangisa mwoyo wake zve aazivi kuvasia kuti vapinde.

Perapo Jehovha wakabvunja Mosi kuti ahwirire ka Faro zve akhandire marota mudenga. Marota akaguma pa kuva bukuta kamare zve akaita kuti vaEjipita vese vazare ngo bukuta. Bukuta rakabara mota jinozizimusa ku vaEjipita vese no ku zvinyama zvavo. Pikija zvakadaro, Faro wakandoramba kusia kuti vaIziraeri vapinde.

Jehovha wakatumazve Mosi kwenda ka Faro, paakaguma wakati: ‘Iwewe uciri kundoramba kusia  kuti vandhu vangu vapinde? Mangwana, mbheni no nvura yo mapuwe inozona pa nyika yese.’ Pa njiku yakazotevera Jehovha wakatumira mbheni, nvura yo mapuwe no muriro. Rainga zibepo guru ricizivi kumbovoneka ku Ejipita. Miti jese no zvirimwa zvese zvakapera kuparajwa, asi haiwa zvaingaya mu nyika yo Gosheni. Faro wakati: ‘Bvunjai Jehovha aimise zviri kuitikari! Perapo mwese henyu mungapinda.’ Asi ngo kukasika mbheni no nvura yo mapuwe zvakaima, Faro wakacinja murangariro wake.

Perapo Mosi wakati: ‘Wari ndongwe jinozoha zvirimwa zvese zvakasiiwa ngo nvura yo mapuwe.’ Zviuru no zviuru zvo ndongwe zvakaha zvese zvainga zvasara mu maminda no mu miti Jese. Faro wakati: ‘Bvunjai Jehovha aendese ndongwe ndhambo no kuno.’ Asi Jehovha paakandoimisa ndongwe jiya, Faro wainga acindori mundhu acikazwi.

Jehovha wakati kuna Mosi: ‘Tambanujai ndonga yako mugore.’ Ngo kukasika, mugore makamuka kuita cidima. Pa njiku ndhatu, vaEjipita avacaikwanisa kuvona ciri cese kana ariwese. Basi mu nyumba jo vaIziraeri kwainga kwakaeja.

Faro wakati kuna Mosi: ‘Iwewe no vandhu vako mungapinda. Basi munosia zvinyama zvenyu kuno.’ Mosi wakati: ‘Tinodikana kutora zvinyama zvedu ngokudaro tingazvipira ka Mwari wedu.’ Faro wakanyangajwa maningi. Iyena wakakhuwa eciti: ‘Budai pambeji pangu! Kudari ndikakuvonazve, ndinozokuuraya.’