Mu makore mazinji vaIziraeri vakatanga kunamata zvidhori, ngokudaro Jehovha wakatendera kuti vaFiristi vatore nyika javo. Asi wari kwainga no vaIziraeri vamweni vaida Jehovha. Umwe wavo wainga Manoa. Iyena no mukaji wake avacaingepi no mwana. Pa njiku imweni Jehovha wakatuma ngirozi kuna mukaji wa Manoa. Ngirozi yakati kwaari: ‘Iwewe unozova no mwana. Iyena anozoponesa vaIziraeri kubva mu nyara jo vaFiristi. Iyena anozova muNaziri.’ Unoziva kuti vaNaziri bhaani? Ivona vainga vashandiri va Jehovha vanosisira. VaNaziri avacaitendehwa kugunda bvuji ravo.

Mu kufamba ko nguva, Manoa wakava no mwana zve vakamudanija kuti Samusoni. Samusoni paaikura, Jehovha wakamupa simba. Iyena wakauraya mbhondoro ngo nyara jake. Pa bvaza imweni, Samusoni wakauraya 30 o vaFiristi ega. VaFiristi vaimuzonda zve vaipsaka njira jo kuda kumuuraya. Pa usiku umweni Samusoni paainga akavata ku Gaza, vakaenda pa musuvo wo dhorobha zve vakamuvetera pondhopo kuti vamuuraye comangwanani Asi pakati po usiku, Samusoni wakamuka, woenda mbera pa musuvo wo dhorobha zve wakabuda. Iyena wakatakura musuvo ngo mapfuji ake mbhera nyezuru ko dundhu riri pedho no Hebroni!

No papera mukuvo wakatikuti, vaFiristi vakaenda ku nomoradha ya Samusoni zve voibvunja kudari: ‘Itusu tinokupa zviuru zvo mare yo sirivha kudari ukaziva zvinopa simba Samusoni. Tinoda kumubata zve tomudira mukadheia.’ Dharira waida mare zve wakatenda. Pakutanga, Samusoni wakaramba kumubvunja ngenyi iyena wainga no simba. Asi iyena wakaramba acimubvunjisa mbhera iyena wakananga zvaimuitisaro. Iyena wakamubvunja kudari: ‘Bvuji rangu arito rakagundwa ngokuti ndiri muNaziri. Kudari bvuji rangu rikagundwa, simba rangu rinozopera.’ Samusoni wakashaisha maningi ngo kumubvunja izvo, andizvopi?

 Ngo kukasika Dharira wakaenda koobvunja vaFiristi: ‘Ndinociziva cinoitisa kuti Samusoni ave no simba!’ Wakaita kuti Samusoni avate pa mavero ake zve wakabvunja mundhu agunde bvuji rake. Dharira wakakhuwa eciti: ‘Samusoni, vaFiristi vari pano!’ Samusoni wakamuka, zve acaingazve no simba. VaFiristi vakamubata, vomuitisa bofu zve vakamudira mu kadheia.

Pa njiku imwe zviuru zvo vaFiristi zvainga zvakaungana pa temberi ya mwari wavo Dhagoni, vakakhuwa veciti: ‘Mwari wedu watipa Samusoni! Muviisenyi kuno! Ngatitambe naye.’ Ivona vakamudira pakati po mapiravira maviri zve vakatanga kumushora. Samusoni wakakhuwa eciti: ‘Nandi Jehovha, ndapota ndipenyizve simba.’ Wari, Samusoni waingazve no bvuji rakakura. Iyena wakandunda mapiravira aya ngo simba rese kamare. Nyumba yese yakawa, youraya vandhu vese vainga mondhomo zve Samusoni wakafavo.