Soromona paakava mambo wo Iziraeri, Jehovha wakamubvunja kuti: ‘Icinyi caunoda kuti ndikupe?’ Soromona wakati: ‘Ndiciri mujaha zve andizvizivi ushoni zvandinodikana kuita. Ndapota ndipenyi uzivi kuti ndikwanise kutungamirira vandhu venyu.’ Jehovha wakati: ‘Ngokuti wakumbira uzivi, ndinozoita kuti uve mundhu anoziva kupinda vandhu vese panyika. Ndinokupazve upfumi wakawanda. Zve kudari ukafamba mu makwanja angu, ucazorarama makore akawanda.’

Soromona wakatanga kuvaka temberi. Iyena wakashandisa zviro zvakanaka zvinoti ndarama, sirivha, matabwa zve mapuwe. Vanarume no vanakaji vainasa kuziva vaikwana kuita ciuru vakashanda pa kuvaka temberi. No papera makore manomwe, temberi yainga yakanasiririka kuti ipihwe kuna Jehovha. Yainga no dandiro zve padandiropo painga no zvibayiro. Soromona wakagwadama pamberi po dandiro zve wakaita mukumbiro eciti: ‘Jehovha, temberi iyi aina kukura kana kuseja zvakakwana kuti mugaremo, asi tapota Jehovha ashiranyi kunamata kwedu zve izwanyi mukumbiro jedu.’ Jehovha wakavonesa kudini temberi pomwe no mukumbiro wa Soromona? Soromona paakapeja kuita mukumbiro, wakaderuka muriro kubva mugore zve wakapisa zvibayiro zvainga pa dendemaro. Izvo zvakatatija kuti Jehovha wakadakarira temberi. VaIziraeri pavakavona izvo vakadakara maningi.

Mambo Soromona waizivika inga mundhu ano uzivi mu nyika yese yo Iziraeri pomwe no mu mativi ese o ndhambo. Vandhu vaiviya kuna Soromona kuti vabeswe pa zvineso zvavo. Pikija mambo wo kaji wo kuShebha wakaviya komueja ngo mubvunjo jo kunesa. Paakazwa mupinguro jake, wakati: ‘Pandakazwa zvaibhuiwa ngo vandhu ngo pamusoro penyu andina kuzvitenda, asi wari zvino ndazovona kuti muno uzivi kupinda zvavaibhuya. Mwari wenyu Jehovha, wakamukomborera.’ Upenyu wo vaIziraeri wainga wakanaka maningi zve vandhu vaidakara. Asi zviro zvaida kucinja.