Mambo wo vaSiriya, Bheni-hadhadhi wakaramba ecihwisana no vaIziraeri. Asi nguva jese muporofita Erija waingwaja mambo wo ku Iziraeri ngo zviya zvaida kuita mambo wo ku aSiriya, ngokudaro mambo wo ku Iziraeri waitiza. Bheni-hadhadhi wakarangarira kubata Erija. Wakabvunjwa kuti Erija wainga ku dhoroba ro Dhothani zve wakatuma masoca o vaSiriya kuti vaende kondhoyo komubata.

VaSiriya vakaguma ku dhorobha ro Dhothani co usiku. Co mangwanani, mushandi wa Erija wakabuda kunja wovona dhorobha riya rainga rakatendenejwa ngo masoca o vaSiriya. Iyena wakathya maningi zve wakatanga kumima eciti: ‘Erija, tinozoitenyi?’ Erija wakamubvunja kuti: ‘Vari kwatiri vakawanda maningi kupinda vari kovari.’ Panguva yondhoyo, Jehovha wakaita kuti mushandi wa Erija avone kuti matundhu ese ainga phedo no dhorobha, ainga akazara ngo ngoro jo cikwata co masoca anobwaka.

Masoca o vaSiriya paakaeja kubata Erija, iyena wakaita mukumbiro eciti: ‘Jehovha, itai kuti vandhu ava vaite mapofu.’ Panguva yondhoyo, pikija kuti masoca aikwanisa kuvona, asi avacezviziva kuti vainga vari kwapi. Erija wakabvunja masoca aya kuti: ‘Muri mu dhorobha riciripi irona. Nditeverenyi,  ndinozomuperekeja kuno mundhu wo munopsakaro.’ Ivona vakatevera Erija kwenda ku Samaria, kwaigara mambo wo Iziraeri.

Pavakaguma kondhoyo, vaSiriya vakazoziva kwapi kwavainga. Mambo wo Iziraeri wakabvunjisa Erija kuti: ‘Ndovauraya here?’ Kureva kuti Erija wakashandisa mukana uu kuti ahwirijire vandhu vaiejaya kumukhuvaza here? Haiwa. Erija wakati: ‘Mucavauraya. Vapenyi zvokuha, zve varegerenyi vaende.’ Ngo kudaro mambo wo Iziraeri wakanasiririsa zvokuha zvakawanda kuiitira masoca o Siriya. Zve wakavasiya kuti vaende kunyumba kwavo.