Josiya wakava mambo wo vaJudha ano makore 8. Mu mazuva awo, vandhu vaita zvo masaramuso no kunamata zvithombe. Josiya paainga no makore anokwana 16 o kubahwa, wakaeja kunamata Jehovha mu njira kwayo. Paakava no 20 o makore, iyena wakatanga kuphwanya-phwanya zvithombe pomwe no madandiro ese aivakwa mu nyika. Zve Josiya paakava no makore anokwana 26 wakaita kuti temberi ya Mwari igajirihwe.

Mupiri mukuru waidanijwa Hirikia, wakawana muphukutu wo mutemo wa Jehovha wainga mu temberi—kangaije muphukutu wiya wainga wakatahwa ndi Mosi. Shafani uwo wainga mutari wa mambo wakaviisa muphukutu kuna mambo Josiya zve wotanga kuverenga. Josiya paakazwa muphukutu weciverengwa, wakavona kuti vandhu vainga no makore akawanda vacingateveri Jehovha. Mambo Josiya wakati kuna Herikia: ‘Jehovha wakanyangajwa maningi na itusu. Endai ko bhuya naye. Jehovha anozotibvunja kuti zvicinyi zvatinodikana kuita.’ Jehovha wakadavira acishandisa muporofita wo kaji anodanijwa Huridha eciti: ‘Vandhu vo Judha vandisiya. Ivona vanofanira kupanicwa, asi asipi pa mukuvo wo kutonga ka mambo Josiya, ngo dava yokuti iyena wakava anojidodokesa.’

Apo mambo Josiya paakazwa masoko, iyena wakaenda ku temberi, kodaninja vandhu vo Judha kuti vaungane pamwepo. Iyena wakaverenga mutemo wa Jehovha ku vandhu vese vo munyikemo. Josiya no vandhu vo munyikemo vakagondesa kupurukira Jehovha ngo mwoyo wavo wese.

 Jinja ro vaJudha vainga vaano makore mazinji mu nyikemo vacingaiti phasika. Asi Josiya pakaverenga kuti phasika yaidikanwa kuitwa gore ngo gore, iyena wakabvunja jinja riya kuti: ‘Tinodikana kuitira Jehovha phasika.’ Josiya wakanasirira kuti aite mupiro jakawanda zve wakanasirira kuti kuve no vaimbi ku temberi. Vandhu vakaita phasika zve makore manomwe akatevera vakaitazve dhiri ro mukate ucina mbijo.kubvira ku mazuva a Samueri akumbozivi kuitikazve phasika yakaezana na iyi. Josiya waida maningi mutemo wa Jehovha. Imwimwi munodakajihwa ngo kujija mutemo wa Jehovha here?