1, 2. Ngenyi tecifanera kuvona mukumbiro ciri cidakajiso cikuru, zve ngenyi tecifanera kuziva zvinojijisa Bhaibheri nga zvonazvo?

TIKAEZANISIRA pasi no ndhondho zinji jiri kumatenga, pasi pano padoko maningi. Zvokadi, kuna Jehovha, “wakaita denga no nyika,” majinja o mushovo wese wo vandhu wakafanana no dondhwe ro kumwa iri mu bhagedhi. (Nduyo 115:15; Isaia 40:15) Asi Bhaibheri rinoti: “Ari phedo po vese vanomudanija, po vese vanomudanija ngo mwoyo wese. Anoita bzo vanoda vaya vanomuthya, anozwa kukhuwa kwavo, no kuvaponesa.” (Nduyo 145:18, 19) Amborangarijanyi zvazvinoreva basi! Marure wo Masimba ese kuva phedo na itusu ecitizwa kana tikadaninja “kwaari ngo cokwadi.” Mukumbiro jatinoita kuna Mwari rudakajiso kamare.

² Kudari itusu tikada kuti Jehovha apurukire mukumbiro jedu, itusu tinodikana kuita mukumbiro kwaari mu njira yaanodakarira. Tingazviitisa kudini izvi, ticikazivi zvinojijisa Bhaibheri ngo pamusoro po mukumbiro? Zvinosisira maningi kwatiri kuziva zvinonanga matahwa ngo pamusoro po shwiro iyi, ngo kuti mukumbiro unotibesera kuti tikhwedere phedo na Jehovha.

3. Ngorapi thangwe rinoitisa kuti tiite mukumbiro kuna Jehovha?

³ Rimwe ro thangwe rinotiitisa kuti tiite mukumbiro ngo  rokuti Jehovha ndiyena anotikoka kuti tidaro. Soko rake rinotivangisa kuti: “Mucathimwa-thimwa ngo ndava iriyese. Kaveta, ngo njio yese, mutatijenyi Mwari bzomunotama, mecipota no kukumbira pamwepo no kubonga. Rugarisiko hwa Mwari hunopinda uzivi hwese hunozorinda mwoyo yenyu no murangariro yenyu, mwa Kristu Jesu.” (VaFilipi 4:6, 7) Zvokadi, itusu atidi kunyenya nasiriro yondhoyo yakanaka yo mutungamiriri mukuru wo mudenga no pasi!

4. Kugara teciita mukumbiro kuna Jehovha kunovangisa kudini ushamwari hwedu naye?

⁴ Thangwe rimweni rinotiitisa kuti tiite mukumbiro kuna Jehovha, ngo rokuvangisa ushamwari wedu naye. Shamwari jokadi-kadi ajibhui na imwimwi ngo kuda kupuwa zviro basi. Zvokadi-kadi, shamwari jakanaka jinodakarirana, zve ushamwari hwavo hunovanga pavanonga vecibhuisana vakasujunuka zviri mu murangariro mavo shwiro javo no mazwiro avo. Mu njira jimweni, mugariro o zviro unova wakaezana no ukama hwedu na Jehovha Mwari. Mecibesehwa ngo bhuku rino, makajija zvakawanda zvinojijiswa mu Bhaibheri ngo zva Jehovha, mugariro wake no cidisiso cake. Imwimwi maziva Jehovha inga mundhu okadi-kadi. Mukumbiro unomupekeja nguva kwayo yokuti mubhuye murangariro jenyu jo mukati-kati no kutatija kudakara kwenyu kuna Baba  weyu vari mudenga. Pamunonga meciita izvi, munonga mecikhwedera phedo na Jehovha.—Jakobo 4:8.

5. Cicinyi cinokhombija kuti Jehovha aapurukiri mukumbiro jese?

⁵ Jehovha anopurukira mukumbiro jese here? Vonanyi zvakabvujwa valziraeri vakanga vapanduka mu mazuva o muphorofeti Isaia: “Nokunyati mukaengejera munamato, andizomuzwi. Nyara jenyu jakazara ngo ngazi.” (Isaia 1:15) Ngo kudaro zviito zvedu zvingaitisa kuti Mwari atame kupurukira mukumbiro jedu. Ngo kudaro, kuti mukumbiro jedu jipurukihwe ndi Mwari, tinodikana kukwanirisa zviro zvatinodikana kuita.

6. Kuti Mwari apurukire mukumbiro jedu, ciciyi catinodikana kuita, zve tingazviwanisa kudini izvi?

⁶ Cikuru maningi ngo co kuva no rutendo. (Verenganyi Marco 11:24.) Mupostori Pauro wakatara: “Pacina rutendo, apana anodakarisa Mwari. Ndiani anokhwedera kuna Mwari, anodikana kutenda kuti ariyo, no kuti ndiyena anopa mupocero vandhu vanomupsanga.” (Vaheberi 11:6) Kuva no rutendo hwokadi-kadi, asipi kuziva basi kuti Mwari ariyo nokuti anozwa mukumbiro jedu no kujipingura. Rutendo unotatijwa ngo zviito zvedu. Zviito zvedu zvinokhobija kuti tino rutendo kana atina. Zve upenyu hwedu hwo njiku no njiku kunodikana kusia pambhene kuti tino rutendo.—Jakobo 2:26.

7. (a) Ngenyi tinodikana kureremeja Jehovha patinonga tecivereketa naye mu mukumbiro? (b) Patinonga teciita mukumbiro kuna Mwari tingakombija kudini kujidodokesa no kuva no mwoyo wese?

⁷ Jehovha anodavo kuti vaya vanoita mukumbiro kwaari vazviite vecijidodokesa. Apana thangwe rinotiitisa kuti tijidodokese patinonga tecibhuya naye Jehovha here? Vandhu pavanowana nguva kwayo yo kuvereketa na mambo kana mutungamiriri, ivona kazinji vanozviita ngo kumureremeja, vanonasa kuziva ciimo co panyezuru. Itusu tinodikana kureremeja maningi Jehovha patinokhwedera kwaari! (Nduyo 138:6) Zvokadi, iyena ndi “Mwari wo simba rese.” (Genesi 17:1) Patinoita mukumbiro kuna Mwari, maitiro edu anodikana  kutatija kuti tinotendera ciimo cake tecijidodokesa pamberi pake. Kujidodokesa kwakadaro kunozotindunda kuti tiite mukumbiro no mwoyo wese, teciramba mukumbiro jakatojana kana jo kuphinda.—Mateu 6:7, 8.

8. Tingaitisa kudini mukuzwirana no mukumbiro jatinoita?

⁸ Cimweni cinodiwa kuti Mwari atizwe, ngo co kuita zvinozwirana no mukumbiro jedu. Jehovha anovetera kuti tiite zvese zvatinokwanisa kuti tiite mukuzwirana no mukumbiro jedu. Inga muezaniso, kudari tikaita mukumbiro wo kuti: “Tipenyi nyamasi kuha kwedu ko njiku jese” tinodikana kushanda ngo simba pa basa riri rese ratingaita. (Mateu 6:11; 2 VaTesalònika 3:10) Kudari tikakumbira kuti tibesehwe kunyisa kurembejeka ko kunyama, tinodikana kuva vanongwarira kuti titize mugariro zve no maitiro aizotitungamirira ku muejo. (VaKolosi 3:5) Mukuengejera ku zvinodiwa zvinosisira izvi, kuno mubvunjo jimweni ngo pamusoro po mukumbiro jatinodikana kupinguhwa.

9. Tinodikana kuita mukumbiro basi kuna aani, zve tecishandisa zina raani?

⁹ Tinodikana kuita mukumbiro kuna ani? Jesu wakajijisa vateveri vake kuti vaite mukumbiro kuna ‘Baba wedu vari nyezuru.’ (Mateu 6:9) Ngo kudaro, mukumbiro jedu jinodikana kuenda basi kuna Jehovha Mwari. Kaveta, Jehovha anoda kuti tidavire cigaro cino mwana wake umwe basi, Jesu Kristu. Inga zvatakajija pa Cipauko 5, Jesu wakatumihwa pasi pano kuzoshanda inga muripo wo kutipokonyora kubva ku cishaishi no rufu. (Johani 3:16; VaRoma 5:12) Iyena wakagajwa inga Mupiri Mukuru zve Mutongi. (Johani 5:22; Vaheberi 6:20) Ngo iyo ndava Matahwa anotibvunja kuti tiite mukumbiro kubvira kuna Jesu. Iyena wakananga pacake kudari: “Ndini gwanja, bzokadi no uhomi. Apana anokwanisa kuenda kuna Baba acikapindi ndini.” (Johani 14:6) Kuti mukumbiro jedu jizike, tinodikana kukumbira basi kuna Jehovha tecishandisa zina ro Mwana wake.

10. Ngenyi apana magariro akagajwa patinoita mukumbiro?

 ¹⁰ Patinoita mukumbiro, pano magariro akagajwa atinodikana kuita here? Haiwa. Jehovha aakumbiri magariro kamare o mukono kana o muviri wese. Bhaibheri rinojijisa kuti, zvinotendehwa kuva no magariro akasiana-siana o muviri. Iwona anobatanija kugara pasi, kukotama, kugwadama zve kuima. (1 Kronike 17:16; Neemia 8:6; Danieli 6:10; Marco 11:25) Zvinodikana kamare, asipi magariro edu o muviri anokwanisa kuvoneka ngo vamweni, asi magariro akarungama o mwoyo. Zvokadi, mukati mo mabasa edu o njiku ngo njiku kana patinosongana no zvinodiwa ngo kukasika, tingaita mukumbiro jo cinyararire azvinenyi no magariro edu no kwatinonga tiri. Jehovha anozwa mukumbiro jondhojo, pikija jicikaziki kamare ngo vaya vari phedo na itusu.—Neemia 2:1-6.

11. Ngo zvapi zviro zvedu pacedu zvinosisira kunangwa mu mukumbiro?

¹¹ Tinokumbirenyi? Bhaibheri rinosanangura kudari: “Nga uku kugonda kotinako na Mwari: Kuti tikamukumbira ciro, ngo kuteveja kuda kwake, Yena anotipurukira.” (1 Johani 5:14) Ngo kudaro tingakumbira ciri cese cinozwirana no kuda ka Mwari. Iyena anodavo here kuti tikumbire ngo pamusoro po shwiro jedu pa cedu? Hina! Kuita mukumbiro kuna Jehovha zvingaezaniswa no kubhuya no shamwari yo phedo. Itusu tingabhuya na Mwari takasujunuka, ‘tecimubvunja zvatinothimwa-thimwa.’ (Nduyo 62:8) Zvinosisira maningi kwatiri kuti tikumbire mujimu mucena, kuti utibesere kuita zvakanaka. (Luka 11:13) Tingakumbiravo ndhungamiro kuti titeme zvivaringo zvo ungwaru zve utivangise mukuhwisana no zvineso. (Jakobo 1:5) Patinoshaisha tinodikana kukumbira ruregerero kubva ku mupiro wa Kristu. (VaEfeso 1:3, 7) Zvokadi, atidikani kundokumbira basi zvatinoda. Atidikani kundojikumbirira basi, asi tinodikana kukumbiriravo vandhu vamweni—zvihwa zvo mbhuri no vanamati doni.—Maitiro o Vapostori 12:5; VaKolosi 4:12.

12. Tingaitisa kudini kuti shwiro ngo pamusoro pa Baba vedu vo kudenga jive pandau inosisira maningi mu mukumbiro wedu?

¹² Shwiro ngo pamusoro pa Jehovha Mwari jinodikana  kuva pa ndau yo kutanga mu mukumbiro wedu. Zvokadi itusu tinothangwe ro kuti timusimbe ngo mwoyo wese zve tomubongeseya ngo kunaka kwake mwoyo. (1 Kronike 29:10-13) Jesu wakapekeja mukumbiro wo kuezanisira wakatahwa pana Mateu 6:9-13, paakatijijisa kukumbira kuti zina ra Mwari riceneswe, zvinoreva kuritaja inga rakacena. (Verenganyi.) Tevere, wakananga ngo kuviya ko Umambo hwa Mwari no kuitika ko kuda ka Mwari pasi pano inga kudenga. Basi paakandopeja kunanga zviro zvaisisira maningi zvaizwirana na Jehovha, Jesu wakazovereketa shwiro jake pacake. Mukufananavo, patinopekeja Mwari ndau inosisira maningi mu mukumbiro wedu, tinokhombija kuti atidakariri kugara ushoni kwedu basi.

13. Matahwa anokhombijenyi ngo pamusoro po kureba ko mukumbiro jinotendehwa?

¹³ Mukumbiro wedu unodikana kurebesa kudini? Bhaibheri aridiri mugano wo marebere anodikana kuita mukumbiro jo pambhene. Iyona inga siyana kubva pa mukumbiro wakafupika ticito taha mbhera ku mukumbiro wakareba wo pacivande patinonga tecidurura zviri mu mwoyo medu kuna Jehovha. (1 Samueli 1:12, 15) Kaveta, Jesu wakashora vandhu vaijiita inga vakarurama maningi, veciita mukumbiro jakareba, jo kuvonehwa pamberi po vamweni. (Luka 20:46, 47) Mukumbiro iji ajikahamaji Jehovha. Cinosisira maningi, kuita mukumbiro jinobva pa mwoyo. Ngo kudaro, kureba ko mukumbiro jinotendehwa jingasiana-siana mukuzwirana no zvinongaro zvecidika pomwe no zviitiko.

14. Bhaibheri parinotikonokeja kuti “namatanyi mucikazorori” rinonga recirevenyi, zve zvicinyi zvinodakajisa ngo pamusoro pazvo?

¹⁴ Tinodikana kukumbira kangana? Bhaibheri rinotivangisa kuti, “kumbiranyi” nguva jese, rambanyi “mecindonamata [mecindokumbira]” zve “namatanyi [kumbiranyi] mucikazorori.” (Mateu 26:41; VaRoma 12:12; 1 VaTesalònika 5:17) Zvokadi, magama aya aaripi kunanga kuti tinodikana kugara teciita mukumbiro mukuvo wese pa njiku. Kaveta Bhaibheri rinotikonokeja kuti tikumbire nguva jese, toramba tecibonga  Jehovha ngo kunaka kwake mwoyo kwatiri no kupsaka kutungamirihwa ndiyena, kutondhojwa pomwe no kuvangiswa. Azvidakajisi here kuziva kuti Jehovha aadiri mugano wo marebere o mukumbiro pomwe no kuti tingabhuya kangana naye mu mukumbiro? Kudari tikabongeseya zvidakajiso zvedu zvo kuita mukumbiro, tinozowana mukana yakawanda maningi jo kuita mukumbiro kuna Baba vedu vo kudenga.

15. Ngenyi tinodikana kunanga kuti “Amem” pa kupera ko mukumbiro wo mundhu ega kana unoithwa pakazara vandhu?

¹⁵ Ngenyi tinodikana kunanga kuti, “Amem” pakupera ko mukumbiro? Gama ro kuti “amem” rinoreva kuti “zvokadi” kana kuti “ngazvive zvakadaro.” Muezaniso yo mu Matahwa, inokhombija kuti zvinosisira maningi kuti tinange kuti “Amem” pakupera ko mukumbiro wo mundhu ega kana mukumbiro unoithwa pakazara vandhu. (1 Kronike 16:36; Nduyo 41:14) Ngo kunanga kuti “Amem” pakupera ko mukumbiro wedu pacedu, tinonga tecinanga kuti zvatabhuyaro zvabva pa mwoyo kamare. Patinonanga kuti “Amem”—mucinyararire kana ngo izwi guru—pakupera ko mukumbiro wo ari wese unoithwa pakazara vandhu, tinokhombija kuti tiri kutenderana no zvaperaya kunangwa.—1 VaKorinto 14:16.

16. Tingava no macijikire akadini ngo pamusoro po mukumbiro?

¹⁶ Jehovha anodaviradi kamare mukumbiro yedu? Hina, zvokadi kamare! Itusu tinothemba kamare kuti tino macijikiro okuti ‘muzwi wo munamato’ anopingura mukumbiro yo mwoyo wese jinoizwa ngo zviuru no zviuru zvo vandhu. (Nduyo 65:3) Jehovha anopingura mukumbiro nguva jimweni ngo kusiana-siana ko njira.

17. Ngenyi tingananga kuti Mwari anoshandisa ngirozi jake no vashandiri vake vari pasi pano kuti adavire mukumbiro jedu?

¹⁷ Jehovha anoshandisa ngirozi no vashandiri vake vo pasi pano kuti apingure mukumbiro. (Vaheberi 1:13, 14) Kuno shwiro jakawanda jakaitika jokuti vandhu vazinji vaiita mukumbiro kuna Mwari kuti vabesehwe kuzwisisa Bhaibheri  zve ngo kukasika vakagumihwa ngo vashandiri va Jehovha. Zviitiko izvi zvinokhombija ndhungamiro jo ngirozi jo basa ro kucumaera Umambo. (Apokalipsi 14:6) Kuti adavire mukumbiro jatinoita munguva yatinonga tino zvatinoda kamare, Jehovha angaita kuti muKristu umweni aviye kuzotibesera.—Mazwi Akangwara 12:25; Jakobo 2:16.

18. Jehovha anoshandisisa kudini mujimu wake mucena no Soko rake kuti adavire mukumbiro yo vashandiri vake?

¹⁸ Jehova Mwari anoshandisavo mujimu mucena wake no Sokorake, Bhaibheri,kuti adavire mukumbiro jo vashandiri  vake. Iyena angadavira mukumbiro jedu jo besero kuti tihwisane no zvineso, ngo kutipa ndhungamiro; zve anotivangisa ngo mujimu wake mucena.(2 VaKorinto 4:7) Kazinji mupinguro wo mukumbiro yedu yo ndhungamiriro tinojiashira jecibva mu Bhaibheri, umo Jehovha maanotipa besero ro kuti titeme zvivaringo zvo uzivi. Mabvesi anobesera,angawanika pajijoyo Bhaibheri yo mundhu egazvepatinoverenga mabhuku o ciKristu, akadari inga bhuku rino. Fundo ro Matahwa ringatibesa kangaije tingathuka tariwana pa musongano wo ciKristu kana masoko angabhuiwa ngo mukuru wo ungano.—VaGalàsia 6:1.

19. Cicinyi catinodikana kurangarira, kudari mukumbiro jedu jeciita inga jicikadavihwizve?

¹⁹ Kudari zveciita inga kuti Jehovha ari kunonoka kudavira mukumbiro yedu, azvinangi kuti iyena aazombokwanisi kujidavira. Mukusiana, tinodikana kuceukija kuti Jehovha anodavira mukumbiro mukuzwirana no kuda kwake zve munguva yake yaakatema. Iyena anonasa kuziva ushoni zvatinoda, no njira yaangazvinasirira ndiyona kupinda itusu pacedu. Kazinji iyena anotitendera kuti tirambe ‘tecikumbira, tecipsanga, teciguguja.’ (Luka 11:5-10) Kuvangirira uku kunokhombija kuna Mwari kuti cidisiso cedu cakakura maningi zve kuti gonda redu ngorokadi kamare. Cimwenizve ngo cokuti, Jehovha angadavira mukumbiro wedu munjira  yatainga ticikaveteri. Inga muezaniso, iyena angadavira mukumbiro wedu ngo pamusoro po cineso, kuciripi kubvisa cinesoco, asi ngo kutipa simba kuti ticicungirire.—Verenganyi VaFilipi 4:13.

20. Ngenyi tinodikana kunasa kushandisa kamare cidakajiso cinosisira ici co mukumbiro?

²⁰ Atibongesei here ngo kuti Musiki wo zviro zvese, ari phedo no ari wese anomudaninjira ngo njira kwayomumukumbiro? (Verenganyi Nduyo 145:18.) Ngatinase kushandisa kamare cidakajiso cinosisira ici co mukumbiro. Kudari tikazviita tinozova no vetero inodakajisa yo kukhwedera phedo na Jehovha, Muzwi wo mukumbiro.