MU NDUMI yaakabvaro, Bhaibheri rakashandisa mu ndau jinopindirija 70 gama ro ciHebheru rokuti sheʼohlʹ zve mu ciGiriki rinozwi haiʹdes. Magama maviri aya ari kunangira zvorufu. Sandujo jimweni jo Bhaibheri jinonanga kuti “guva,” “hero,” kana kuti “rindi.” Kaveta mu ndumi zinji, ajina magama anowirirana kamare no revo yo magama o ciHebheru no ciGiriki. Ngo kudaro Tradução do Novo Mundo inoshandisa gama ro kuti ‘Sheori’ no ‘Haidhesi’ pa masoko o pasi. Anorevenyi magama aya? Imanyi tivone kuti, akashandisiswa kudini mu mativi akasiana-siana o Bhaibheri.

Mucumaeri 9:10 inoti: “Bzese bzo unokwanisa kuita ngo nyara jako, bziitei; ngokuti mu iba [“Sheori,” masoko o pasi o NM], mo unoenda, amuna basa, murangariro, nokuti kuziva no ungwaru.” Izvi zvinoreva here kuti Sheori rinonangira guva kamare kana ro mundhu umwe nga umwe matinoendaya kooviga mudiwa wedu? Haiwa. Bhaibheri recinangira ndau kamare yo kuvigira kana kuti guva, rinoshandisa magama amweni ciHebhero no ciGiriki, kuciripi sheʼohlʹ no haiʹdes. (Genesi 23:7-9; Mateu 28:1) Bhaibheri arishandisivo gama rokuti ‘Sheori’ recida kunangira guva ro vandhu vakawanda vakafushihwa mondhomo, rakadari inga guva ro mbhuri kana guva ro vese.—Genesi 49:30, 31.

Waro, indau yo mushovonyi inonangihwa ngo “Sheori”? Soko ra Mwari rinotatija kuti “Sheori,” kana “Haideisi,” anonangira ciro cikuru maningi cinotopinda guva guru rinovigwa vandhu vazinji. Ngo kudaro, Isaia 5:14 inonanga kuti maiba kana kuti sheori ‘anobeura muromo, anoxamisa maguru.’ Pikija Sheori rakamija vandhu vakawanda maningi vakafa, tinange kudaro, nguva jese zvinoita inga kuti ricindori no njara. (Mazwi Akangwara 30:15, 16) Mukusiana no svipa kamare ingakwanisa kuvigwa vandhu vanganani vakafa, ‘iba ariguti.’ (Mazwi Akangwara 27:20) Izvi zvinoreva kuti, Sheori arizombozarizve. Arina mugano. Sheori, kana Haidhesi, asipi pandau kamare panozivika. Asi i guva ro mundhu ari wese, ndau yo kufananijira yakavata vandhu vese mu rufu.

Jijiso yo Bhaibheri yo rumuko inotibesera kufumbhura hwiru humweni huri mukati mo revo yo “Sheori” “Haidhesi.” Soko ra  Mwari rinonanga kuti Sheori no Haidhesi zvinoushamwari no mushovo wo rufu hunozova no rumuko. * (Jobe 14:13; Maitiro o Vapostori 2:31; Apokalipsi 20:13) Bhaibheri rinovonesavo kuti vayani vari mu Sheori, kana Haidhesi, vanobatanija vanoshandira no vacikashandiri Jehovha. (Genesi 37:35; Nduyo 55:15) Ngo kudaro, Bhaibheri rinojijisa kuti “kumuka ko vakafa: vanasi no vacikanasi.”—Maitiro o Vapostori 24:15.