CIJIJO 15
Jesu Ndiyani?
Jesu i mundhu anozivika maningi kupinda ariwese wakamborarama pasi pano. Pikija zvakadaro, vandhu vazinji avazivi zvizinji ngo pamusoro pake, vamweni vano mavonero akasiyana ngo pamusoro pokuti Jesu ndiyani. Asi Bhaibheri rinoti kudini ngo pamusoro pake?
1. Jesu Ndiyani?
Jesu i ngirozi inosimba maningi inorarama mu gore. Jehovha acito asika zviro zvese, iyena wakatanga kusika Jesu. Ngoiyo ndava, iyena anodanijwa “dangwe ro zvisikwa zvese.” (Vakorose 1:15) Bhaibheri rinonangazve kuti Jesu “wakabahwa ari ega.” Izvi zvinovonesa kuti Jesu wakasikwa kamare ndi Jehovha. (Johani 3:16) Jesu wakashanda pondhopo na Baba wake, Jehovha. Iyena wakabesera Jehovha kusika zviro zvese. (Verenganyi Mazwi Akangwara 8:30.) Jehovha na Jesu vanodisana maningi. Jesu muimiriri wakagondeka wa Mwari kana kuti anopa masoko no ndhungamiriro ja Jehovha. Ngo kudaro, Bhaibheri rinodanija Jesu kuti i “Soko.”—Johani 1:14.
2. Ngenyi Jesu wakaviya pasi pano?
Pa makore 2.000 adarika, Jehovha wakaita mushamaiso ecishandisa mujimu mucena. Iyena wakatora upenyu hwa Jesu woudira mu ndani mo mwanakaji waizwi Mariya. Ngo njira iyi, Jesu wakabahwa inga mundhu. (Verenganyi Ruka 1:34, 35.) Jehovha wakatuma Jesu pasi pano kuti ave Mesiya kana Kristu, kuti aponese vandhu vese. a Jesu wakakwanirisa zviporofita zvese zvaibhuya ngo pamusoro pa Mesiya. Izvi zvakabesera vandhu kuziva “Kristu Mwana wa Mwari anopona.”—Mateu 16:16.
3. Jesu ari kwapi wari uno?
Jesu pakupera kufa, iyena wakamuswa inga ngirozi no kuhwirirazve mugore. Naaguma kondhoyo, “Mwari wakamukuja kuti ave pa ndau yakakhwirira.” (Vafiripi 2:9) Wari, Jesu i ngirozi ino simba maningi asi Jehovha ndiyena anosimba rakakura maningi kupinda Jesu.
NASANYI KUPSAKISISA
Zivanyi kuti Jesu ndiyani, ngenyi zvinosisira maningi kujija ngo pamusoro pake.
4. Jesu asipi Mwari wo Masimba Ese
Bhaibheri rinojijisa kuti Jesu i ngirozi inosimba maningi mu gore, pikija zvakadaro, iyena anozwira Baba wake, Jehovha. Tinozvizivisa kudini? Rijanyi VHIDHIYO kuti muvone mu Bhaibheri kuti Jesu wakasiyana kudini na Mwari wo masimba ese.
Tsamba jinotevera jinotibesera kuzwisisa kuti Jehovha na Jesu ndi vandhu vakasiyana. Verenganyi vhesi imwe nga imwe, pakupera kuverenga bhuisananyi ngo muvhunjo jinotevera.
Verenganyi Ruka 1:30-32.
-
Magama akabhuya ngirozi anovonesa kudini kuti Jesu wakasiyana na Jehovha Mwari “Mukuru-Kuru”?
Verenganyi Mateu 3:16, 17.
-
Jesu paaibhabhatijwa, izwi rakavha kudenga rakati kudini?
-
Munorangarira kuti rainga izwi rani?
Verenganyi Johani 14:28.
-
Pa muzi pana baba no mwana, munorangarira kuti ndiyani ano simba rokuvhunja umweni zvokuita?
-
Jesu waida kunangenyi paainanga kuti Jehovha ndi Baba wake?
Verenganyi Johani 12:49.
-
Kureva kuti Jesu wairangarira kuti iyena na Baba wake vakaezana? Imwimwi munorangarira kuti ivona i mundhu umwe?
5. Zviro zvinovonesa kuti Jesu wainga Mesiya
Mu Bhaibheri muno zviporofita zvakawanda zvinobesera vandhu kuziva kuti iyena wainga Mesiya, kana kuti, wiya wakasanwa ndi Mwari kuti aponese vandhu. Rijanyi VHIDHIYO kuti muvone zviporofita zvimweni zvakakwanirisa Jesu paainga pasi pano.
Verenganyi uporofita hunowanika mu Bhaibheri no kubhuisana ngo muvhunjo unotevera:
Verenganyi Mikeya 5:1 kuitira kuvona kuti Mesiya waizobarihwa kwapi. b
-
Uporofita wo kwaizobarihwa Jesu wakakwanirisika here?—Mateu 2:1.
Bhaibheri rainga rakananga ngo mafire aizoita Mesiya. Verenganyi Nduyo 34:21 na Zakaria 12:10 kuti muvone zvimweni zvakona.
-
Kureva kuti zviporofita izvi zvakakwanirisika?—Johani 19:33-37.
-
Kureva kuti Jesu wakaronga zano kuti zviporofita izvi zvikwanirisike?
-
Zvakaitika zvinokhombijenyi ngo pamusoro pa Jesu?
6. Kujija ngo pamusoro pa Jesu kunotibesera maningi
Bhaibheri rinonanga kuti zvinosisira maningi kujija ngo pamusoro pa Jesu no utongi hwake. Verenganyi Johani 14:6 na 17:3, perapo bhuisananyi ngo muvhunjo unotevera:
-
Ngenyi zvakanaka kujija ngo pamusoro pa Jesu?
Jesu wakafunungura gwanja kuti tive shamwari ja Mwari. Iyena wakajijisa cokwadi ngo pamusoro pa Jehovha, perapo itusu tinokwanisa kuwana upenyu ucikaperi ngo pamusoro pake
VANDHU VAMWENI VANOTI: “Zvapupu zva Jehovha azvitendi Jesu.”
-
Imwimwi maizonanga kudini?
ZVOTAJIJA
Jesu i ngirozi inosimba maningi. Iyena i Mwana wa Mwari, anodanijwazve kuti Mesiya.
Kuhwirijira
-
Ngenyi Jesu anodanijwa kuti i “dangwe ro zvisikwa zvese”?
-
Jesu wakaitenyi acito aviya pasi pano?
-
Tinozvizivisa kudini kuti Jesu ndiyena Mesiya?
ZIVANYI ZVIMWENI
Vonanyi zvimweni zvinovonesa kuti Jesu wainga Mesiya.
“Jesu Ndiye Mesiya Anotaurwa Muuprofita Here?” (Mu interneti)
Verenganyi muvone kuti Bhaibheri rinojijisadi kamare zvinonangwaya ngo vamweni kuti Jehovha wakabara Jesu inga mabarire anoita vandhu vana vavo, kana kuti haiwa.
Vonanyi kuti jijiso yo utatu asipi jijiso yo mu Bhaibheri.
“Jesu Ndimwari Here?” (Murindiri, No. 1 wa Abril wo 2009, Cishona)
Verenganyi zviitiko zvakacinja upenyu hwo mwanakaji umweni ngo kupsakisisa kwake zvinonangwa ngo Bhaibheri ngo pamusoro pa Jesu.
“Uma judia explica por que razão reavaliou a sua fé” (Mukai! wa Maio wo 2013, Ciputukezi)
a Mu cijijo 26 na 27 tinozovona kuti ngenyi vandhu vanoda kuponeswa perapo Jesu wakazviitisa kudini.
b Vonanyi Masoko Okupejisira 2 kuti muvone uporofita hunonasa kunanga kuti Mesiya waizoviya rini panyika.
