Makambofihwa ngo ariwese wamaida maningi? Nomuri pamugariro uwu unonesa, kangaije mungajivhunjisa kudari: ‘Mundhu paanofa anoenda kwapi? Kureva kuti mundhu wafari, andicazomuvonizve?’ Pa cijijo cino no cinozari, tinozovona mupinguro jo Bhaibheri jinoembezera maningi.

1. Zvicinyi zvinoitika mundhu paanofa?

Jesu wakaezanisa rufu no hope jokuti apana no co unozwa co zviri kuitika. Mundhu wakavata kamare apana caanozwa co zviri kuitika phedo pake kana ndau imweni. Mu njira yapi rufu hwakaezana no kuvata? Mundhu paanofa, apanazve no ciri cese caanozwazve. Iyena aahwajihwe nee kutotambujika. Bhaibheri rinoti: ‘Asi vakafa apana cavanoziva.’—Verenganyi Mucumaeri 9:5.

2. Kuziva cokwadi ngo pamusoro po rufu kunotibeseresa kudini?

Vandhu vazinji vanothya kufa. Ivona vanothyazve vandhu vakafa. Asi kuziva zvinojijisa Bhaibheri ngo pamusoro po vandhu vakafa kunotisiya takagajana. Jesu wakati: “Cokwadi cinozomusujunura.” (Johani 8:32) Magerejha mazinji vanonanga kuti, mundhu wese paanofa anomwiha unosara wecipona pasure po kufa. Asi Bhaibheri andizvopi zvarinojijisa. Irona rinonanga kuti mundhu paanofa aacatambujikizve. Kusiyapo izvo, vakafa avakwanisi kutitambuja, ngokuti ivona avacazivizve zviri kuitika. Ngo kudaro, apana dikano yokuda kudakajisa vandhu vakafa, kuvanamata no kuita mukumbiro kwavari.

Vandhu vamweni vanonanga kuti zvinokwanisika kubhuya no vakafa. Asi izvi azvikwanisiki. Inga zvatapera kuvona ‘vakafa apana cavanoziva.’ Kudari ari wese akananga kuti ndakabhuya no shamwari yangu kana ukama hwangu hwakafa, kunasa kunanga iyena waibhuya kamare no madhimoni aitevejera mundhu wakafaro. Ngo kudaro, kuziva cokwadi ngo pamusoro po rufu kunotijivirira ku madhimoni. Jehovha anotivhunja kuti ativhiri kueja kubhuya no vandhu vakafa ngokuti iyena anoziva kuti madhimoni akashata maningi.—Verenganyi Deuteronòmio 18:10-12.

3. Zivanyi cokwadi ngo pamusoro po vandhu vakafa

Mu nyika yese, vandhu vano mavonero akasiyana-siyana ngo pamusoro pokuti tinoenda kwapi patinofa. Zvakajeka kuti, asipi mavonero ese angava okadi.

• Mundharaundha yamunogararo, vandhu vanonanga kuti mundhu akafa anoenda kwapi?

 4. Kuziva cokwadi ngo pamusoro po vandhu vakafa kunotibesera maningi

Kuziva cokwadi ngo pamusoro po vakafa kunotibesera kuti ticavathya. Verenganyi Mucumaeri 9:10, perapo bhuisananyi ngo muvhunjo unotevera:

• Kureva kuti vakafa vangakwanisa kutitambuja?

Patinoziva cokwadi co Bhaibheri atitendi manyepo okuti, tinodikana kudakajisa kana kunamata vandhu vakafa. Verenganyi Isaia 8:19 na Apokaripsi 4:11, perapo bhuisananyi ngo muvhunjo unotevera:

• Munorangarira kuti Jehovha anojizwa kudini mundhu paanonamata kana kukumbira besero mundhu wakafa?

5. Kuziva cokwadi ngo pamusoro po rufu kunotitondhoja

Vandhu vazinji vakajija kuti pasure pokufa, vanoenda kotambujwa ngo ndava yo zviro zvakashata zvo vakaita. Asi zvinotitondhoja kuziva kuti atizotambujwi pasure po kufa pikija tainga takaita zviro zvakashata. Verenganyi Varoma 6:7, perapo bhuisananyi ngo muvhunjo unotevera:

• Bhaibheri rinonanga kuti mundhu paanofa, anoregerehwa zvishaishi zvake, kana kuti, kuna Mwari zvishaishi zvake zvapera kupagahwi. Waro imwimwi munorangarira kuti mundhu wakafa angatambujwa ngo ndava yo zvishaishi zvaakaita?

Patinoenderera mberi tecijija ngo pamusoro pa Jehovha, tinoengejera kuzwisisa kuti iyena aazotambuji vandhu vakafa. Verenganyi Deuteronòmio 32:4 na 1 Johani 4:8, perapo bhuisananyi ngo muvhunjo jinotevera:

• Kureva kuti Mwari ano mugariro iji jatavonari mu mavhesi aya, anopisa vandhu pasure po kufa?

• Imwimwi munojizwa kutondhojwa pamunoziva kuti mundhu wakafa anoenda kwapi? Ngenyi?

 ZVOTAJIJA

Mundhu paanofa, apacinazve ciro caanoziva. Vakafa avaripi kutambujika, nee avatokwanisi kutambuja vaciri penye.

Kuhwirijira

• Zvicinyi zvinoitika mundhu paanofa?

• Kuziva cokwadi ngo pamusoro po rufu kunotibeseresa kudini?

• Ngenyi kuziva cokwadi ngo pamusoro po rufu kunotitondhoja?