CIJIJO 37

Bhaibheri Rinonangenyi ngo Pamusoro po Basa no Mare?

RIJANYI

Imwimwi makambogara mecineseka ngo ndava yo basa no mare? Azvizivi kureruka kuwana zvo kupona ndizvona, pamukuvo wondhowo tonamata Jehovha ngo njira yaanoda. Asi Bhaibheri rino mazano anokwanisa kutibesera.

1. Bhaibheri rinonangenyi ngo pamusoro po basa?

Mwari anoda kuti tidakare ngo basa ratinoita. Bhaibheri rinoti: ‘Kudakara ko mundhu, kubusa ngo mucero wo basa rake.’ (Mucumaeri 2:24) Jehovha anoshanda ngo simba. Tinoda kutevejera Jehovha ngo kuva vashandi vaushoni. Kudari tikaita kudaro, tinomudakajisa no kujizwavo ushoni.

Basa rinosisira. Asi atidikani kuita kuti basa redu rive rinosisira maningi kupinda kunamata kwedu Jehovha. (Johani 6:27) Jehovha anotigondesa kuti, kudari tikadira pakutanga kuda kwake, iyena anozotipa zvese zvatinoda kuti tirarame.

2. Tinodikana kuvona mare ngo njira yapi?

Bhaibheri rinonanga kuti mare inojivirira. (Mucumaeri 7:12) Asi irona rinotingwajazve kuti, mare asipi ciro catinoda kuti tive vandhu vakadakara. Ngo kudaro, Bhaibheri rinotingwaja kuti atidikani kuda maningi mare ‘asi ngatidakare ngo zvatinazvo.’ (Verenganyi Vahebheru 13:5.) Kudari tikaita kudaro, atizokani-kani ngokuti atina zvinokwana. Cimwenizve, tinozova vanobhasopa pakuita magava. (Mazwi Akangwara 22:7) Kusiyapo izvo, atizowanani no matambujiko anoviiswa ngo kutamba cabutha no kupsaka maningi upfumi.

3. Tingashandisisa kudini mare kuti tibesere vamweni?

Jehovha ndi Mwari anopa. Itusu tinomutevejera kudari tikakovana no vamweni zvatinazvo. (1 Timoti 6:18) Itusu tingaita zvondhozvo ngo kubesera ungano no vanoda kubeswa, maningi-ningi hama jedu jatinonamata najo. Jehovha aabatikani pakuwanda ko zviro zvatinopa, asi pacido cedu cokuda kupa. Kudari tikapa ngo mwoyo wese, tinova vakadakara no kudakajisavo Jehovha.—Verenganyi Mabasa o Vapostori 20:35.

NASANYI KUPSAKISISA

Vonanyi kuti ngenyi zvakanaka kudira basa pa ndau paro no kudakara ngo zvatinazvo.

4. Mashandire amungaita angakuja Jehovha

Ushamwari hwedu na Jehovha hunovoneka pa mavonero atinoita basa. Rijanyi VHIDHIYO, perapo bhuisananyi ngo muvhunjo jinotevera.

VHIDHIYO: Shandiranyi Jehovha ngo Mwoyo Wese (4:39)

Pa vhidhiyo, ngozvapi zvamushamaisa maningi pa mavonero aiita Jasoni basa rake?
Ngo zvapi zvaaita kuti adire basa pa ndau paro?

Verenganyi Vakorose 3:23, 24, perapo bhuisananyi ngo muvhunjo unotevera:

Ngenyi zvinosisira kuva mubati waushoni wo basa?

Basa rinosisira. Asi atidikani kuita kuti basa rive rinosisira maningi kupinda kunamata kwedu Jehovha

5. Tinobesereka ngo kuva vandhu vanodakara ngo zvatinazvo

Vandhu vazinji vanoeja kuunganija mare yakawanda. Asi Bhaibheri rinotivangisa kuti tiite zviro zvakasiyana. Verenganyi 1 Timoti 6:6-8, perapo bhuisananyi ngo muvhunjo unotevera:

Bhaibheri rinotivangisa kuti tiitenyi?

Pikija tino zvishoma, tingava vandhu vakadakara. Rijanyi VHIDHIYO, perapo bhuisananyi ngo muvhunjo unotevera.

VHIDHIYO: “Dakaranyi ngo bzo Munabzo” (3:20)

Pikija vainga no mare shoma, zvicinyi zvakasiya mbhuri iyi yakadakara?

Kudari itusu tino zvakawanda, kureva kuti ticiri kuda zvizinji? Jesu wakazvibhuya ecinanga ngo muezaniso wo ngozi ingavepo. Verenganyi Ruka 12:15-21, perapo bhuisananyi ngo muvhunjo unotevera:

Ngo zvapi zvamajija kuvha ku muezaniso wa Jesu? —Vonanyi vhesi 15.

Verenganyi no kuezanisa Mazwi Akangwara 10:22 na 1 Timoti 6:10. Perapo daviranyi muvhunjo jinotevera:

Ngo zvapi zvamunorangarira kuti zvinosisira maningi? Kuva no ushamwari na Jehovha kana kuva no mare yakawanda? Ngenyi muri kunanga kudaro?
Ngo zvapi zvineso zvingasongana no mundhu anopsakisisa maningi mare?

6. Jehovha anozotipa zvatinoda

Kuneseka ngo pamusoro po mare no basa zvingapsasa gonda redu kuna Jehovha. Rijanyi VHIDHIYO kuti muvone zvatingaita kudari tiri pamugariro wakadari. Perapo bhuisananyi ngo muvhunjo jinotevera.

VHIDHIYO: Jehovha Anozotipa Zvatinoda (6:21)

Pa vhidhiyo, ngo zvapi zvineso zvakasongana no hama iyi?
Ngo zvapi zvayakaita kuti inyise zvineso zvondhozvo?

Verenganyi Mateu 6:25-34, perapo bhuisananyi ngo muvhunjo unotevera:

Ngo zvapi zvinogondeswa ngo Bhaibheri kuna vaya vanodira Jehovha pakutanga?

VANDHU VAMWENI VANOTI: “Inini ndinodikana kushanda ngo simba kuti ndikorondhe mbhuri yangu. Azviiti kuti ndiende kumusongano sumana jese.”

Ngo rapi bhuku ro mu Bhaibheri rinomukhohwesa kuti kudira Jehovha pakutanga mu upenyu hwenyu kwakanaka maningi?

ZVOTAJIJA

Basa no mare zvinodikana maningi, asi nakamwe hako atidi kuti zviro izvi zvitiphingaije pa kushandira kwedu Jehovha.

Kuhwirijira

Ngo zvapi zvingamubesera kuti muve no mavonero akanaka ngo pamusoro po basa?
Ngenyi tinodikana kudakara ngo zviro zvatinazvo?
Mungakhombijisa kudini kuti munothemba cigondiso ca Jehovha cokuti anozotaja vandhu vake?

Cijijo ici capera kujijwa mu

Ejanyi kuita izvi

Kureva kuti imwimwi makamboruza musongano muzinji pa mweji japerari ngo ndava yo basa renyu? Kudari zviri izvona, rangariranyi zvamungaita kuti muitise nane pa shwiro yonayo.

Zvimweni:

Your other goal