CIJIJO 59
Rambanyi Makagondeka Pamunonga Meciteverehwa
Wari uno kana kumbejiyo, Makristu ese anozoteverehwa. Kureva kuti tinodikana kuthya here?
1. Ngenyi tinodikana kuvetera kuteverehwa?
Bhaibheri rinojekesa kuti: “Vese vaya vanoda kurarama mu kujipira kuna Mwari, mukubatana na Kristu Jesu, vanozoteverehwa.” (2 Timoti 3:12) Jesu wakateverehwa ngo kuti aacaiita divi ro nyika ino ya Sathana. Na itusuvo atiite divi ro nyika ino, ngokudaro atishamaisiki kudari vandhu, utongi no zviara zvo manyepo zvikatiteverera.—Johani 15:18, 19.
2. Tingaitisa kudini kuti ticungirire kuteverehwa?
Kuti ticungirire kuteverehwa tinodikana kuvangisa ushamwari hwedu na Jehovha. Ngo kuverenga Bhaibheri, kuita mukumbiro, no kuenda ku musongano nguva jese. Zvese izvi, zvinotibesera kuti tivangise cicunge cedu, pikija teciteverehwa pa mbhuri. Mupostori Pauro wakateverehwa, iyena wakati: “Jehovha ndiyena mubeseri wangu. Andizothyi. Mundhu angandiitenyi?”—Vahebheru 13:6.
Tingaengejera cicunge cedu ngo kucumaera nguva jese. Kucumaera kunotibesera kuthemba Jehovha no kunyisa kuthya. (Mazwi Akangwara 29:25) Kudari tikava vakacunga wari uno, zvinozotibesera kuti tienderere mberi tecicumaira apo utongi paunotiteverera.—1 Vatesaronika 2:2.
3. Zvicinyi zvinoitika kudari tikacungirira kuteverehwa?
Akuna anodakarira kuteverehwa, asi kudari tikacungirira kuteverehwa rutendo hwedu unovanga. Tinozogara phedo na Jehovha ngokuti tinozokwanisa kuvona simba rake, paya patinovona kuti aticakwanisi kucungirira. (Verenganyi Jakobo 1:2-4.) Jehovha anohwajihwa maningi paanotivona tecitambujika, asi anodakara maningi paanotivona tecicungirira. Bhaibheri rinoti: “Asi kudari mukacungirira matambujiko ngokuti muri kuita zvakanaka, izvo zvinodakajisa Mwari.” (1 Pedhru 2:20) Jehovha anotigondisa kutipa upenyu ucikaperi mu nyika icikana kuteverehwa, kuno vese vaya vanocungirira.—Mateu 24:13.
NASANYI KUPSAKISISA
Vonanyi kuti ngenyi zvinokwanisika kuva takagondeka kuna Jehovha, pikija patinoteverehwa no makomborero atinozova nawo.
4. Mungakwanisa kucungirira pamunoteverehwa ngo vo pa mbhuri
Jesu waizviziva kuti asipi vese vo pa mbhuri vaizodakarira mundhu anoshandira Jehovha. Verenganyi Mateu 10:34-36, perapo bhuisananyi ngo muvhunjo unotevera:
-
Ngozvapi zvingaitika kudari umwe wo pa mbhuri akakheta kushandira Jehovha?
Kuitira kuvona muezaniso, rijanyi VHIDHIYO, perapo bhuisananyi ngo muvhunjo unotevera.
-
Maizoitenyi kudari ukama kana shamwari ikatama kuda kushandira Jehovha?
Verenganyi Nduyo 27:10 na Marko 10:29, 30. Pasure po kuverenga vhesi iji, bhuisananyi ngo muvhunjo unotevera:
-
Cigondiso ici cingamubesera kudini pamunonga meciteverehwa ngo ukama kana shamwari?
5. Endereranyi mberi mecishandira Jehovha pikija no kuteverehwa
Tinodikana kuva takacunga apo vandhu pavanoeja kutirambisa kushandira Jehovha. Rijanyi VHIDHIYO, perapo bhuisananyi ngo muvhunjo unotevera.
-
Muezaniso jiri pa vhidhiyo iyi, jinovangisa kudini rutendo hwenyu?
Verenganyi Mabasa o Vapostori 5:27-29 na Vahebheru 10:24, 25. Pakupera kuverenga vhesi iji, bhuisananyi ngo muvhunjo unotevera:
-
Ngenyi zvinosisira kuenderera mberi tecishandira Jehovha pikija kuti basa ro kucumaera no musongano zvikarambiswa ngo utongi?
6. Jehovha anozomubesera
Zvapupu zva Jehovha zvo ndanga jakasiyana-siyana, zvinoenderera mberi zvecishandira Jehovha pikija no kuteverehwa. Kuti muvone zvakabesera hama iji, rijanyi VHIDHIYO. Perapo bhuisananyi ngo muvhunjo unotevera.
-
Inga zvotavona pa vhidhiyo, zvicinyi zvakabesera hama iji kuti jicungirire?
Verenganyi Varoma 8:35, 37-39 na Vafiripi 4:13. Pa kupera kuverenga vhesi imwe na imwe, bhuisananyi ngo muvhunjo unotevera:
-
Vhesi iji jingavangisa kudini rutendo hwedu apo patinosotana no muejo?
Verenganyi Mateu 5:10-12, perapo bhuisananyi ngo muvhunjo unotevera:
-
Ngenyi mungadakara pikija meciteverehwa?
Zvapupu zva Jehovha zvakawanda zvakacungirira kuteverehwa. Naimwimwivo mungacungirira!
VANDHU VAMWENI VANOTI: “Inini andicaizocungirira kuteverehwa.”
-
Vhesi yapi yamaizoshandisa kuti mubesere mundhuwo kuti ave wakacunga?
ZVOTAJIJA
Jehovha anoreremeja maningi kushandira kwatinomuita pikija teciteverehwa. Ngo besero rake, tinozokwanisa kucungirira.
Kuhwirijira
-
Ngenyi Makristu anodikana kuvetera kuteverehwa?
-
Zvicinyi zvamungaita wari kuti mujinasirire apo pamunozoteverehwa?
-
Zvicinyi zvingamubesera kuti muve makathemba kuti mungashandira Jehovha pikija no muejo jakawanda?
ZIVANYI ZVIMWENI
Vonanyi kuti Jehovha wakabesera kudini hama imweni kucungirira, poyakadihwa mukadheya ngo kutama kunghwinira mu zvomatongehwe o nyika.
Vonanyi zvakabesera varovorani vamweni kuti vashandire Jehovha ko makore akawanda pikija no kuteverehwa.
Vonanyi kuti mungavisa kudini makacunga pamunoteverehwa.
“Jinasirirenyi Wari Kuitira Kuteverehwa” (Murindiri, wa Julho wo 2019)
Vonanyi kuti ngenyi atidikani kushamaisika patinoteverehwa ngo mbhuri, vonanyizve kuti mungavisa kudini no runyararo pomwe no kugondeka kudari izvo zvikaitika
“Cokwadi Cinoviisa, ‘Haiwa Runyararo, Kaveta Banga’” (Murindiri, wa Outubro wo 2017)
