IVANYI NO GWINYISO ro kuti Jehovha nguva jese acazova aripo kuitira kumuashira pa munohwirira kwaari. Iyena acamubesera kuhwisana no kuthimwa-thimwa, mazwiro okuhwajihwa, zve kuwana runyararo wo mu murangariro no wo mu mwoyo ngo kuva no hana yakacena. Perepo, imwimwi mungakwanisazve kukwevejehwa kuti mushandire Jehovha pamwepo no vanamati doni. Mugariro wenyu ucazova wakaezana no wo maKristu amweni o mu zana ro kutanga ro makore, awo akatarihwa ndi mupostori Pedru kuti: “Mainga makaparajika inga mabvuta. Kaveta wari makahwirira ku muhavisi no murindiri wo mwiha yenyu.”—1 Pedru 2:25.

Kuhwirira kuna Jehovha i ciro cinosisira maningi camungaita. Ngenyi? Ngo kuti munozodakajisa mwoyo wa Jehovha. (Mazwi Akangwara 27:11) Inga zvomunoziva, Jehovha ano mazwiro ake, ngo kudaro zviito zvedo zvinomupsasa. Zvokadi kuti Jehovha aativangirij kuti timude no kumushandira. (Deuteronòmio 30:19, 20) Mumwe mupsakisisi wo zvo muBhaibheri wakati: “Apana angamuzaurira mwoyo wenyu. Munodikana kuzviita mwega.” Ngo kunamata Jehovha ngo mwoyo wakazara ngo rudo, itusu tingasana kuzaura mwoyo wedu. Ngo kudaro iyena wakatipekeja cipo cinosisira maningi—kugondeka kwedu—zve kuwana mudakaro wakakura unovha mu mwoyo. Zvokadi kuti akuna cinoezaniswa no mudakaro ungavepo pa kupa Jehovha kunamata kwaanofanira.—Maitiro o Vapostori 20:35; Apokalipsi 4:11.

Pamusoro pa zvese, mukamusijira kunamata kwenyu ko ciKristu, zvinodiwa zvenyu zvo kumujimu zvinogutiswa. (Mateu 5:3, NM) Ngo maitiro api? Kutenderera pasi pese vandhu vanozvibvunjisa kudari: “Ngenyi tiripo?” Ivona vano njara yo mupinguro jo mubvunjo ngo pamusoro po cinangwa co upenyu. Vandhu vano cido condhoco ngo kuti Jehovha wakavarura naco. Iyena wakatiita kuti tiwane mudakaro ngo kumushandira. Apana cinoviisa mudakaro kupinda kuziva kuti tiri kunamata Jehovha ngo kuti tinomuda.—Nduyo 63:2-6.

Tapota zivanyi kuti Jehovha anoda kuti muhwirire kwaari. Mungava kudini no gwinyiso? Rangariranyi basi: Bhurushura iri rakanasirihwa pakupera ko mukumbiro muzinji. Rakaviiswa kwamuri, kangaije ngo umwe Mukuru wo ciKristu kana mutendi doni. Perepo imwimwi mwakava no cido co kuriverenga no kutendera masoko aro. Zvese izvi i civoniso co kuti Jehovha aazivi kumukanganwa. Mukusiana, iyena no kunaka mwoyo kwese ari kumukwevera kuti muhwirire kwaari.—Johani 6:44.

Tingathondojwa ngo kuziva kuti Jehovha aazokanganwi vashandiri vake. Izvi ndizvona zvakazobongesera imwe hambzaji inodanijwa Donna. Iyona yakananga kudari: “Padoko ngo padoko ndakatanga kupauka mu cokwadi, asi nguva zinji ndairangarija masoko anowanika pana Nduyo 139:23, 24 awo anoti: ‘Ndipoporenyi, Mwari, zivanyi mwoyo wangu! Ndiejenyi, zivanyi murangarijo yangu! Vonanyi kudari ndinoenda mu gwanja ro rufu, ndisesejenyi mu gwanja ricikaperi.’ Ndaizviziva kuti andicainga wo nyika—narini andicaizokwanirana nayo—zve ndaizviziva kuti ndaidikana kuva ndiri mu sangano ra Jehovha. Ndakatanga kuvona kuti, Jehovha aazivi kumbondisiazve, zvandaidikana kuita basi i kupsaka gwanja ro kuhwirira kwaari. Zve wari ndakadakara maningi ngo kuziva kuti ngozvondakaita.”

Mukumbiro wedu wo mwoyo wese ngo wokuti muhwirirezve ku ‘mudakaro wa [Jehovha].’ (Neemia 8:10) Imwimwi amuzozvivazi ngo ku hwirira kuna Jehovha.