DIVI RO CIRONGOMUNA
Kujipa Ndava
“Basa rangu ibza rakaitisa kuti mararamire o mbhuri yedu aite nane, asi raindiita kuti ndiite mukhaindi wese wo mabasa acikanasi kuzwirana no ciKristu. Ndakatanga kuceukija njiku jinoreremejwa mu nyika, kutora rutivi mu shwiro jo zvo matongehwe o nyika, zve pikija kutoendavo ku ceci. Ndakaima kuita basa inga umwe wo Zvapupu zva Jehovha ko makore 40. Nguva payainga yecidarika, inini ndaikurisa murangariro wo kuti Jehovha aacaizondiregererazve. Ndaijizwa kuti andicaizokwanisa kujiregerera ndega. Kupinda zvese, ndakawana cokwadi ndicito ndawira mu gwanja rakashata.”
KUJIPA NDAVA kungava muthwaro unorema. Mambo Dhavhidhi wakatara kudari: “Bzakaxata bzangu bzinofukija musoro wangu; bzinondiremera inga muthwaro unorema.” (Nduyo 38:4) MaKristu amweni anoguma pakukurihwa ngo kusuruvara, ecikhohwa kamare kuti Jehovha aazombovaregererizve. (2 VaKorinto 2:7) Mavonero aya akarungama here here? Kunyazi makaita zvishaishi zvikuru, zvingareva kuti muri ndhambo maningi na Jehovha zvokuti aazombomuregererizve here? Haiwa!
‘Vianyi Tibhuye’
Jehovha aazosiyi vashaishi vanokhauya. Zvokadi kamare, iyena anovapsaka! Mu ndhorovondho yo mwana mupanduki, Jesu wakaezanisa Jehovha na baba vano rudo avo vainga no mwana wavo wakasia mbhuri yake zve wotevera upenyu hwakashata. Ngo kufamba ko nguva, iyena wakatema civaringo co kuhwirira kumuzi. “[Mwana wavo] wainga aciri ndhambo, baba vakamuvona, muviri wakafambirana, vogogoma komutandamija, vomubata mu musipa vomumpsompsa kamare.” (Luka 15:11-20) Pamunoda kukhwedera phedo na Jehovha, munojizwa inga kuti mucindori “ndhambo” nae here? Mukufanana na baba vo pa muezaniso wa Jesu, Jehovha anomuzwira unyasha. Iyena ano cidisiso cakakura co kuda kumuashirazve.
Asi zvakadini kudari mecidavira kuti zvishaishi zvenyu zvikuru maningi kana kuti zvakawanda maningi kuti Jehovha amuregerere? Tapota vonanyi mukoka wa Jehovha uri pana Isaia 1:18, panoti: “‘Eya, vianyi, ngatibhuye’ anonanga [Jehovha]: Nokunyati bzixaixi bzenyu bzikapsuka inga udothwe hwo mukurambira, bzinozocena inga thonje.” Hina, kunyazi zvishaishi zvakadari inga dondhwe ro mukurambira riri pa nguvo yakacena Jehovha anozviregerera.
Jehovha aadi kuti murambe mucitambujika ngo kuva no hana inojipa ndava. Zvino, mungawanisa kudini rusujunuko unoviiswa ngo kuregerehwa ndi Mwari zve kuva no hana yakacena? Vonanyi mudanyu muviri jakaitwa ndi Mambo Dhavhidhi. Cokutanga, iyena wakati: “Ndinoenda kuna [Jehovha] Mwari kodekeca kuxata kwangu.” (Nduyo 32:5) Rangariranyi basi, Jehovha wapera kumukoka kuti mukhwedere kwaari ngo mukumbiro zve kuitira ‘kunasirira zviro’ nae. Tenderanyi mukoka uwu. Dekecanyi zvishaishi zvenyu kuna Jehovha, zve muvonesenyi mazwiro enyu. Kubvira kuzvakamuitikira, Dhavhidhi wakaita mukumbiro no kunyinda kwese eciti: “Ndicenesenyi uxati hwangu. . . . Mwari, mucanyenya mwoyo wakaphwanya-phwanywa.”
Cocipiri, Dhavhidhi wakaashira besero rakabva ku muphorofita Natani, uwo wakagajwa ndi Mwari. (2 Samueli 12:13) Nyamasi uno, Jehovha wakatipa vakuru mu ungano avo vakarovejwa kuti vabesere vashaishi vanokhauya kuti vamusijire ushamwari hwavo na Jehovha. Pamunokhwederera vakuru, ivona vanozoshandisa Matahwa zve kuita mukumbiro wo mwoyo wese kuitira kunyaraja mwoyo wenyu, kuti mubvise murangariro jicikabeseri, zve kumubesera kuti murapike kumujimu.
Jehovha anoda kuti muve no rusujunuko unoviiswa ngo kuva no hana yakacena
“Anomucena Wiya Wakakungurihwa Uxaixi”
Ndizvonadi kuti, imwimwi mungazwa kuti kudekeca zvishaishi zvenyu kuna Jehovha Mwari zve kukhwederera vakuru, caizova cimwe co zviro zvaizomunesera maningi kuita. Dhavhidhi wakavavo no mazwiro ondhowo. Iyena wakaramba “wakanyarara” ko nguva yakatikuti pasure po kuita zvishaishi. (Nduyo 32:3) Asi, pasure pazvo, iyena wakakwanisa kuwana mabesero o kudekeca zvishaishi zvake no kurungamisa mufambiro wake.
Besero guru rakava na Dhavhidhi ngo ro kuwanazve mudakaro wake. Iyena wakatara kuti: “Anomucena wiya wakakungurihwa uxaixi.” (Nduyo 32:1) Wakakumbirazve aciti: “[Jehovha], xamisanyi muromo wangu, rurimi hwangu hunozotokotesa kusimbhwa kwenyu.” (Nduyo 51:15) Kusujunuka ka Dhavhidhi pa kujipa ndava no kubongesera kwake ngo pamusoro po kuregerehwa ndi Mwari, zvakakwevera Dhavhidhi kuti abhuye no vamweni ngo pamusoro pa Jehovha.
Jehovha anoda kuti muve no rusujunuko unoviiswa ngo kuva no hana yakacena. Anoda kuti mubvunje vamweni ngo pamusoro pake no cidisiso cake, haiwa no mazwiro o kujipa ndava, asi zvecibva pa mwoyo kamare zve no mudakaro mukuru. (Nduyo 65:2-5) Ceujanyi kuti iyena wakamukoka “kuti zvishaishi zvenyu zvipfujuhwe kuti nguva jo kuvangiswa jize jicibva kuna iyena Jehovha.”
Ndizvona zvakaitika kuna Martha. Iyena wakati: “Mwana wangu worume wakaramba acinditumira marevhista Murindiri no Despertai!. Padoko ngo padoko, ndakatangazve kuzivana na Jehovha. Divi rakanesa maningi kuti ndihwirirezve rakava ro kukumbira ruregerero hwo zvishaishi zvese zvandakaita. Asi pakupejisira, ndakatanga kukhwederera Mwari ngo mukumbiro ndecimukumbira kuti andiregerere. Zvinonesa kutenda kuti pakapera 40 o makore kuti ndihwirirezve kuna Jehovha. Zvakaitika kwandiri, zvinokhombija kuti pikija papere makore mazinji, mundhu angapuwazve mukana umweni wo kushandira Jehovha no kuhwirirazve ku rudo hwake.”
