MUKUPHINDA no kuphinda, Jehovha anoezaniswa no muhavisi. Mu Soko rake, iyena anotigondisa kuti: “Inini kamare ndinozokorondha muxambi wangu ndozoupsaka.”—Ezekieli 34:11, 12.

Mabvuta a Jehovha ngo api? Ngo magama mashoma, mabvuta a Jehovha ndi vandhu vanomuda zve vanomunamata. Bhaibheri rinoti: “Nghwinanyi, gwadamanyi, pfukamanyi pambeji pa [Jehovha] Mwari wakatirura! Hina, ndiye Mwari wedu; itisu tiri vandhu vanohaviswa ndiyena, muxambi wakasesejwa ngo nyara yake.” (Nduyo 95:6, 7) Mukufanana no mabvuta kamare, vanamati va Jehovha vanodisisa kutevera Muhavisi wavo. Kureva kuti avasvejeki here? Vanosvejeka. Nguva jimweni, vashandiri va Mwari, vanoguma pa kuva “mabvuta ake akaparajika,” “Mabvuta akapsejeka” zve kuguma pa kuva ‘akaparija inga mabvuta.’ (Ezekieli 34:12; Mateu 15:24; 1 Pedru 2:25) Pikija zvakadaro, mundhu paanopauka, Jehovha aamusiyi acina vetero.

 Imwimwi munovona kuti Jehovha aciri Muhavisi wenyu here? Jehovha anovonesa kudini kuva Muhavisi nyamasi uno? Ngativone maitiro matatu:

Iyena anotihisa ku mujimu. Jehovha wakananga kudari: “Ndinozomahavisa mu mahavo akanaka . . . Anozozororeyo mu mahavo akanaka, ozowana ndhonve yakanaka.” (Ezekieli 34:14) Jehovha aamboposi kutipa cokuha co kumujimu cinovangisa pa nguva kwayo. Mungarangarira ngo pamusoro po cijijo, hurukuro, kana vhidhio yakadavira mukumbiro omwakaita mecikumbira besero here? Zvondhozvo azvizivi kumukhohwesa kuti Jehovha ari kumukorondha pacenyu kamare here?

Iyena anotijivirira no kutisapota. Jehovha wakagondisa kudari: “Ndozoviisa rakabuda mu gwanja, ndozorapa rakakhuvazwa, ndozovangisa rakaremba.” (Ezekieli 34:16) Jehovha anovangisa vaya vakaremba kana vanonyiswa ngo kuthimwa-thimwa. Iyena anobhandica mabvuta ake, omabesera kuti arapike kudari akakhuvazwa—kangaije ngo vatendi doni. Zve iyena anoviisazve ayana akapauka zve ari kuhwisana no murangariro ucikabeseri.

Iyena anoda kutivonerera. Jehovha wakati: ‘Ndozomakwengweneja mu ndau jese jaakaparajika.” Wotizve: “Ndinozopsaka bvuta rakapsejeka.” (Ezekieli 34:12, 16) Kuna Jehovha, kusvejeka ko bvuta akuzivi kudari inga kusvejeka ko kumwa. Iyena anoziva kuti ngo papi parinonga rasvejeka, zve anodakara paanoriwana. (Mateu 18:12-14) Pamusoro pa zvese, iyena anodanija mabvuta ake ocokwadi kuti: “mabvuta angu, muri muxambi wangu.” (Ezekieli 34:31) Imwimwi muri umwe wo mabvuta ondhowo.

Ngenyi Jehovha anomupsaka zve womukoka kuti muhwirire kwaari? Ngokuti anoda kuti mudakare. Iyena wakagondisa kuti ‘makomborero acazona inga nvura’ kuno mabvuta ake. (Ezekieli 34:26, Tradução do Novo Mundo) Ici asipi cigondisovo haco comahara. Imwimwi mwakambozvivona ngo majiso enyu kamare.

Munoceukija pomwakaguma pa kuziva Jehovha. Inga muezaniso, mwakazwa kudini pomwakatanga kujija zvokadi ngo pamusoro po zina ra Mwari no cidisiso cake kuno vandhu vake? Mucaceukija kuvangiswa komaiwana po mwaiva pamwepo no maKristu doni pa magungano? Pamaikwanisa kukovana masoko akanaka no ari wese waikhombija kudakarira ko kadi-kadi, amucaihwirira ku muzi mwakadakara maningi here?

Imwimwi mungavazve no mudakaro wondhowo. Vashandiri va Mwari vo kareko vakaita mukumbiro wokuti: ‘Titenderujenyi kwamuri, A Jehovha, nesu tinozotenderukavo, musijiranyi mazuva edu kuti adari inga okare.’ (Macumbiro 5:21, Baiberi Mazwi Akacena aMwari) Jehovha wakadavira mukumbiro uwu, zve vandhu vake vakahwirira ko mushandira vakadakarazve. (Neemia 8:17) Jehovha acazoitavo zvimwezvo kwamuri.

Kunyazi zvakadaro, kuhwirira kuna Jehovha kwakareruka kukunanga asi kunonesa kukuita. Ngativone zvineso zvimweni zvinovepo pa kuda kuhwirira kuna Jehovha zve mungazvinyisisa kudini.