KUTHIMWA-THIMWA kunobata ari wese—pikija vandhu va Mwari. Mutari wo Nduyo wakatara kudari: “Kuthimwa-thimwa kunoengejeka kondiri.” (Nduyo 94:19) Zve Jesu wakananga kuti mukati mo njiku jo kupejisira, “kuthimwa-thimwa” mu upenyu kwaizova cineso cikuru maningi kuno vashandiri va Jehovha. (Luka 21:34) Munotivo kudini? Munojizwavo mecinyiswa ngo cineso co kutama mare, zvineso zvo pa mbhuri, kana kuneseka ngo uhomi? Jehovha angamubesera kudini kuti muhwisane no shwiro iji?

Itusu atingakwanisi kuhwisana no kuthimwa-thimwa tega. Mupostori Pauro wakatara kudari: ‘Tinovangirijwa ngo maitiro ese;  . .  tinobviringijika.’ Asi, iyena wakanangazve kuti: ‘ativangirijwi zvo kukonehwa kufamba,’ ‘haiwa zvokutama pokubuda ndipona kamare’ zve ‘atiparajwi.’ Zvicinyi zvinotibesera kucungirira? ‘Simba rinopinda ro nguva jese’—simba rinobva kuna Mwari wedu mukuru-kuru, Jehovha.—2 VaKorinto 4:7-9, NM.

Rangariranyi ngo pamusoro po maashirire amaiita ‘simba rinopinda ro nguva jese’ kareko. Mucaceukija imwe hurukuro inovangisa yakaengejera kubongesea kwenyu ngo pamusoro po rudo hwa katendeseka hwa Jehovha here? Gonda renyu ngo pamusoro po zvingondiso zva Jehovha raivangiswa pomwaijijisa vamweni ngo pamusoro po vetero yo Paradhiso here? Patinonga tiri pa musongano jo ciKristu tecikovana gonda redu no vamweni, tinoashira simba kuti ticungirire pakuthimwa-thimwa mu upenyu zve tinowana runyararo wo mu murangariro ngo kudaro tinokwanisa kushandira Jehovha no mudakaro.

I zvokadi kuti imwimwi mungajizwa mecikhandihwa ku mativi akasiana-siana pa nguva imweyo. Inga muezaniso, Jehovha anotikumbira kuti tipsake pa kutanga Umambo no kuramba tino urongwa hwo mabasa o kumujimu. (Mateu 6:33; Luka 13:24) Asi, tingati kudini, kudari cineso co uhomi kana zvineso zvo pa mbhuri zviri kumusia mucikacizivi co kuita? Tingati kudini, kudari basa renyu ro kunyama riri kumupejera nguva no simba, izvo zvomaizopeja no ungano? Pakuhwisana no zviro zvese izvo zvakasota imwimwi—no muno simba no nguva shoma kuti muzviite—mungajizwa kunyiswa. Mungatorangarira kuti Jehovha ari kuvetera zvizinji kwamuri.

Jehovha anozwisisa zvondhozvo. Iyena aaveteri zvizinji kupinda zvatingakwanisa kumupa. Zve iyena anozviziva kuti kumusijirika ku zvineso zvo kunyama no zvo mu murangariro zvinotora nguva.—Nduyo 103:13, 14.

Inga muezaniso, rangariranyi kuti Jehovha wakakhorondhesa kudini mu phorofita Erija. Erija wakaguma pakupera simba no kuthya wotizira mu zvipare, kureva kuti Jehovha wakavereketera muphorofita uwu zve omubvunja kuti ahwirire ku basa raakagajwa here? Haiwa. Kaviri Jehovha wakatumira ngirozi kwenda koomusa Erija, ngo maitiro akapfava zve kumupa zvokuha. Pikija zvakadaro, pakapera 40 o njiku, Erija ecithimwa-thimwa  no kundothya basi. Zvicinyi zvaakaitazve Jehovha kuitira kumubesera? Cokutanga, Jehovha wakamukhombija kuti waikwanisa kumujivirira. Cocipiri, Jehovha wakathondoja ngo “izwi [“rakathiva, rainga pasi pasi,” NM.]” Pakupejisira, Jehovha wakavonesa kuti kwainga no mazana o vamweni vainamata Mwari vakagondeka. Pa nguva shomani, Erija wainga amukazve kuva muphorofita anovangisira. (1 Majimambo 19:1-19) Tinojijenyi? Erija paakanyiswa ngo kuthimwa-thimwa, Jehovha wakamubata no kusengerera pomwe no unyasha. Jehovha aazivi kucinja. Iyena anotitaja ngo maitiro ondhowo kamare.

Pamunorangarira ngo pamusoro po zvamungapa Jehovha, vonanyi zvamunokwanisa kamare. Mucadoezanisira zvamungaita wari uno no zvomwaiita kareko. Inga muezaniso: Mugogomi anoima kujiroveja pa mweji kana makore akawanda, aangakwanisi kuhwirira ku urongwa hwake ngo zuva rimwe basi. Kusiapo izvo, iyena anotanga padoko ngo padoko wozoguma pa kuwana simba zve kuvanga. MaKristu akadari inga vagogomi. Ivona vanojiroveja no cinangwa cakajeka kamare mu murangariro mwavo. (1 VaKorinto 9:24-27) Ngenyi amupsaki kudadamira cido camunovona kuti munokwanisa kucigumira wari uno? Inga muezaniso, mungadadamira cido co kupinda musongano jo ungano. Kumbiranyi Jehovha kuti amubesere kugumira cido cenyu. Pamunonga mecimusijirazve simba ro kumujimu, imwimwi ‘munozoeja movona unaki hwa [Jehovha].’ (Nduyo 34:8) Ceujanyi kuti ciri cese camunoita kuti muvonese rudo hwenyu kuna Jehovha—pikija civoniwe kuva cidoko zvakadini—cinosisira maningi kwaari.—Luka 21:1-4.

Jehovha wakapekejesa kudini simba June kuti ahwirire kwaari? Iyena wakananga kudari: “Ndakaramba ndeciita mukumbiro kuna Jehovha, kuti andibesere. Perepo nyamwana yangu yakandizivisa kuti mu dhorobha rangu mwaizoitwa gungano. Ndakatema civaringo co kwenda ku njiku imwe yo gungano. Mudakaro wakadini wandakava nawo ngo kuhwirirazve ku vandhu va Jehovha! Gungano rondhoro rakava besero randainga ndecivetera. Wari uno, ndino mudakaro wo kushandirazve Jehovha. Upenyu waanazve cinangwa kwandiri. Wari, ndozviziva kuti andidikani kujipaura kana kuti kueja kujibesera ndega. Ndinobonga maningi ngo kuziva kuti kwainga kucino nguva kuti ndihwirire.”