1-6. Ipanyi muezaniso wo Zvapupu zva Jehovha zvinocumaera mu mugariro jakasiyana.

 MUSIKANE umweni anozwi Rabheka, ari Capupu ca Jehovha co ku Gana, wakavona kucikora kwake inga ndima yake yo kucumaera. Iyena nguva jese waitora marevhista edu no mabhuku paaienda kucikora. Panguva yo kuzorora, waipsaka mukana kuti ape ucapupu ku vadoni vake. Rabheka wakatotangisa jijo jakawanda no vadoni vakevo.

² Kucirundu co Madhagaskari phedo no kumavhazuva ko Afrika, varovorani vamweni vari mapiyona vaifamba makiromita anokwana 25 vecipiswa ngo zuva. Ivona vaifamba mumango wondhowo ngokuti vaida kwenda koitisa jijo jo Bhaibheri ku vandhu vayana vanodakarira.

³ Kuti vakwanise kubhuya no vandhu vanogara phedo no jombe ro Paragwayi no ro Paranaa, Zvapupu zva Jehovha zvo ku Paragwayi no hama no hambzaji jimweni jaivha ku nyika jinokwana kuita 15, vakashanda vese kuti vavake ngarava yainga no mametro anokwana kuita 130. Ngarava yaikwana vandhu vanokwana kuita 12. Vecishandisa ngarava iyi, hama no hambzaji jedu jakacumaera masoko akanaka ku ndau jokuti jaizonesa kugumeyo.

⁴ Ku divi ro Kanjikazi, Zvapupu zva Jehovha zvo ku Araska zvaishandisa mukana wajinawo kuti vacumaere pa mukuvo wo kupisa. Zvecivoneka kuti pamukuvo uwu kwainga kwecipisa maningi, mapiketi aiviya akazara ngo vandhu vo nyika jakasiyana-siyana. Ngo kudaro, Zvapupu zva Jehovha zvaigara phedo no ndau iji, vaiviya no mabhuku akawanda o ndumi jakasiana-siyana. Hama iji jo ku Araska jakavonazve kuti zvaizobesera maningi kushandisa ndeki kuti vaende ku ndau jokuti jaizonesa maningi kujiguma, zvoita kuti masoko akanaka acumaerehwevo ku Vaaraute, Atapaska, Thimishini, Tiringiti.

⁵ Hama Larry, vo ku Estadhus Unidhos, vaigara pa nyumba inogahwa ngo vasharuka, vaicumaera panyumba yavaigararo. Pikija kuti  ivona vaifamba ngo kadera yo marodha ngo ndava yo asidhenti yakaitika, ivona vairamba vakabatikana. Vaicumaera masoko o Umambo ku vamweni, kubatanijavo no vetero yavo yo kuti kumbejiyo vaizofambazve apo Umambo hwa Mwari pa unozotanga kutonga.—Is. 35:5, 6.

⁶ Kuti vaende ku gungano, Zvapupu zva Jehovha zvo ku Mandarayi, vakapeja njiku ndhatu vari mu ngarava, kuti vagume kanjikazi ko Miyamari. Kuti vakwanise kucumaera masoko akanaka, ivona vakatora mabhuku vomapavo ku vamweni vainga mukatimo. Ngarava payaiima mudhorobha kana mu ndharaundha iri yese kuti ibzuse vandhu, vacumaeri ava vaibzukavo votanga kucumaera vandhu vanogara mundharaundha yondhoyo. Asi pasure po mukuvo munganani, vandhu vamweni vaiviyavo kokhwira ngarava iyi, ngo kudaro vacumaeri ava pavaiviyazve mu ngarava vaitanga kucumaera vandhu vondhovo vapakiraro.

7. Vashandiri va Jehovha vanoshandisa njira japi kuti vacumaere masoko akanaka ngo pamusoro po Umambo hwa Mwari, ngocapi cinangwa cavo?

⁷ Inga hama no hambzaji janangwari, vanamati va Jehovha mu nyika yese vanovangisira maningi kuti vape “ucapupu hwakaperera ngo pamusoro po Umambo hwa Mwari.” (Mab. 28:23) Ivona vanocumaera muzi ngo muzi, mu makwanja, ngo karata kana vecitoshandisa foni. Vanocumaera pavanonga vari mu mashibhombho, vecipasiyari kana panguva yo kuzorora ku basa. Ivona nguva jese vakanasiririka kuti vacumaere ngo pamusoro po masoko akanaka o Umambo hwa Mwari, pese pavanowana mukana. Manera avanocumaera angasiyana, asi vese vano cinangwa condhoco, co kucumaera masoko akanaka kuri kwese kunowanika vandhu.—Mat. 10:11.

8, 9. (a) Ngenyi kukura kuri kuita basa ro kucumaera masoko akanaka o Umambo kunoshamaisa? (b)  Izvi zvinomusa muvhunjo wapi unosisira maningi, tinodikana kuitenyi kuti tiwane mupinguro?

⁸ Kureva kuti imwimwi muri kuverengari bhuku iri, munoitavo divi pa cikwata ici co vacumaeri vo Umambo vari munyika jinopindirija 235? Kudari munoitavo divi, muri kubesera maningi kamare kuti basa iri ro kucumaera masoko akanaka o Umambo rienderere mberi recikura. Zvakaitwa mu basa ro kucumaera munyika yese mbhera wari zvinoshamaisa maningi. Pikija no zvineso zvakakura zvavari kusongana nazvo, zvakadari inga kurambiswa ngo utongi kana kutoteverehwa, Zvapupu zva Jehovha zviri kupa ucapupu hwakaperera ngo pamusoro po Umambo hwa Mwari ku vandhu vo manjija ese.

⁹ Izvi zvinomusa muvhunjo unosisira maningi, wokuti: Ngenyi zvineso zvese izvi kubatanijavo no kuteverehwa kuri kuviiswa ndi  Sathana akukwanisi kuimisa basa ro kucumaera masoko akanaka o Umambo? Kuti tidavire muvhunjo uwu, tinodikana kuvona zvakaitika mu zana ro kutanga ro makore. Ngokuti basa ratinoitari inga Zvapupu zva Jehovha, rakatanga mu nguva yondhoyo kamare.

10. Jesu waibatikana pa basa rapi, ngozvapi zvaaiziva ngo pamusoro po basa iri?

¹⁰ Jesu Kristu, uwo wakatangisa ungano yo Cikristu, wakabatikana maningi pa basa ro kucumaera masoko akanaka o Umambo hwa Mwari ngokuti raisisira maningi kwaari. Pa vhaza imweni Jesu wakati: “Ndinodikanavo kuzivisa masoko akanaka o Umambo hwa Mwari ku madhorobha amweni, ngokuti ndizvona zvondakatumihwa.” (Ruk. 4:43) Jesu waizviziva kuti wainga ecitangisa basa ro kuti iyena aacaizorikwanisa kuripeja ega. Pa mukuvo mushoma acito afa, iyena wakananga kuti masoko aya o Umambo aizocumaehwa “ku majinja ese.” (Mar. 13:10) Raizoitiswa kudini basa iri, i ndiyani waizoriita?

11. Jesu wakapa basa rapi ku vateveri vake, ivona vaizova no besero raani?

¹¹ Pasure po kufa no kumuswa kwake, Jesu wakagumira vajiji vake ovapa basa iri rinosisira: “Ngo kudaro, endanyi, jijisanyi vandhu vo majinja ese kuti vave vateveri vangu, muvabhabhatije ngo zina ra Baba, ro Mwana no ro mujimu mucena. Vajijisenyi kuzwira zvese zvandakamuvhunja. Zivanyi kuti ndina imwimwi mbhera pa kupera ko nyika.” (Mat. 28:19, 20) Masoko o kuti “ndina imwimwi” aivonesa kuti vateveri va Jesu vaizova no besero rake pavanonga veciita basa iri ro kucumaera no kuita vajiji. Ivona vaida besero iri, ngokuti Jesu wainga wakavavhunja kudari, “munozonyenywa ngo majinja ese.” (Mat. 24:9) Asi vajiji vaizothembazve besero rimweni. Pamukuvo mushoma acito ahwirira kudenga, Jesu wakavavhunja kuti ivona vaizovangiswa ngo mujimu mucena, kuti vave Zvapupu zvake “mbhera ku ndau jiri ndhambo jo pasi pano.”—Mab. 1:8.

12. Muvhunjo japi jinomuka, ngenyi zvaizova zvaushoni maningi kuwana mupinguro jakona?

¹² Wari kunomuka muvhunjo munganani jinosisira: Vapostori va Jesu no vateveri vamweni vo muzana ro kutanga ro makore, vakabatikanadi pa basa iri? Kureva kuti cikwata ici caingari cakadodoka caiumbwa ngo vanarume no vanakaji, cakapadi ucapupu hwakaperera ngo pamusoro po Umambo hwa Mwari pikija povainga veciteverehwa? Ivona vakaashiradi besero ra Jesu no mujimu mucena wa Jehovha pavainga veciita basa iri rokuita vajiji? Muvhunjo iji no jimweni jinozodavihwa mu bhuku ra Mabasa o Vapostori. Zvaushoni maningi kuwana  mupinguro jakona. Ngenyi? Inga zvakanangwa ndi Jesu, basa iri raakatangisari raizoenderera mberi “mbhera pa kupera ko nyika.” Ngo kudaro, Makristu ese kubatanijavo itusu tiri kuponari mu njiku jo kupejisira, taizodikanavo kuitavo basa iri. Izvi ndizvona zvinoiitisa kuti itusu tidakarire maningi zvakatahwari mu bhuku iri ra Mabasa o Vapostori o Vapostori.

13, 14. (a) Ndiyani wakatara bhuku ra Mabasa o Vapostori, wakamawanisa kudini masoko aakatara? (b) Ngozvapi zvinonangwa mu bhuku ra Mabasa o Vapostori?

¹³ Ndiyani wakatara bhuku ra Mabasa o Vapostori? Bhaibheri arinangi kuti ndiyani wakaritara, asi masoko aro okutanga anovonesa kuti irona rakatahwa ngo mundhu wondhowo wakatara bhuku ra Ruka. (Ruk. 1:1-4; Mab. 1:1, 2) Ngo kudaro, kuvhira munguva jo kare, Ruka “murapi anodiwa” ndiyena anovoniwa kuti wakatara bhuku ra Mabasa o Vapostori. (Vak. 4:14) Bhuku iri rinobhuya ngo zviro zvakaitika mu makore anokwana kuita 28, kuvhira Jesu naahwirira kudenga mu gore ra 33 mbhera mu gore ra 61, mupostori Pauro acito abudiswa mukadheya ku Roma. Ruka manera akatara bhuku iri, anovonesa kuti iyena waingepovo pa zviitiko zvizinji zvinonangwa mu bhuku iri ra Mabasa o Vapostori. (Mab. 16:8-10; 20:5; 27:1) Zvingaita kuti Ruka waizivikaya ngo kunasa kupsakisisa ushoni, wakawana masoko amweni paainga na Pauro, Bharnabha, Firipi no vamweni vanonangwa mu bhuku iri.

¹⁴ Ngozvapi zvinonangwa mu bhuku ra Mabasa o Vapostori? Pa makore manganani akadarika, paainga ecitara vhangeri rake, Ruka wakatara zvakaitwa no kunangwa ndi Jesu. Asi mu bhuku ra Mabasa o Vapostori, iyena wakatara zvakanangwa no zvakaitwa ngo vateveri va Jesu. Ngo kudaro, bhuku ra Mabasa o Vapostori rinobhuya ngo pamusoro po vandhu vakaita basa rakakura maningi, pikija kuti ivona vaivoniwa kuva vandhu “vacizivi kujija.” (Mab. 4:13) Ngo kugurisira, bhuku iri rinotivhunja manera akaumbwa ungano yo kutanga yo Cikristu no manera ayakaenderera mberi yecikura. Irona rinonangazve manera o vaicumaera Makristu o muzana ro kutanga ro makore no mugariro javo. (Mab. 4:31; 5:42) Rinonangazve manera okuti mujimu mucena wakabesera pa kucumaehwa ko masoko akanaka. (Mab. 8:29, 39, 40; 13:1-3; 16:6; 18:24, 25) Bhuku iri rinovonesazve musoro wo Bhaibheri, uwo unobatanija kuceneswa ko zina ra Mwari pecishandiswa Umambo na Kristu, rinovonesazve kubudirira kwakaitwa pa kucumaehwa ko masoko akanaka pacinenyi no kuteverehwa kwakakura.—Mab. 8:12; 19:8; 28:30, 31.

15. Tinozobesereka kudini ngo kujija bhuku ra Mabasa o Vapostori?

 ¹⁵ Zvokadi kamare, kujija bhuku ra Mabasa o Vapostori zvinodakajisa maningi no kuvangisa rutendo. Kurangarijisisa ngo pamusoro po cicunge no kuvangisira kwakakhombijwa ngo vateveri vo kutanga va Kristu, kunozobaya mwoyo jedu. Tinozovangiswa kuti titevejere rutendo wo hama no hambzaji jedu jo mu zana ro kutanga ro makore. Tinozova takanasiririka kuti tiite basa redu ro “kuita vajiji.” Bhuku ramuri kuverengari, rino cinangwa cokumubesera kuti munase kubesereka pamunonga mecijija bhuku ra Mabasa o Vapostori.

16. I Zviro zvapi zvitatu zvakaitisa kuti bhuku iri riithwe?

¹⁶ Ngenyi bhuku iri rakaitwa? Kuitira zviro zvitatu. (1) Kuvangisa kuthemba kwatinoita kokuti Jehovha ecishandisa mujimu mucena wake, ari kubesera basa iri ro kucumaera masoko akanaka o Umambo no kuita vajiji. (2) Kuengejera kuvangisira kwedu mu basa ro kucumaera, ngo kujija muezaniso wo Makristu o muzana ro kutanga ro makore. (3) Kuengejera rudo hwedu ku sangano ra Jehovha, kuno vaya vari kutungamirira mu basa ro kucumaera no mu ungano jo Cikristu.

17, 18. Bhuku iri rakarongeswa kudini, zviro zvapi zvimweni zviri mukatimo zvingatibesera patinonga teciita jijo yo Bhaibheri yo mundhu ega?

¹⁷ Bhuku iri rakarongeswa kudini? Bhuku iri rakapauhwa ngo mativi masere, divi rimwe nga rimwe rinobhuya ngo zvipauko zvinganani zvo bhuku ra Mabasa o Vapostori. Cinangwa co bhuku iri asipi cokujija vhesi imwe nga imwe, asi ngo cokutibesera kuti tivone zvotingajija ku zviitiko izvi zvakatahwemo, no manera atingazvishandisa mu upenyu hwedu. Panyezuru po cipauko cimwe nga cimwe, pano masoko anovonesa zvinozojijwa mu cipauko condhoco, kubatanijavo no mavhesi o bhuku ra Mabasa o Vapostori anozojijwa.

 ¹⁸ Pano zviro zvimwenizve mu bhuku iri zvingatibesera patinonga teciita jijo yo mundhu ega. Patinonga tecirangarijisisa ngo zviitiko izvi zvo Bhaibheri, mafoto ari mukatimo anozotibesera kuvona manera o zvakaitika zviitiko izvi zvinodakajisa, zvakatahwari mu bhuku ra Mabasa o Vapostori. Mu zvipauko zvizinji, muno mabhokiso anoviya no masoko amweni o kuengejera. Mu mabhokiso aya munobhuya ngo pamusoro po upenyu wo mushandiri umwe wa Jehovha anonangwa mu cipauko condhoco no manera atingatevejera rutendo hwake. Kuveni mu mabhokiso amweni muno masoko o kuengejera ngo pamusoro po ndau, zviitiko no zvirovejeso zvo vandhu vamweni vanonangwa mu bhuku iri ra Mabasa o Vapostori.

19. Muvhunjo japi jatinodikana kujiita nguva jimweni?

¹⁹ Bhuku iri ringatibesera kuti tinase kujipopora ushoni. Azvinenyi kuti maano makore mangana mecishanda inga mucumaeri wo masoko akanaka o Umambo, nguva jimweni zvaushoni kumboima, movona kuti ngozvapi zvamuri kudira pakutanga mu upenyu hwenyu no manera amuri kuvona basa ro kucumaera. (2 Vak. 13:5) Jivhunjisenyi: ‘Ndiri kuenderera mberi ndecivona basa ro kucumaera inga basa rinodikana kuithwa ngo kukasika? (1 Vak. 7:29-31) Ndiri kucumaera masoko akanaka ngo kuvangisira kwese ndecithemba zvandiri kujijisaro? (1 Vat. 1:5, 6) Ndiri kuita zvese zvandinokwanisa mu basa ro kucumaera no kuita vajiji?’—Vak. 3:23.

20, 21. Ngenyi basa ro kucumaera ngo ro kukasika, tinodikana kusunga kuitenyi?

²⁰ Narini atidikani kukanganwa basa redu rinosisira ro kucumaera no kuita vajiji. Basa iri rinodikana kuithwa ngo kukasika, maningi-ningi wari uno ngokuti mugumo wo nyika uri kukhwedera ngo kukasika. Upenyu hwo vandhu vakawanda huri pa ngozi. Atizvizivi kuti i vandhu vangana vanozotendera masoko atinocumaera. (Mab. 13:48) Asi ticino mukana wo kuvabesera nguva icito yakwana.—1 Tim. 4:16.

²¹ Zvinosisira maningi kuti titevejere muezaniso wo Makristu o muzana ro kutanga ro makore, avo vakacumaera masoko akanaka o Umambo ngo kuvangisira kwese. Tino cokwadi cokuti kujija bhuku iri kunozomubesera kuti muenderere mberi mecicumaera ngo kuvangisira kwese no cicunge. Tinodazve kuti cido cenyu co kuenderera mberi mecipa “ucapupu hwakaperera ngo pamusoro po Umambo hwa Mwari” civange.—Mab. 28:23.