Vacumaeri Vanodiwa:

Amborangariranyi kuti muri umwe wo vapostori muri pa Dundhu ro Maorivhe. Jesu anomugumira. Acito ahwirira mu gore, anomuvhunja kudari: “Mukaashira mujimu mucena, munozopuwa simba kuti muzoite ucapupu ngo pamusoro pangu, mu Jerusarema, mu Judheya mwese no mu Samariya, mbhera ku ndau jiri ndhambo jo pasi pano.” (Mabasa o Vapostori 1:8) Ngozvapi zvamaizoita?

Zvingaita kuti imwimwi munotanga kuthimwa-thimwa ngo kupuwa basa rakakura kudari. Kangaije mungatotanga kujivhunjisa kuti: ‘Kuitisa kudini itusu cikwata cidoko co vajiji tingakwanisa kucumaera “mbhera ku ndau jiri ndhambo jo pasi pano”?’ Zvingaita kuti imwimwi mungaceukija zvakananga Jesu pa usiku acito afa, paakati: “Muranda asipi mukuru kupinda patarau wake. Zvecivoneka kuti vakanditeverera, ivona vanozomutevereravo, kudari vakazwira masoko angu, vanozozwiravo masoko enyu. Asi ivona vanozomuitira zviro zvese izvi ngo ndava yo zina rangu, ngokuti avamuzivi Wakandituma.” (Joh. 15:20, 21) Pamunonga mecirangarijisisa magama aya, kangaije mungajivhunjisa kudari: ‘Ndinozokwanisa kupa ucapupu hwakaperera pandinonga ndecishohwa no kuteverehwa?’

Nyamasi uno tingatojiitavo muvhunjo jakafanana. Inga Zvapupu zva Jehovha, basa redu rinobatanijavo kupa ucapupu hwakaperera “mbhera ku ndau jiri ndhambo jo pasi pano” ku “vandhu vo majinja ese.” (Mat. 28:19, 20) Tingaitisa kudini basa iri no kuteverehwa kanangwari?

Bhuku ra Mabasa o Vapostori rinovonesa manera vapostori no hama jo Cikristu jo muzana rokutanga Kristu Aviya, jakakwanirisa basa rojakagajwa ngo besero ra Jehovha. Bhuku iri ramuri kuverengari, cinangwa caro ngo co kumubesera kuti muvone zviitiko zviri mu bhuku ra Mabasa o Vapostori no kudakajihwa ndizvona. Munozoshamaisika ngo kuvona manera Makristu okutanga aiita zviro zvakafanana no manera azvinoithwavo ngo vandhu va Mwari nyamasi uno. Munozokwanisa kuvona kuti kutojana uku akubataniji basi mabasa atinoita asi pa manera atakarongwa kuti tiite basero. Kurangarira ngo pamusoro pa izvi, pacina kukana-kana, kunozovangisa kuthemba kwamunoita kuti Jehovha ari kwenderera mberi ecitungamirira sangano rake ro pasi pano.

Tiri kuita mukumbiro kuti bhuku iri rivangise kuthemba kwenyu besero ra Jehovha no simba rino mujimu mucena. Tinoda kuti pamunonga mecijija muvangiswe no kwenderera mberi ‘mecipa ucapupu hwakaperera’ ngo pamusoro po Umambo hwa Mwari no kubesera vamweni kuti vawane gwanja ro ruponeso.—Mab. 28:23; 1 Tim. 4:16.