CIPAUKO 24
“Cungai!”
Vajudha vanoita urongwa hwo kuuraya Pauro, iyena anojijivirira pamberi pa Ferisi
Zvakacijikira pana Mabasa o Vapostori 23:11–24:27
1, 2. Ngenyi kuteverehwa kwakasongana no mupostori Pauro ku Jerusarema akuzivi kumushamaisa?
PAURO anotohwa pakati po vandhu vaiita joweyowe ku Jerusarema, wodihwazve mukadheya. Kuteverehwa kuri kuithwari mupostori uwu mu dhorobha iri, akumushamaisi. Iyena wainga akavhunjwa kuti waizodihwa “mu kadheya no kuwanana no matambujiko” kondhoyo. (Mab. 20:22, 23) Pikija aacaiziva kuti waizosongana no matambujiko o mushovonyi, Pauro waiziva kuti waizoenderera mberi eciteverehwa ngo ndava yo zina ra Jesu.—Mab. 24:25, 26.
2 Vaporofeti vamweni vo Cikristu vainga vakatongwaja Pauro kuti iyena waizosungwa no ‘kupekejwa mu nyara jo vandhu vo majinja.’ (Mab. 21:4, 10, 11) Painga pacito papera mukuvo wakareba Vajudha povakaeja kumuuraya. Nopapera mukuvo mushomani, vandhu vaiita divi ro Sinedhriyo ‘vainesana’ ngo pamusoro pake. Wari mupostori uwu wakasungwa ngo masoca o Ciroma ecivetera kutongwa no kupumbhwazve zviro zvimweni zvakawanda maningi. (Mab. 21:31; 23:10) Zvokadi kamare, mupostori Pauro anoda maningi kuvangiswa.
3. Tinowana kwapi vangiso kuti tikwanise kwenderera mberi teciita basa ro kucumaera?
3 Tinozviziva kuti mu mukuvo uno wo kupejisira, “vese vaya vanoda kurarama mu kujipira kuna Mwari, mukubatana na Kristu Jesu, vanozoteverehwa.” (2 Tim. 3:12) Nguva painonga yecikhirira, itusu tinodavo maningi kuvangiswa kuti tikwanise kwenderera mberi teciita basa redu ro kucumaera. Tinodakara no kubonga maningi ngo masoko anovangisa atinoashira mu mabhuku edu no ku musongano zvecivha ku “muranda wakagondeka no wakangwara.” (Mat. 24:45) Jehovha anotigondesa kuti apana na umwe hake anovenga basa ro kucumaera, anozobudirira. Ivona avazokwanisi kuparaja vashandiri va Jehovha inga cikwata nee kuimisa basa ro kucumaera. (Is. 54:17; Jr. 1:19) Waro, tingati kudini ndi Pauro? Kunanga kuti iyena wakakwanisa kuashira vangiso yaaida kuti akwanise kupa ucapupu hwakaperera ngo pamusoro po Umambo hwa Mwari pikija no kuteverehwa? Kudari wakaashira, ngoyapi vangiso yaakaashiraro? Iyena wakaitenyi pasure po kuashira vangiso iyi?
“Vakazwirana Kumukira Pauro, Vopika” Asi Azvizivi Kubudirira (Mab. 23:11-34)
4, 5. Pauro wakaashira vangiso yapi, ngenyi iyona yakaguma pa nguva kwayo?
4 Mupostori Pauro wakaashira vangiso yaaida pa usiku pasure po kuponeswa kuvha ku joweyowe rakaitwa ku Sinedhriyo. Bhaibheri rinonanga kudari: “Mambo wakaima phedo naye womuvhunja kuti: ‘Cungai! Ngokuti ucapupu hwakaperera hwawakaita mu Jerusarema, unozohuitazve ku Roma.’” (Mab. 23:11) Pakupera kuzwa magama aya anovangisa aivha kuna Jesu, Pauro wakathemba kamare kuti acaizofa. Iyena waizviziva kuti waizopona mbhera kuguma ku Roma no kupa ucapupu ngo pamusoro pa Jesu.
“Vandhu vanopindirija makumarongomuna vari kuda kumujiva”Mab. 23:21
5 Vangiso yakaashirari Pauro yakaguma pa nguva kwayo kamare. Pa njiku yakatevera, Vajudha vanokwana kuita 40 “vakazwirana kumukira Pauro, vopika vecinanga kuti avacaizohepi nee avacaizomwepi vacizivi kumuuraya.” Vajudha vaya vainga vacikadizve kuvona Pauro, vecitopika kumuuraya, zvoita inga kuti vakatama kumuuraya vaizotambhujwa. (Mab. 23:12-15) Inga manera okukwanirisa zvavaidari, ivona vakatendehwa ngo vakuru no vapiri, kuti vadanije Pauro kuti aviye ku Sinedhriyo inga vanoda kumuita muvhunjo. Asi vaizogara mu gwanja rinoenda ku Sinedhriyo kuti vasongane na Pauro kuti vamuuraye.
6. Zano ro kuda kuuraya Pauro rakafumbhuriswa kudini? Majaha nyamasi uno anojijenyi ngo ciitiko ici?
6 Asi mwana wo hambzaji ya Pauro, wakazvizwa zvavaingari vecironga, woenda kozvivhunja Pauro. Pauro wakananga kuti aende kovhunja zvondhozvo ku mutungamiriri wo masoca wo Ciroma waidanwa Kraudhiyo Riziya. (Mab. 23:16-22) Zvokadi kamare, Jehovha anoda maningi majaha akadari inga mwana wo hambzaji ya Pauro, uwo wokuti zina rake arizivi kunangwa mu Bhaibheri. Majaha akadari anodira zvinodiwa zvo vamweni pambeji po zvavo, vobesera no kugondeka kwese zvinodiwa zvo Umambo.
7, 8. Ngozvapi zvakaizwa ndi Kraudhiyo Riziya kuti aponese Pauro?
7 Pasure po kuvhunjwa ngo urongwa wo kuda kuuraya Pauro, Kraudhiyo Riziya, uwo waitungamirira masoca anokwana kuita 1000, ngo kukasika wakaita kuti mutungamiriri umweni wo masoca atungamirire masoca anokwana kuita 470 ainga no mukhondo no haci kuti arongwe aende Jerusarema pa usiku wondhowo na Pauro mbhera agume Sezareya naakangwaririka. Pakuguma kondhoyo, vaidikana kumuendesa ka Govhernadhori Ferisi. a Sezareya rainga dhorobha guru ro Judheya, ndikonazve kwainga no kwarteri yaigara masoca o Ciroma o porovhinsiya iyi. Ikona kwaigara Vajudha vakati kuti, asi vandhu vakawanda vainga vo majinja amweni. Manera ozvairongwa zviro zvainga zvakasiyana maningi no manera ozvairongwa ku Jerusarema, ngokuti vazinji vaibatisisa maningi zviyara zvavo no kuda kuita joweyowe.
8 Ecizwira mutemo wo Roma, Riziya wakatumira karata ecisanangura shwiro ya Pauro. Pa karata iyi, iyena wakananga kuti paakaziva kuti Pauro wainga mugari wo Roma ‘wakamuponesa’ kuti atame kuuraiwa ngo Vajudha. Riziya wakananga kuti Pauro aazivi kupumbhwa ndava iri yese ingamuitisa “kuti afe kana kuti adihwe mukadheya.” Asi ngo ndava yo urongwa wovainga vakaita kuti vauraye Pauro, iyena wainga ecimuendesa kuna Ferisi ngokuti inga govhernadhori waidikana kuzwa zvaaipumbhwaro no kutema civaringo ciri cese.—Mab. 23:25-30.
9. (a) Kuitisa kudini zvitendehwa zva Pauro inga mugari wo Roma azvizivi kureremejwa? (b) Ngenyi nguva jimweni tinodikana kushandisa zvitendehwa zvedu kuti tijivirihwe mukuzwirana no mutemo?
9 Kureva kuti Riziya wakananga zvese zvaakaita pa karata iyi? Haiwa. Zvinovoneka inga kuti iyena waida kuvoniwa inga mundhu waushoni. Iyena aazivi kuponesa Pauro ngokuti wainga waziva kuti Pauro wainga mu Roma. Kusiyapo zvondhozvo, Riziya aazivi kunanga kuti wainga wakatuma vandhu kuti ‘vasunge [Pauro] ngo magaragajero maviri’ nee aazivi kutonangazve kuti pakufamba ko nguva iyena wainga wakananga kuti masoca ake ‘aidikana kumutaka kuti adure’ zvaainga akaita. (Mab. 21:30-34; 22:24-29) Zvakaithwari ndi Riziya azvizivi kureremeja citendehwa ca Pauro inga mugari wo Roma. Nyamasi uno, Sathana anoshandisavo vandhu vanobatisisa zviyara zvavo kuti vatinyepere zviro zvakawanda togumira pa kuteverehwa, zvoita kuti zvitendehwa zvedu mukuzwirana no mutemo zvitame kureremejwa. Kudari inga ndi Pauro, vashandiri va Jehovha vangatoshandisa zvitendehwa zvavo mukuzwirana no zvinodikana kuitwa ngo vagari vo mu nyikemo kuti vajivirihwe mukuzwirana no mutemo.
“Wari Ndinovereketa Ngo Pamusoro Pangu” (Mab. 23:35–24:21)
10. Ngozvapi zviro zvakashatisisa zvaipumbhwa Pauro?
10 Ku Sezareya, Pauro wakadihwa “mukadheya pa nyumba ya mambo Herodhi,” ecivetera kuti vandhu vaimupumbhaya vagume kuvha Jerusarema. (Mab. 23:35) Paure po njiku shanu ivona vakaguma kuvha Jerusarema. Pa vandhu vakagumari, vaengepo Mupiri Mukuru Ananiya, mwanarume umweni waidanwa Teturo no cikwata cimwe co vakuru. Pakutanga Teturo wakasimba Ferisi ngo zvese zvaainga eciita kuti abesere Vajudha. Zvinovoneka inga kuti iyena waiita zvese izvi kuti awane unyasha hwake. b Pakupera kuita izvi, Teturo wakatanga kusumura ndhango ya Pauro ngo njira iyi “mundhu uwu, ari kunesa maningi. Ari kukukumijirazve Vajudha pasi pese. Iyena ari kutungamirira cikwata co Vanazareta. Pauro wakaeja kusvipisa themberi, ngo kudaro takamubata.” Vamweni vainga naye “vakabeseravo kupumbha uku, vecinanga kuti zviri kunangwari ndizvona.” (Mab. 24:5, 6, 9) Pauro waipumbhwa kuti waikukumijira vandhu, waitungamirira cikwata cinothyisa no kusvipisa themberi, zviro zvese izvi zvaizoita kuti mundhu atongehwe kufa.
11, 12. Pauro wakaitisa kudini kuti arambe zvese zvaaipumbhwa?
11 Yakaguma nguva yokuti Pauro wakatendehwa kuvereketa. Iyena wakatanga ngo magama aya: “Wari ndinovereketa ngo pamusoro pangu.” Iyena wakaramba zvese zvaaipumbhwari. Pauro aacaingepi wakasvipisa themberi nee kueja kukukumijira vandhu. Iyena wakananga kuti wainga wakapeja “makore akawanda” acikagumi Jerusarema. Wainga wakaendeyo ngokuti waida kwendesa “zvipo zvo kubesera varombo,” Makristu akawanda kondhoyo ainga ecitambujika ngo ndava yo njara no kuteverehwa. Pauro wakatonangazve kuti acito anghwina mu themberi, iyena wainga ‘ajicenesa mukuzwirana no Mutemo’ nokutizve wainga ecivangirira kuti aenderere mberi ano “hana yakacena pamberi pa Mwari no po vandhu.”—Mab. 24:10-13, 16-18.
12 Pauro wakatonangazve kuti waiitira Mwari wo majibaba ake basa rakacena “mukuzwirana no ciara cavanodanijaya kuti ciara ‘cipsa.’” Iyena wakavangirira ecinanga kuti: “Inini ndinotenda zvese zviri mu Mutemo, zvakatahwa ngo Vaporofeti,” wakanangazve kuti kudari inga vandhu vaimupumbhaya iyena wainga no vetero yokuti “kunozowanika kumuka ko vakafa ko vandhu vakarurama no vandhu vacizivi kururama.” Pauro wakananga masoko akavanga maningi kuno vandhu vaimupumbhaya eciti: “Vandhu vari pano wari, ngavanange cakashata cavakavona pandainga na ivona pamberi po Sinedhriyo, kunja ko ciro cimwe basi candakananga pandainga pakati pavo, ndeciti: ‘Ndiri kutongwa nyamasi pamberi penyu ngo ndava yo kumuswa ko vakafa!’”—Mab. 24:14, 15, 20, 21.
13-15. Ngenyi Pauro ndi muezaniso waushoni wokupa ucapupu no cicunge pamberi po vatongi?
13 Mupostori Pauro wakatigajira muezaniso waushoni kudari tikatohwa toendeswa pamberi po vatongi ngo ndava yo kunamata kwedu togumira pa kupumbhwa kuti tiri vandhu vanokukumijira joweyowe no kuita divi ro “ciyara cakashata.” Mukusiyana na Teturo, Pauro aazivi kueja kushandisa magama anodakajisa kuti govhernadhori amuvone inga mundhu waushoni. Pauro wakaenderera mberi wakagajana no kukhombija nderemejo. Ecishandisa magama aushoni, iyena wakapa ucapupu ngo njira yaushoni no yo cokwadi. Iyena wakananga kuti Vajudhaa . . . vakavha mu porovhinsiya yo Aziya” vakamupumbhaya kuti wainga wasvipisa themberi avacaengepo, mukuzwirana no mutemo iyena wainga no citendehwa co kuvaita muvhunjo ngo pamusoro po zviro zvovainangaro.—Mab. 24:18, 19.
14 Zvinodakajisa ngo zvokuti, Pauro aazivi kuthya kupa ucapupu ngo pamusoro po zviro zvaaitenda. Ngo cicunge cese iyena wakabhuyazve ngo pamusoro po rumuko, shwiro yakamusaya joweyowe pamberi po Sinedhriyo. (Mab. 23:6-10) Ngenyi Pauro wakabhuyazve ngo pamusoro po rumuko paainga ecijijivirira? Pauro wainga pa mugariro uwu ngokuti wainga wakapa ucapupu ngo pamusoro pa Jesu no kumuswa kwake, zviro zvokuti vandhu vaimupumbhaya avacaitenderana nazvo.—Mab. 26:6-8, 22, 23.
15 Inga ndi Pauro, itusu tingapa ucapupu no cicunge cese no kuwana simba ngo magama akananga Jesu kuno vajiji vake paakati: “Munozonyenywa ngo vandhu vese ngo ndava yo zina rangu. Asi wiya anocungirira mbhera kumagumo anozoponeswa.” Kureva kuti tinodikana kuneseka ngo zviro zvatinozoda kunanga? Jesu wakapa cigondiso ici: “Pavanozomuendesa ku vatongi, mucadothimwa-thimwa ngo zvamunozoda kuvereketa, asi nanganyi zvamunozovhunjwa pa nguva yondhoyo. Ngokuti andimwipi munozobhuya, asi mujimu mucena ndiwona unozobhuya.”—Mar. 13:9-13.
“Ferisi Wakathya” (Mab. 24:22-27)
16, 17. (a) Ferisi wakaitenyi paainga ecitonga Pauro? (b) Ngenyi kangaije Ferisi wakathya? Asi wakaenderera mberi ecivona Pauro ngo thangwe rapi?
16 Iyi aizivi kuva vhaza yokutanga yokuti govhernadhori Ferisi vakazwa ngo pamusoro po zvinotendwa ngo Makristu. Bhaibheri rinoti: “Asi Ferisi ecinasa kuziva shwiro iyi ngo pamusoro po Gwanja iri [gama rakatanga kushandiswa pa kuda kunangira Makristu], iyena wakavapindisa eciti: ‘Riziya mutungamiriri wo masoca akambhera ngo kuviya, ndinozotonga shwiro yenyu iyi.’ Iyena wakavhunja mukuru wo masoca kuti Pauro angwaririhwe akasungwa, asi waidikana kuva wakasununguka kuti akwanise kusapothwa ngo vandhu vo jinja rake.”—Mab. 24:22, 23.
17 Pasure po njiku nganani, Ferisi wakaviya no mukaji wake anodanwa Dhrusira, iyena wainga Mujudha. Ferisi wakadanija Pauro “kuti azwe masoko ngo pamusoro po kutenda Kristu Jesu.” (Mab. 24:24) Asi Pauro paainga ecibhuya ngo pamusoro po “urungami, kujibata no kutongwa kwaiviya, Ferisi wakathya,” kangaije ngokuti izvi zvakaita kuti hana yake ireme ngo ndava yo zviro zvakashata zvaiita. Ngo kudaro, iyena wakaeneka Pauro womuvhunja kudari: “Wari ambopindai hako, ndinozokudanijazve ndikawana mukana umweni.” Ferisi wakavona Pauro ko vhaza jakawanda, haiwa ngokuti waida kujija cokwadi asi waivetera kuti Pauro amupe mare.—Mab. 24:25, 26.
18. Ngenyi Pauro wakabhuya na Ferisi no mukaji wake ngo pamusoro po “urungami, kujibata no kutongwa kwaiviya”?
18 Ngenyi Pauro wakabhuya na Ferisi no mukaji wake ngo pamusoro po “urungami, kujibata no kutongwa kwaiviya”? Ceukijanyi kuti ivona vaida kuziva kuti ngozvapi zvaibatanijwa pa “kutenda Kristu Jesu.” Zvecivoneka kuti Pauro waiziva zviitiko zvo vandhu ava, iyena wakanasa kujekesa kuti vaya vanoda kuva vateveri va Jesu avacaidikana kuita zvo uhure no kuita zviro zvicizivi kurungama. Zvakanangari Pauro zvakanasa kujekesa kuti zvaiizwa ndi Ferisi no mukaji wake, zvainga zvakasiyana maningi no ndhungamiriro jakaruruma ja Mwari. Izvi zvaizovabesera kuti ivona vakwanise kuzwisisa kuti vandhu vese vanozojidavirira pamberi pa Mwari ngo ndava yo zviro zvavanorangarira, zvavanoita no kunanga. Zvinosisira maningi kusiyapo kutonga kwavaiitari Pauro ngo co kuti ivona vanozotongwa pamberi pa Mwari. Izvi ngo zvakaitisa kuti Ferisi ‘athye.’
19, 20. (a) Mu basa ro kucumaera, tinodikana kutaja kudini vandhu vaya vanoita inga kuti vanoda cokwadi asi avadi kucinja mugariro wavo wakashata? (b) Tinozvizivisa kudini kuti Ferisi aacaidepi kugara ushoni ka Pauro?
19 Mu basa ro kucumaera, tingatosongana no vandhu vakadari inga ndi Ferisi. Pakutanga vangatoita inga kuti vari kudakarira cokwadi, asi avadi kucinja manera avo okuita zviro. Tinodikana kungwarira maningi patinonga tecibesera vandhu vakadari. Asi kudari inga ndi Pauro, tingatobhuya navo ngo njira yaushoni ngo kuvakhombija ndhungamiriro jakarungama ja Mwari. Kangaije cokwadi cingapsasa mwoyo yavo. Asi tikavona kuti vandhu ava avadi kusiya mugariro wavo wakashata, atizovavangiriji kuti vacinje. Kusiyapo izvo, tinozoshandisa nguva yedu kuti tipsake vandhu vanoda kamare kuzwa cokwadi.
20 Tinokwanisa kuvona zviro zvainga mu mwoyo ma Ferisi pa zviro zvakaitika. Bhaibheri rinoti: “Pasure po makore maviri, Ferisi wakacinjwa ndi Porsiyo Festo. Zvecivoneka kuti Ferisi waida kusimbhwa ngo Vajudha, wakaregera Pauro mukadheya.” (Mab. 24:27) Ferisi aacaineseka ngo kugara ushoni ka Pauro. Iyena waizviziva kuti vandhu vaitevera “Gwanja ro Cokwadi” avacainga vapanduki. (Mab. 19:23) Iyena waizivazve kuti Pauro aacainga waphwanya mutemo uri wese wo Ciroma. Pikija zvakadaro, Ferisi wakaita kuti Pauro aenderere mberi ari mukadheya ngokuti “waida kusimbhwa ngo Vajudha.”
21. Zvicinyi zvakaitika na Pauro pasure pa Porsiyo Festo kuva Govhernadhori, ngozvapi kangaije zvakavangisa Pauro?
21 Inga zvatavona pa vhesi yokupejisira yo cipauko 24 co bhuku ra Mabasa o Vapostori, Pauro wainga acindori mukadheya Porsiyo Festo paakagaja Ferisi inga govhernadhori. Njiku yokutongwa ka Pauro poyakaguma, wakatohwa woendeswa “pamberi po majimambo no magovhernadhori.” (Ruk. 21:12) Inga zvatinozovona, pakufamba ko nguva iyena wakazopa ucapupu ku mutongi wainga no simba maningi mu njiku jondhojo. Pa mukuvo wese uwu, Pauro wakaenderera mberi ano rutendo hwakavanga. Pacina kukana-kana, wakaenderera mberi ecithemba magama a Jesu okuti: “Cungai!”
a Vonanyi bhokiso rinoti: “ Ferisi—Govhernadhori wo Judheya” pa pheji 221.
b Teturo wakabonga Ferisi ngo “runyararo” hukuru waainga aviisa ku jinja iri. Cokwadi ngo co kuti mu Judheya amucainga no runyararo wakakura Ferisi paainga ecitonga. Zvainga zvakasiyana kamare no pa mukuvo wovainga vecitongwa ngo majimambo amweni mbhera povakahwiswa ngo Varoma. Cimwenizve, andizvopi kuti Vajudha vainga “vecibonga maningi” ngo cinjo jainga jakaitwa ndi Ferisi. Cokwadi cainga cokuti Ferisi aacaireremejwa ngo Vajudha vakawanda, ngokuti wainga eciita kuti upenyu hwavo unese maningi no kushaisha kuvataja pavaimukira utongi.—Mab. 24:2, 3.
