CIPAUKO 25
“Ndinokumbira kuti ndava yangu iyende ka Sezari!”
Pauro wakagaja muezaniso waushoni pa manera o kujivirira masoko akanaka
Zvakacijikira pana Mabasa o Vapostori 25:1–26:32
1, 2. (a) Pauro wainga pa mugariro wapi? (b) Muvhunjo wapi unobuda ngo pamusoro po civaringo caakatema Pauro co kwendesa ndava yake ka Sezari?
PAURO anoenderera mberi ecijivirihwa ku Sezareya. Makore maviri zvicito zvaitika paakahwirira Judheya, Vajudha vakaeja kumuuraya pa vhaza ndhatu pa njiku nganani basi. (Mab. 21:27-36; 23:10, 12-15, 27) Mbhera wari, vavengi vake avazivi kubudirira, asi vari kwenderera mberi vecironga zano ro kuda kumuuraya. Pauro paakazvizwisisa, wakavhunja govhernadhori Festo kudari: “Ndinokumbira kuti ndava yangu iyende ka Sezari.”—Mab. 25:11.
2 Kureva kuti Jehovha wakabesera civaringo ca Pauro, co kwendesa ndava yake ku mutongi mukuru? Mupinguro wo muvhunjo uu unosisira maningi kwatiri tinopari ucapupu hwakaperera ngo pamusoro po Umambo hwa Mwari nyamasi uno. Tinodikana kuziva dangani Pauro, wakapa muezaniso waushoni kwatiri ngo pamusoro po “kujivirira masoko akanaka, kakuita kuti atendehwe kucumaihwa zvo pamutemo.”—Vaf. 1:7.
“Ndiri Pamberi po Banje ro Kutonga” (Mab. 25:1-12)
3, 4. (a) Vajudha vakakumbiraya kuti Pauro aende kotongwa ku Jerusarema, vaironga zano rapi, ndiyani wakajivirira Pauro? (b) Jehovha anobesera kudini vandhu vake nyamasi uno, kudari inga zvaakaita na Pauro?
3 No papera njiku ndhatu Festo naagajwa inga govhernadhori wo Judheya, wakaenda Jerusarema. a Paakagumeyo, wakazwa vapiri no vandhu vamweni vainga pa zvigaro zvo Cijudha, vecipumbha Pauro kuti wainga aita zviro zvakashata maningi. Ivona vaizviziva kuti govhernadhori mupsa uu, wainga ecivangirijwa kuti aite runyararo na ivona no Vajudha vese. Ngo kudaro, vakakumbira Festo kuti vavise Pauro ku Jerusarema kuti atongwe kondhoyo, asi vainga vecironga zano rakashata. Vavengi va Pauro vainga veciita urongwa hwo kumuuraya mu gwanja raivha Sezareya kwenda Jerusarema. Festo wakaramba zvovakakumbiraro, woti: “Vaya vari kutungamirira pakati penyu, vanodikana kuenda na inini [ku Sezareya] kudari naakaitadi cakashata.” (Mab. 25:5) Pa vhaza iyi, Pauro wakaponeswazve.
4 Pa zvineso zvese zvaisongana na Pauro, Jehovha waishandisa Jesu Kristu kuti amubesere. Ceukijanyi kuti pa civoniso caakavona, Jesu wakavhunja Pauro kudari: “Cungai.” (Mab. 23:11) Nyamasi unovo, vashandiri va Mwari, vanosongana no zvineso no kuthisijihwa. Jehovha, aavajiviriri pa zvineso zvese zvavanosongana nazvo asi anovapa uzivi no simba ravanoda kuti vacungirire. Nguva jese, tingapuwa “simba rinopindirija ro vandhu” ndi Mwari wedu anorudo.—2 Vak. 4:7.
5. Festo wakatongesa kudini shwiro ya Pauro?
5 Njiku nganani jakazotevera, Festo “wakagara pa banje ro kutonga” ku Sezareya. b Pamberi pake painga na Pauro no vandhu vaimupumbhaya. Paainga ecidavira vandhu vaimupumbha, Pauro wakati: “Andizivi kushaishira Mutemo wo Vajudha, andizivi kushaishira themberi kana kuti Sezari.” Mupostori Pauro aacainga no ndava iri yese, waidikana kusujunuhwa. Ngocapi civaringo caizotemwa ndi Festo? Ecida kudakajisa Vajudha, iyena wakavhunjisa Pauro kudari: “Iwewe unoda kwenda ku Jerusarema kuti utongwe ngo pamusoro po zviro izvi?” (Mab. 25:6-9) Iri aricainga zano raushoni, ngokuti kudari Pauro wakatumihwa ku Jerusarema, waizotongwa ngo vandhu vaimupumbhaya, wotogumira pa kuuraiwa. Pa shwiro iyi, Festo wainga ecidira zviro zvo poritika pakutanga, kuciripi pakubatikana pa urungami. Ponsiyo Pirato wakaitavo zviro zvakafanana paainga ecitonga Jesu. (Joh. 19:12-16) Nyamasi unovo, vatongi vanobatisisa maningi zvoporitika pavanonga vecitonga ndava. Ngo kudaro, atishamaisiki vatongi pavanotonga zviro zvicikabeseri vandhu va Mwari.
6, 7. Ngenyi Pauro wakananga kuti waida kotongwa ndi Sezari, wakagaja muezaniso wapi waushoni ku Makristu nyamasi uno?
6 Kudakajisa kwaidari kuita Festo Vajudha, kwaizodira pa ngozi upenyu hwa Pauro. Ngo iyo ndava, Pauro wakashandisa citendehwa cake, inga mugari wo Roma. Iyena wakavhunja Festo kudari: “Inini ndiri pamberi po banje ro kutonga ra Sezari pandinofanera kutongwa. Andizivi kushaisha ciri cese ku Vajudha inga zvamuri kutonasari kuvona. . . . Ndinokumbira kuti ndava yangu iyende ka Sezari.” Kazinji, cikumbiro cakadari inga ici, acivhiri kurambiwa. Ngo iyo ndava, Festo wakati: “Iwewe wakumbira kuenda ka Sezari, waro unozoenda ka Sezari.” (Mab. 25:10-12) Pauro wakagaja muezaniso waushoni ku Makristu nyamasi uno, ngo kukumbira kwaakaitari kuti aende ku tiribhunari huru. Vavengi, pavanotama kutonga ndava ngo “zina ro mupango”, Zvapupu zva Jehovha, zvinoshandisa zvitendehwa zvavo mukuzwirana no mutemo, kuti vajivirire masoko akanaka. c—Ndu. 94:20.
7 Ngo kudaro, pasure po makore maviri naari mukadheya ecipumbhwa kuti wainga aita zviro zvakashata, Pauro wakapuwa mukana kuti atore ndhango yake kuti iyende kotongwa ku Roma. Asi acito apinda, govhernadhori umweni wakakumbira kumuvona.
Tinoendesa ndava jedu ku tiribhunari huru, pajinotama kutongwa munjira yaushoni
“Inini Andizivi Kuramba Kuzwira” (Mab. 25:13–26:23)
8, 9. Ngenyi Mambo Agripa wakavhakacira Sezareya?
8 Nopapera njiku nganani, Pauro naapera kunanga kuti wainga ecida kutora ndava yake kuti iyende kotongwa ndi Sezari pamberi pa Festo, mambo Agripa no hambzaji yake Bherenisi, vakaenda “koitira makorokoto” govhernadhori mupsa uu. d Mu njiku jo utongi hwo Ciroma, vatongi vainga no cirovejeso co kwenda kovhakacira magovhernadhori mapsa. Agripa paakaenda koitira makorokoto Festo ngo kugajwa kwake, atikani-kani kuti wainga ecitovangisa zviro zvavo zvo poritika no ushamwari hwavo, zviro zvaizomubesera kumbejiyo.—Mab. 25:13.
9 Festo wakabhuya zviro zvizinji na Agripa ngo pamusoro pa Pauro, zvoita kuti ade kuvonana naye no kuzwa ngo zva Pauro. Pa njiku yakazotevera, Festo na Agripa vakagara pa cigaro co kutonga. Zviro zvavaizoita azvicaizopinda magama aida kuzobhuiwa ndi Pauro pamberi pavo.—Mab. 25:22-27.
10, 11. Pauro wakakhombijisa kudini kuti waireremeja Agripa? Zvicinyi zvaakananga ngo pamusoro po zviro zvaaita kare?
10 Pauro ngo nderemejo yese wakabonga Mambo Agripa ngo mukana wo kujijivirira pamberi pake, ecizwisisa kuti Mambo uu, wainasa kuziva zvirovejeso no kunesana kwaiitika pakati po Vajudha. Pauro wakatanga kubhuya ngo pamusoro po upenyu hwake hwo kare eciti: “Inini ndiri wo manamatiro o Vafarisi. Manamatiro aya anobatisisa maningi zvitendwa zvao.” (Mab. 26:5) Inga Mufarisi, Pauro waivetera Mesiya waizoviya. Wari inga Mukristu, Pauro no cicunge cese anovonesa kuti Jesu Kristu, ndiyena Mesiya waivetehwa. Pauro no vandhu vaya vaimupumbhaya, vaitenda kuti Mwari waizokwanirisa cigondiso caakaitira majibaba avo, asi iyi ndiyonazve shwiro yakaita kuti Pauro agumire pa kutongwa. Zvakanangari Pauro zvakaita kuti Agripa adezve kuziva zvizinji zvaida kunanga Pauro. e
11 Eciceukija mukuvo waaitaja Makristu munjira yakashata, Pauro wakati: “Inini ndainga mundhu wairangarira kuti ndaidikana kuhwisa zina ra Jesu wo Nazareta . . . Zvecivoneka kuti ndainga ndino ushungu maningi na ivona, ndakavateverera mbhera kumadhorobha ari ndhambo.” (Mab. 26:9-11) Pauro aacainyanyisa ngo kunanga izvi. Vandhu vazinji vaizviziva manera aakateverera Makristu munjira yakashatisisa. (Vag. 1:13, 23) Agripa kangaije wakajivhunjisa kudari: ‘Zvicinyi zvakaita kuti mundhu wakadari agumire pa kucinja?’
12, 13. (a) Pauro wakasanangurisa kudini kutendeuka kwake? (b) Munjira yapi Pauro waienderera mberi ‘ecithaura ndonga yakapinjira’?
12 Muvhunjo uu wakazodavihwa ngo zvaakazonanga Pauro, paakati: “Ndainga ndecienda ku Dhamasko ngokuti ndainga ndatumwa ngo vapiri vakuru kuti ndiende kotambuja vajiji kondhoyo. Amambo, ainga masikati, ndakavona ruvheneko hwaipindirija kubwaka ko zuva, hwaivha kudenga, hwakanditendeneja pamwepo no vandhu vandainga navo. Tese patakawa pasi, ndakazwa izwi recindivhunja ngo ndimi yo Cihebheru kuti: ‘Sauro, Sauro, uri kunditeverera ngo ndava yenyi? Uri kujitambuja ngo kuenderera mberi wecithaura ndonga yakapinjira.’ Asi inini ndakavhunjisa kuti: ‘Ndimwi ani?’ Iyena wakati: ‘Ndini Jesu, wauri kutevereraro.” f—Mab. 26:12-15.
13 Acito ava no civoniso ici, zvaiita inga kuti Pauro waienderera mberi ‘ecithaura ndonga yakapinjira.’ Kudari inga cinyama caizokhuvazika ngo kugara cecithaura ndonga yakapinjira, Pauro waingavo wakakhuvazika ku divi ro kumujimu ngo kuita zviro zvakasiyana no kuda ka Mwari. Ngo kuvoneswa kwake civoniso ici mu gwanja ro kwenda ku Dhamasko, Jesu wakaita kuti mwanarume uu waishaishari kutungamirihwa, acinje manera ake okurangarira.
14, 15. Pauro wakanangenyi ngo cinjo jaainga aita mu upenyu hwake?
14 Pauro wakaita cinjo huru maningi mu upenyu hwake. Paainga ecibhuya na Mambo Agripa, wakati: “Inini andizivi kuramba kuzwira civoniso co kudenga, asi ndakatangira kuna vaya vari mu Dhamasko perapo ndoenda kwavainga mu Jerusarema, pomwe no vese vari mu ndharaundha yo Judheya no vo kumajinja ndakavavhunja masoko okuti vaidikana kukhauya vahwirire kuna Mwari ngo kuita mabasa aivonesa kukhauya kwavo.” (Mab. 26:19, 20) Painga pakhirira makore akawanda Pauro ecikwanirisa basa raakavhunjwaro ndi Jesu Kristu, pa civoniso caakavonaro comasikati. Ngowapi wakava muviyo? Vese vaya vaitendera masoko akanaka aicumaehwa ndi Pauro, vaikhauya vocinja maponero avo, votanga kushandira Mwari. Vandhu ava vaiva vandhu vaushoni, vanoreremeja Mutemo no kuita kuti zviro zvive zvakarongeka munyika.
15 Asi muviyo iji jaushoni ajicaisisira kuno vavengi vo Cijudha va Pauro. Iyena wakati: “Izvi ndizvona zvakaitisa kuti Vajudha vandisunge mu themberi no kueja kundiuraya. Zvecivoneka kuti Mwari ari kundibesera, mbhera na nyamasi ndiciri kuita ucapupu ku vadoko no vakuru.”—Mab. 26:21, 22.
16. Tingatevejeresa kudini Pauro patinobhuya no vatongi kubatanijavo no magovhernadhori ngo pamusoro po zvatinotenda?
16 Inga Makristu ocokwadi, tinodikana kuva “takanasirira kuti tidavire vaya vanovereketa ngo pamusoro po” rutendo hwedu. (1 Ped. 3:15) Patinobhuya no utongi kubatanijavo no magovhernadhori ngo pamusoro po zvatinotenda, zvaizova zvaushoni kutevejera muezaniso wa Pauro pa manera aakabhuya na Agripa na Festo. Kudari ngo nderemejo yese tikabhuya ngo pamusoro po manera okuti cokwadi co Bhaibheri ciri kucinja upenyu hwo vandhu kuciripi hwedu basi asi ku vese vaya varikutendera kuzwa masoko edu, kangaije tingatopsasa mwoyo jo vandhu ava vanari zvigaro zvakakhwirira.
“Wadondikhohwesa Kuti Ndive Mukristu” (Mab. 26:24-32)
17. Festo wakanangenyi ngo kujijivirira kwaita Pauro, ngowapi murangariro wakafanana no uno vandhu nyamasi uno?
17 Pauro paaienderera mberi ecibhuya zviro zvinokhohwesa, Agripa na Festo avazivi kukwanisa kunyarara. Vonanyi basi zvakaitika: “Pauro paainga ecijiinikira, Festo wakamima ngo izwi guru eciti: “Iwewe uri kupenga Pauro! Uzivi hwako huri kukupengesa!” (Mab. 26:24) Zvakanangari Festo, kangaije zvinonasavo kuvonesa murangariro jino vandhu nyamasi uno. Vandhu vazinji, vanovona vandhu vanojijisa ngo pamusoro po Bhaibheri inga kuti ndi vandhu vanonyanyisa maningi. Vazivi vo nyika, vanovona kuti zvinonesa maningi kutenda jijiso yo Bhaibheri ngo pamusoro po rumuko.
18. Pauro wakadavirisa kudini Festo, Agripa wakanangenyi?
18 Asi Pauro wakadavira Govhernadhori Festo kudari: “Andiripi kupenga Amambo Festo, asi ndiri kuvereketa zvokadi no zvino musoro. Zvokadi ngo zvokuti, imwimwi mambo muri kubhuyari na inini ndakasujunuka, munonasa kuzviziva zviro izvi. . . . Imwimwi Mambo Agripa munotenda zvakatahwa ngo Vaporofeti? Ndinozviziva kuti munotenda.” Mambo Agripa wakadavira kudari: “Pa nguva shomani, wadondikhohwesa kuti ndive Mukristu.” (Mab. 26:25-28) Azvinenyi kuti zvakanangari Agripa, ndizvona kana kuti haiwa asi zvinovonesa kuti ucapupu hwakapari Pauro, wakapsasa maningi mambo uu.
19. Festo na Agripa vakaguma pa mbhejiso yapi ngo pamusoro pa Pauro?
19 Ngo kudaro, Agripa na Festo, vakamuka vecivonesa kuti zvavaibhuyaro zvainga zvapera. “Asi pavainga vecipinda, vaivhunjana ngo cavo kuti: “Mwanarume uwu apana caari kuita cingamuuraisa kana kuti kumudirisa mu kadheya.” Agripa wakavhunja Festo kuti: “Kudari mwanarume uwu naacizivi kukumbira kwenda ka Sezari, waizodeno asujunuhwa.” (Mab. 26:31, 32) Ivona vaizviziva kuti mwanarume uu aacainga no ndava iri yese. Kuvhira pondhopo, vakatanga kuva no mavonero aushoni ngo pamusoro po Makristu.
20. Kucumaera kwakaita Pauro ku vatongi kwakava no muviyo wapi?
20 Zviitiko zvinovonesa kuti pa vatongi vaviri ava, apana na umwe wakatenda kuashira masoko akanaka ngo pamusoro po Umambo hwa Mwari. Kuva kwake Pauro pamberi po vatongi ava, zvakava no muviyo? Hina. Kutohwa kwake Pauro kwenda “pamberi po majimambo no magovhernadhori” ku Judheya, kwakapa ucapupu hwaushoni ku vatongi vo Ciroma, zviro zvokuti azvicaizoitika kudari naazivi kwendeyo. (Ruk. 21:12, 13) Kusiyapo izvi, zvaakasongana nazvo no manera wakakhombija rutendo paaisongana no zvineso, zvakavangisa hama no hambzaji jake.—Vaf. 1:12-14.
21. Ngojapi muviyo jaushoni jatinova najo patinocungirira mu basa ro kucumaera?
21 Patinocungirira mu basa ro kucumaera pikija no zvineso kana kuteverehwa, tingava no muviyo jaushoni. Kangaije, tingatokwanisa kupa ucapupu ku vatongi, zviro zvokuti aticaizokwanisa kuzviita ngo njira imweni. Kucungirira kwatinoita takagondeka, kunobesera maningi hama jedu, zvotoita kuti vave no cicunge mu basa ro kupa ucapupu hwakaperera ngo pamusoro po Umambo hwa Mwari.
a Vonanyi bhokiso rinoti: “Porsiyo Festo, Govhernadhori wo Ciroma,” pa pheji 227.
b “Cigaro co kutonga,” yainga kadera yaigara pa ndau yakakhwirira. Kugara pa ndau iyi, zvaiita kuti zvivaringo zvaitemwa ngo utongi zvive zvakakhwirira no zvinoreremejwa maningi. Pirato wakagaravo pa cigaro co kutonga apo paaitonga ndava ya Jesu.
c Vonanyi bhokiso rinoti: “Kwendesa Ndava ku Tiribhunari Huru Kuti Tijivirire Kunamata Kocokwadi,” pa pheji 228.
d Vonanyi bhokiso rinoti: “Mambo Herodhi Agripa Wocipiri,” pa pheji 229.
e Ngo kuva Mukristu, Pauro waitenda kuti Jesu ndiyena wainga Mesiya. Vajudha vakarambaya Jesu, vaivona Pauro inga mupanduki.—Mab. 21:21, 27, 28.
f Ngo pamusoro po magama a Pauro okuti wainga eciita hwendo co “masikati,” muzivi umweni wo zvo Bhaibheri wakananga kudari: “Mundhu waiita hwendo, kudari aaripi kukasikira, waianja kuzorora comasikati zuva parinonga recipisa maningi. Ngo kudaro, tinokwanisa kuvona kuti Pauro waivangisira maningi pa basa rake iri ro kuteverera Makristu, zvoita kuti atame no kuzorora zuva porainga recipisa.”
