1-4. Pedhru wakasongana no mugariro wapi unonesa, kudari no kwainga kuti imwimwi mainga pa mugariro uwu maizoitenyi?

 PEDHRU paanoendeswa mu kadheya, anozwa ngo sure kwake musuvo wecifungwa ngo simba. Ecingwaririhwa ngo masoca maviri o Ciroma, Pedhru anoendeswa mukadheya naakasungwa. Iyena anovetera ko mukuvo wakareba ecida kuziva kuti zvicinyi zvinozoitika kwaari. Naari mukadheya mondhomo apanazve zvaari kukwanisa kuvona kuciripi basi magaragajero, masoca, musuvo no mabiravira.

² Masoko aaiveteraya akazoguma asi aazivi kumudakajisa. Mambo Agripa wo kutanga vaitoda basi kuuraya Pedhru. a Kunasa kunanga, iyena waizoda kumubudisa pamberi po vandhu pasure po kupera Phasika. Kutongehwa kwake kufa kunozodakajisa maningi vandhu vakawanda. Uku asipi kuthyisijiravo hako ngokuti mambo uwu wainga apera kuuraya mupostori umweni waizwi Jakobo.

³ Uwu wainga usiku wokupejisira kuti Pedhru aurayiwe. Ngozvapi zviri kuviya mu murangariro wake naari wari mukadheya muno cidima? Kureva kuti ari kurangarira magama akanangwa ndi Jesu pa makore manganani adarika okuti njiku iriyese unozosungwa wouraiwa ucikadi? (Joh. 21:18, 19) Kangaije Pedhru ari kutorangarira kuti wazoguma mukuvo kuti izvi zviitike.

⁴ Kudari nomainga pa mugariro wakadari inga wa Pedhru, maizojizwa kudini? Vandhu vakawanda vaizotoguma pa kusuruvara maningi, voguma pa kurangarira kuti apacina vetero. Asi ku muteveri wo cokwadi wa Kristu, kureva kuti kuno zviri zvese zvingaitika oguma pa kutama vetero? Tinojijenyi ngo zvakaitwa ndi Pedhru no Makristu pavaitambujwa? Ngatizvivone.

5, 6. (a) Ngenyi Mambo Agripa wakatambuja ungano yo Cikristu i wakazviitisa kudini? (b) Ngenyi kufa ka Jakobo kwakava muejo ku ungano?

⁵ Inga zvatakavona mu cipauko cakapera, kutendeuka ka Korneriyo wo Majinja no mbhuri yake kwakadakajisa maningi ungano yo Cikristu. Vajudha vainga vaciripi Makristu vakakahamara maningi povakavona Makristu o Cijudha no Makristu o majinja akabatana pamwepo ecinamata Jehovha.

⁶ Umwe mwanarume waita zvo poritika waizwi Herodhi, wakatowana mukana uwu kuti adakarihwe ngo Vajudha no kutotanga kutambuja Makristu. Iyena wainga akambozwa kuti Jakobo wainga muteveri wa Jesu Kristu. Ngo kudaro, Herodhi “wakaitisa kuti Jakobo hama ya Johani iuraiwe ngo banga.” (Mab. 12:2) Uwu wainga uri muejo mukuru ku ungano! Jakobo wainga ari umwe wo vapostori vatatu vakavonaya kuphinduka kakaita mu meso ma Jesu koita inga zuva no kuvonazve Jesu eciita mushamaiso jimweni jicizivi kuvoniwa ngo vapostori vamweni. (Mat. 17:1, 2; Mar. 5:37-42) Jesu wainga akapa Jakobo no munukuna wake Johani zina rokuti “Vana vo Mbheni” ngo ndava yo kuvangisira kwavo. (Mar. 3:17) Ngo kudaro, ungano yainga yaruza capupu cakagondeka, cakacunga no mupostori wo vaida maningi.

7, 8. Ungano yakaitenyi Pedhru paakasungwa?

⁷ Inga zvaaida Agripa, kuuraiwa ka Jakobo kwakadakajisa maningi Vajudha. Ngo kuvona kudakara kwakava no Vajudha, iyena  waidazve kuuraya Pedhru. Inga zvatavona pakutanga, iyena wakaita kuti Pedhru asungwe. Kangaije Agripa wakarangarira kuti kudira vapostori mukadheya akuzivi kumbobesera ciro inga zvatakavona mu cipauko 5. Acikadi kuti izvi zviitike, Agripa wakaita kuti Pedhru asugwe ngo magaragajero, nokuita kuti angwaririhwe ngo masoca maviri. Perapo wakadira masoca anokwana kuita 16 aiita ngo kucinjana usiku no masikati kuti vangwarire Pedhru kuti atame kutiza. Kudari akazotiza masoca aya aizopuwa ndava. Pa mugariro uwu wakashatisisari, Makristu ainamata na Pedhru aizoitenyi?

⁸ Ungano yaitonasa kuzviziva zvayaitodikana kuita. Pana Mabasa o Vapostori 12:5 panoti: “Ngo kudaro, Pedhru wakadihwa mukadheya, asi ungano yaienderera mberi yeciita mukumbiro kuna Mwari ngo pamusoro pake.” Icokwadi kuti vaiitira mukumbiro ngo mwoyo wese hama yavo yavaida maningi. Kufa ka Jakobo akuzivi kuvaita kuti vakane-kane, kana kurangarira kuti mukumbiro aucaishandazve. Kuna Jehovha, mukumbiro iciro cinosisira maningi. Kudari ukazwirana no kuda kwake, anoudavira. (Vah. 13:18, 19; Jak. 5:16) Ici i cijijo cinosisira maningi ku Makristu nyamasi uno.

9. Tinojijenyi ngo zvakaitwa ngo Makristu ainamata na Pedhru ngo pamusoro po mukumbiro?

⁹ Imwimwi munonasa kuziva hama jiri kusongana no zvineso? Kangaije vari kuhwisana no kuteverehwa, kurambijwa ko basa redu no ngozi jiri kuitika jega. Waro ngenyi amubatanijivo hama iji pa mukumbiro jenyu? Kangaije munoziva hama iri yese iri kusongana  no zvineso zvokuti zvinonesa kuzvivona, inga zvineso zvo mbhuri, kuthimwa-thimwa no zviro zvimweni zviri kueja rutendo hwavo. Mungarangariravo ngo manera amungakumbirira hama no hambzaji jenyu, mecitoshandisa mazina avo kamare mucito mabhuya na Jehovha, ‘Muzwi wo munamato.’ (Ndu. 65:3) Imwimwivo munotodavo kuti hama no hambzaji jimuitirevo mukumbiro pamunonga mecisongana no zvineso.

10, 11. Sananguranyi kuitisa kudini ngirozi ya Jehovha yakabudisa Pedhru mu kadheya.

¹⁰ Kureva kuti Pedhru wakaneseka ngo dambujiko raaisongana naro? Atizvizivi, asi pa usiku wondhowo, paainga mu kadheya waitovata ecingwaririhwa ngo masoca maviri. Mwanarume uu wo rutendo waizviziva kuti azvinenyi no zvaizoitika pa njiku yaizotevera, Jehovha waizomutaja. (Var. 14:7, 8) Asi Pedhru aacaivetera mushamaiso jaidari kuitika. Ngo civhumbu, mukadheya makatanga kuvoneka ruvheneko wo ngirozi, asi vangwariri avazivi kukwanisa kuivona. Iyona yakavhunja Pedhru ngo kukasika kuti amuke. Magaragajero aaingari na Pedhru, aivoneka inga akavanga maningi asi akazodajuka.

¹¹ Ngirozi yakananga zvaidikana kuithwa ndi Pedhru ngo kukasika. Iyona yakati: “Mukai ngo kukasika, nasirirai, perepo usimire magwada ako, simirai nguvo yako yo kunja.” Pedhru wakazwira ngo kukasika zvaakavhunjwari. Pakupejisira ngirozi yakati: ‘Nditeverei’ Pedhru wakaitevera. Ivona vakabuda mu kadheya, vakapinda ngo painga no vangwariri vainga ngo kunja, vakafamba mu cinyararire mbhera voguma ku musuvo wo simbi. Vaizokwanisa kudini kubuda pa musovo uu wo simbi? Kangaije Pedhru waitongawo anawo muvhunjo uu, asi wakadavihwa ngo kukasika. Povakaguma pamusuvopo, “iwona wakafununguka wega.” Pa museswa munganani basi, vakakwanisa kupinda ngo pamusuvo uu, voguma ku gwanja i ngirozi yakangarangaka Pedhru wosiiwa pondhopo. Pedhru paakazozwisisa zvese zvainga zvaitika, wakavona kuti akucainga kurota, asi wainga watovhiswa kamare mu kadheya.—Mab. 12:7-11.

12. Ngenyi zvinotivangisa kurangarijisisa ngo manera Jehovha wakabudisa Pedhru?

¹² Azvitivangisi kurangarijisisa simba rina Jehovha ro kuponesa vashandiri vake? Pedhru wainga wakadihwa mukadheya ngo umwe mutongi waibesehwa ngo utongi hwainga no simba guru munguva jondhojo. Asi Pedhru wakatobuda mu kadheya ecifamba kamare. Icokwadi kuti Jehovha aazivi kuita mushamaiso uwu kuno vashandiri  vake vese. Inga muezaniso, mushamaiso uwu auzivi kuitika kuna Jakobo pikija na iyenavo Pedhru pa kufamba ko nguva apo masoko a Jesu ngo pamusoro pake akakwanirisika. Nyamasi uno Makristu aaveteri mushamaiso asi tinoziva kuti Jehovha aazivi kucinja. (Marak. 3:6) Sambiri pano Jehovha anozoshandisa mwana wake kuti asujunure mamiriyau o vandhu acikaverengeki mukadheya inonesa maningi kubuda yo rufu. (Joh. 5:28, 29) Kuziva izvi kunotipa cicunge kuti tihwisane no muejo.

13-15. (a) Makristu ainga akaungana pa muzi pa Mariya akajizwa kudini povakavona Pedhru wabudiswa mukadheya? (b) Pasure po kubhuiwa ko mupostori Pedhru, bhuku ra Mabasa rinotanga kubhuya ngo pamusoro pani? Asi Pedhru anoenderera mberi eciitenyi?

¹³ Pedhru wakagara akaima pa citaka ici ecirangarira kuti ngokwapi kwaaida kwenda, perapo wakaceukija kuti imwe hambzaji inozwi Mariya yaigara phedopo. Zvinovoneka inga kuti mwanakaji uu wainga noni i aacaingepi murombo. Wainga no nyumba huru, zvokuti ungano yese yaizotoviya konamatirepo. Iyena wainga mai wa Johani waidanijwa Marko, anonangwa pa vhaza yo kutanga pa Mabasa o Vapostori. Pa kufamba ko nguva Marko wakazotova inga mwana wa Pedhru. (1 Ped. 5:13) Vandhu vazinji wo mu ungano vainga vakaungana pa muzi pa Mariya, veciiita mukumbiro pikija kwainga kwaa usiku. Icokwadi kuti ivona vaiita mukumbiro kuti Pedhru abudiswe, asi avacaiziva kuti ngowapi waizova mupinguro wa Jehovha.

¹⁴ Pedhru wakaguma pondhopo wotaka musuvo, perapo mushandikaji wo cimusikane anozwi Rodha, zina iri ngo Cigiriki recida kureva “Roza,” wakaenda kovona kuti wainga ani. Iyena wakazwa izwi ra Pedhru, wakadakara maningi. Kusiyapo kufunungura musuvo, wakasiya Pedhru wakaima kunja, wogogoma kwenda mumba maingari no vandhu ava, wovavhunja kuti Pedhru wainga ari kunja. Ivona vakamuvhunja kuti ari kupenga asi iyena wakaenderera mberi ecinanga zvondhozvo ngokuti waizviziva kuti wainga ecibhuya cokwadi. Vecitenderana ngo zvaibhuiwa ngo mushandikaji uu, vamweni vavo vakananga kuti kangaije yainga ngirozi yaiimirira Pedhru. (Mab. 12:12-15) Pedhru wakaenderera mberi ecitaka musuvo, pakupejisira vakazoenda kofunugura.

¹⁵ Povakaguma pa musuvo, “vakamuvona vokahamara.” (Mab. 12:16) Ivona vakadakara maningi mbhera Pedhru ovavhunja kuti vanyarare kuti avavhunje zvainga zvaitika no kuzovhunjavo masoko aya Jakobo no hama jimweni. Perapo wakavavhunjazve kuti waidikana kupinda kuti masoca a Agripa atame kumubata. Pedhru wakaenda ku  ndau yakangwaririka kuti aenderere mberi eciita basa rake naakagondeka. Pasure pa izvi, bhuku ra Mabasa rinotanga kubhuya maningi ngo mabasa no hwendo ja mupostori Pauro. Pana Mabasa o Vapostori cipauko 15, cinobhuya ngo basa guru raakazoita Pedhru, rokubesera Makristu ngo ndava yo kusokwa. Asi tingava no cokwadi, cokuti iyena wakavangisa rutendo hwo hama no hambzaji ku ndau yaakaendaro. Pedhru paakabuda pa muzi wa Mariya pa usiku hwiya, Makristu aaingaya akaungana pondhopo akasara akadakara maningi.

16. Ngenyi kumbeji kotiri kuveterari kunozova kwecidakajisa?

¹⁶ Nguva jimweni Jehovha anoitira zviro vashandiri vake zvokuti avacaitozvivetera, i zvinoita kuti vadakare maningi. Makristu akavonaya Pedhru wapera kubudiswa mu kadheya, vakadakaravo. Nyamasi unovo tinodakara maningi patinoashira makomborero a Jehovha. (Mazwi 10:22) Kumbejiyo tinozovona zvigondiso zvese zva Jehovha zvecikwanirisika mu nyika yese. Zvinozoitikari, zvinozova zvecidakajisa maningi kutopinda zviya zvatiri kurangarira. Ngokudaro, kudari tikaenderera mberi takagondeka, tingava no cokwadi cokuti tinozova no mukuvo unodakajisa maningi kumbejiyo.

17, 18. Ngenyi Agripa wakazoguma pakunamathwa?

¹⁷ Kubuda kwaakaita Pedhru, kwakashamaisa Agripa. Iyena wakanyangajwa maningi, ngokudaro wakatuma vandhu kuti vamupsake ku ndau yese i wakavhurunguja vangwariri. Iyena wakaita kuti vangwariri ava, “vapanicwe,” kangaije kutouraiwa kamare. (Mab. 12:19) Agripa aazomborangarihwizve ngokuti aazivi kukhombija pena. Kureva kuti mwanarume uu wakashatari wakapanicwa?

¹⁸ Zvinovoneka inga kuti Agripa, wakanyowejeka maningi ngo kukonehwa kuuraya Pedhru, asi wakapsaka manera okufukijira nyowa iji. Kwakabuda njara, zvoita kuti vavengi va Agripa vaende kwaari kuti vaite runyararo, iyena wainga ecinasirira kuti aende koita hurukuro ku vandhu vakawanda. Ruka anonanga kuti Agripa paainasirira kuti aende kooita hurukuro iyi, “wakasimira nguvo jo umambo.” Josefo umwe Mujudha, wakananga kuti nguvo ja Agripa, jakaitwa ngo ndarama zvoita kuti pavaibwatija marujhu, iyena waivoneka inga kuti ari pa cigaro co kutonga. Vandhu vakatanga kumunamata veciti: “Izwi iri asipi ro mundhu, ndha mwari.”—Mab. 12:20-22.

19, 20. (a) Ngenyi Jehovha wakapanica Agripa? (b) Tinojizwa kudini ngo kupanicwa kwakaithwari Agripa?

¹⁹ Kukujwa uku kwaifanera Jehovha i iyena waizvivona zvese izvi. Agripa wainga no mukana wokutama kuita zviro zvakashatisisa.  Iyena waitodikana kutonga vandhu ava kana kutotama kutenderana no murangariro wavo. Kusiyapo izvo, iyena wakatoita kamare zvinonangwa pana Mazwi Akangwara zvokuti: “Theka rinotungamirira rufu.” (Mazwi 16:18) “Ngirozi ya Jehovha yakamutaka,”zvoita kuti mambo uu wakashatari, afe mu njira inothisa. Agripa, “wakahiwa ngo honye wofa.” (Mab. 12:23) Josefo, wakataravo kuti Agripa wakaita ngo kutakwa ngo civhumbu, i wakanangazve kuti mambo uu wakatozviziva kuti wakafa ngo ndava yo kutendera kunamathwa ngo vandhu ava. Josefo wakananga kuti Agripa wakazofa nopapera njiku shanu. b

²⁰ Nguva jimweni zvinovoneka kuti vandhu vakashata, vanoita zvese zvavanoda zvakashata asi apana cinovaitikira. Izvi azvidikani kutishamaisa ngokuti “nyika yese iri mu nyara ya Sathana.” (1 Joh. 5:19) Pikija zvakadaro, vashandiri vakagondeka va Jehovha nguva jimweni, vangatohwajihwavo ngo kuvona vandhu vanoita zviro zvakashata votama kupanicwa. Asi zvakaitihwari Agripa zvinotinyaraja. Tinokwanisa kuvona Jehovha eciita ciri cese i tinoceukija kuti iyena ndi Mwari wo urungami. (Ndu. 33:5) Pikija zvingatononoka, Jehovha nguva jese anoita zviro zvakarurama.

21. Cijijo capi cikuru catinowana pana Mabasa o Vapostori cipauko 12, ngenyi izvi zvinotivangisa?

²¹ Ciitiko ici cinotipa cijijo cinodakajisa maningi cokuti: “Soko ra Jehovha, raienderera mberi recikura no kuparajika.” (Mab. 12:24) Reratoriyo ngo pamusoro po kukura ko basa ro kucumaera, inoticeukija manera Jehovha ari kukomborera basa iri ro kucumaera nyamasi uno. Zvakanasa kujeka kuti zvinonangwa pa Mabasa o Vapostori cipauko 12, azvinangiri basi ngo kufa ko vapostori no manera vamweni vakaponeswa. Cinobhuya ngo pamusoro pa Jehovha no manera akahwisana na Sathana apo paaida kupeja ungano yo Cikristu no basa ro kucumaera. Kuhwisa kaakaitari Sathana akuzivi kubudirira i zvese zvaari kunasirira kuti azohwise vandhu va Jehovha, azvizobudiririvo. (Is. 54:17) Vese vaya vari ku divi ra Jehovha no ra Jesu, vanobatikana pa basa ro kucumaera iro rinoenderera mberi pikija no muejo ja Sathana. Izvi azvitivangisi? Icidakajiso cikuru catinaco co kubesera kuzivisa “soko ra Jehovha” nyamasi uno.