CIPAUKO 19
“Endererai Mberi Wecivereketa, Ucanyararisa”
Pauro anoshanda kuti ajisapote asi anodira pakutanga basa ro kucumaera
Zvakacijikira pana Mabasa o Vapostori 18:1-22
1-3. Ngenyi mupostori Pauro wakaenda ku Korinto, zvineso zvapi zvaakasongana nazvo kondhono?
GORE 50 Kristu Aviya riri kupera. Muposotori Pauro ari ku Korinto, mu dhorobha iri munoithwa maningi zvonyagoso, ikona kuno Vagiriki vakawanda, Varoma no Vajudha. a Asi Pauro aaripi kutenga kana kutengesa zviro nee kupsaka basa. Iyena ari ku Korinto ngo thangwe rinosisira maningi, ro kupa ucapupu ngo pamusoro po Umambo hwa Mwari. Pa mukuvo wondhowo, Pauro anoda ndau yo kugara, asi aadi kupa basa guru ku vamweni. Iyena aadi kuti vandhu varangarire kuti iyena ari kupona basi ngo ndava yo soko ra Mwari. Waro anozoitenyi?
2 Pauro anokwanisa kuvaka tende. Aricainga basa rakareruka ngokuti raida simba, asi Pauro anoda kuriita kuti ajisapote. Kureva kuti anozokwanisa kuwana basa mu dhorobha iri? Anozokwanisa kuwana ndau yaushoni yokugara? Pikija no zvineso zvese izvi, Pauro anoenderera mberi wakabatikana pa basa guru raanaro ro kucumaera.
3 Pauro wakazogara ku Korinto ko mukuvo wakareba, wobudirira pa basa rake ro kucumaera. Tinojijenyi ngo mabasa a Pauro ku Korinto, iwona anozotibesera kudini pa kupa ucapupu hwakaperera ngo pamusoro po Umambo hwa Mwari mu ndima yedu?
“Vainga Vaiti vo Matende” (Mab. 18:1-4)
4, 5. (a) Pauro wakagara kwapi paainga ku Korinto, waiita basa rapi ku ajisapote? (b) Pauro wakajijira kwapi basa iri?
4 Naapera kuguma ku Korinto, Pauro wakasongana no varovorani vanoashira ushoni varendo vanozwi Akira no mukaji wake Prisira. Varovorani ava vakaenda ku Korinto ngo ndava yo mutemo wa Mambo Kraudhiyo wokuti “Vajudha vese vaidikana kubuda mu Roma.” (Mab. 18:1, 2) Akira na Prisira vakaashira Pauro pa nyumba yavo, vozvipira kuti vashande naye. Bhaibheri rinoti: “Zvecivoneka kuti vainga no mabasa akaezana okuita tende, [Pauro] wakagara pa nyumba pavo ecishanda navo, ngokuti vainga vaiti vo matende.” (Mab. 18:3) Pauro wakagara pa muzi po varovorani ava paiita basa rake ro kucumaera ku Korinto. Pa mukuvo uu, kangaije Pauro wakatara karata nganani jakazoguma pa kuita divi ro Bhaibheri. b
5 Kuitisa kudini Pauro wakanasaya kujijiswa “ndi Gamariyeri” waikwanisa kuita tende? (Mab. 22:3) Zvinovoneka kuti Vajudha vo muzana ro kutanga ro makore, avacaivona kuti kujijisa vana vavo basa, zvainga zviro zvinonyoeja pikija ivona vaizojijazve maningi. Pauro wainga wo ku Tarso dhorobha ro ku Sirisiya, ndau yaizivika maningi ngo tesidhu yaizwi Sirisiumi yaishandiswa pa kuita tende. Ngo kudaro, zvingaita kuti Pauro wakajijira basa iri aciri cimujaha. Basa iri raibatanijenyi? Kangaije raibatanija kumwesa, kuceka kana kusona tesidhu yakavanga maningi kuti vaite tende. Azvinenyi hazvo, basa iri raida simba kamare.
6, 7. (a) Pauro waivona kudini basa rake ro kuita tende, tinozvizivisa kudini kuti Akira na Prisira vaingavo no mavonero ondhoo? (b) Makristu nyamasi uno ari kutevejera kudini muezaniso wa Pauro, Akira na Prisira?
6 Pauro aacaivona basa ro kuita tende inga basa raadikana kuita ko mukuvo wakareba. Waiita basa iri basi kuti awane zvokupona ndizvona paiita basa rake ro kucumaera masoko akanaka acikapuwi “ciri cese.” (2 Vak. 11:7) Akira na Prisira vaivonavo kudini basa ravo? Zvecivoneka kuti vainga Makristu, ivona vainga no mavonero akaezana no a Pauro. Ngo kudaro, Pauro paakubuda mu Korinto mu gore ra 52 Kristu Aviya, Akira na Prisira vakasiya nyumba no basa ravo voenda naye ku Efeso, nyumba yavo yakazoshandiswa inga ndau yo kuitira musongano yo ungano yo kondhono. (1 Vak. 16:19) Pakufamba ko nguva, ivona vakazohwirira ku Roma perapo voendazve ku Efeso. Varovorani ava vaidira pakutanga zvinodiwa zvo Umambo, ngo mwoyo wese vaizvipira kuti vashandire vamweni, zvoita kuti “ungano jese jo vandhu vo majinja” jivabongesere.—Var. 16:3-5; 2 Tim. 4:19.
7 Makristu nyamasi uno anotevejeravo muezaniso wa Pauro, Akira na Prisira. Makristu mazinji, anoshanda ngo simba ‘kuti vatame kuva muthwaro’ ku vamweni. (1 Vat. 2:9) Zvinoshamaisa maningi kuvona hama no hambzaji zinji jiri mu nguva yakazara, jecipsaka basa ro nguva shoma kuti vakwanise kuwana zvokupona ndizvona no kuenderera mberi pa basa guru ravanaro ro kucumaera. Inga Akira na Prisira, vashandiri vazinji va Jehovha vari kupa ngo mwoyo wese po kugara vavonereri vo ndharaundha. Vaya vari “kuashira varendo” vanozviziva kuti izvi zvinodakajisa no kuvangisa.—Var. 12:13.
“Vakorinte Vazinji . . . Vakatanga Kutenda” (Mab. 18:5-8)
8, 9. Pauro wakaitenyi vandhu pavakaramba kuzwa masoko aicumaera, iyena wakazoenda kocumaera kwapi?
8 Zvimweni zvinovonesa kuti Pauro waivona basa ro kuita tende inga njira yo kukwanisa kuita basa rake guru, ngo zvakaitika Sira na Timoti povakavha ku Masedhoniya no zvipo zvakawanda. (2 Vak. 11:9) Ngo kukasika, Pauro “wakatanga kubatikana pa kucumaira soko ra Mwari.” (Mab. 18:5) Asi kucumaera kwaaitari ku Vajudha kwakabara kuteverehwa kukuru. Kuti avonese kuti iyena aacainga no ndava ngo kuramba kwavo kuaashira masoko aizoponesa upenyu hwavo, Pauro wakavhuruza nguvo jake, ovavhunja kuti: “Ngazi yenyu ngaiwire pa musoro penyu. Andina ndava pa shwiro iyi. Kuvhira wari, inini ndiri kuenda ku vandhu vo majinja.”—Mab. 18:6; Ezek. 3:18, 19.
9 Pauro wakaenda kocumaera kwapi? Mwanarume umweni anozwi Titiyo Jhustu, wainga wo majinja, waigara phedo no sinagoga, wakatendera kuti Pauro aviye ku muzi kwake. Ngo kudaro, Pauro wakaendeyo. (Mab. 18:7) Pauro wakaenderera mberi ecigara na Akira na Prisira paainga ari ku Korinto, asi kazinji waishandisa nyumba ya Titiyo Jhustu kuti aronge mabasa ake o kucumaera.
10. Zvicinyi zvinovonesa kuti Pauro acaibatikanepi pa kucumaera vandhu vo majinja basi?
10 Kureva kuti masoko a Pauro okuti ari kwenda ku vandhu vo majinja, anovonesa kuti iyena wakaima kamare kucumaera Vajudha vese no vatendeuki, pikija na vaya vainga no mwoyo wakanaka? Haiwa. Inga muezaniso, “Krispo, mutungamiriri wo sinagoga, wakava mutendi wa Mambo no vandhu vese vo pamuzi pake.” Kangaije vazinji vaienda ku sinagoga vakazobatana na Krispo ngokuti Bhaibheri rinoti: “Vakorinte vazinji vakazwa soko vakatanga kutenda, vobhabhatijwa.” (Mab. 18:8) Ngo kudaro, nyumba ya Titiyo Jhustu yakazoshandiswa inga ndau yo kunamatira ku Makristu mapsa aya. Kudari ciitiko ici cakatahwa mukuzwirana no mukuvo wo zvakaitika, kutendeuka uku ko Vajudha no vamweni kwakaitika pasure pokuti Pauro wakavhuruza nguvo jake. Izvi zvinovonesa kuti Pauro wainga mundhu wakaezanana.
11. Zvapupu zva Jehovha zvinotevejeresa kudini Pauro pavanocumaera vandhu vanojivona kuva Makristu?
11 Mu nyika jakawanda muno zviyara zvizinji zvo Kiristandadhe, izvona zvinokwevejera maningi vandhu vavo. Mu nyika jimweni, mamisiyonariyo o Kiristandadhe anotendeusa vandhu vakawanda. Vazinji vanojivona kuva Makristu, vanovangirijwa kuzwira zvirovejeso zvavo inga zvaiithwa ngo Vajudha vo ku Korinto vo muzana rokutanga ro makore. Asi inga ndi Pauro, itusu Zvapupu zva Jehovha tinovangisira pa kucumaera vandhu ava, tecishandisa uzivi hwavanahwo hwo Bhaibheri kuti tivajekesere zvokadi zvinowanika mu Bhaibheri. Pikija ivona kana vatungamiriri vavo pavanotiteverera, itusu atiruzi vetero. Pakati pa vaya ‘vanovangisira maningi mu basa ra Mwari, asi vacikazviiti ngo zivo yakarungama,’ pangava no vazinji vanoda cokwadi.—Var. 10:2.
“Ndino Vandhu Vakawanda Vari mu Dhorobha Iri” (Mab. 18:9-17)
12. Pauro wakathembeswenyi pa civoniso?
12 Kudari Pauro wakajivhunjisa dangani waidikana kuenderera mberi ecicumaera mu Korinto, iyena wakawana mupinguro pa usiku hwokuti Mambo Jesu wakamugumira ngo civoniso, omuvhunja kuti: “Ucadothya, asi endererai mberi wecivereketa, ucanyararisa, ngokuti ndina iwewe, akuna mundhu anozokuhwisa kuti akukhuvaze; ngokuti ndino vandhu vakawanda vari mu dhorobha iri.” (Mab. 18:9, 10) Civoniso ici cakamuvangisa maningi. Mambo Jesu wakagondesa Pauro kuti waizomujivirira ku vavengi vake i kwainga no vazinji vaida kuzwa masoko akanaka. Waro Pauro wakazoitenyi? Bhaibheri rinoti: “Iyena wakagareyo gore no mweji mutandhatu, ecijijisa soko ra Mwari pakati pavo.”—Mab. 18:11.
13. Kangaije Pauro wakaceukijenyi paaikhwedera pa tiribhunari, ngenyi waizothemba kuti izvi azvicaizomuitikiravo?
13 Nopapera gore rimwe naari ku Korinto, Pauro wakavonazve kuti Jesu waimubesera. “Vajudha vakazwirana kuti vahwise Pauro no kumuendesa ku vatongi” kana ku tiribhunari yaizwi bhema. (Mab. 18:12) Iyi yaivoniwa ngo vamweni kuva ndau yakakhwirira, yakaitwa ngo zviro zvakasejesesa, yainga no zvithombe zvakawanda, iyona yainga iri pakati po bazari guru ro Korinto. Ndau yainga pambeji po tiribhunari iyi yainga yakakura zvokuti yaikwana vandhu vakawanda. Vapsakisisi vanonanga kuti yainga phedo po sinagoga kana phedo po nyumba ya Titiyo Jhustu. Paaikwedera pa ndau iyi, kangaije Pauro wakaceukija kufuhwa ka Estefano ngo mapuwe, uwo wakava mundhu wokutanga kutambujwa ngo njira iyi. Pauro kana Sauro inga zvaaidanijwa pa mukuvowo, wakatendera “kuti Estefano aurawe.” (Mab. 8:1) Kureva kuti izvi zvaizoitikiravo Pauro? Haiwa, ngokuti Jesu wainga wakamuthembesa kuti ‘akuna mundhu . . . anozokukhuvaza.’—Mab. 18:10.
“Wakavabudisa pamberi po vatongi.”—Mab. 18:16
14, 15. (a) Vajudha vakanangenyi ngo pamusoro pa Pauro, ngenyi Gariyo wakafungisa shwiro iyi? (b) Zvicinyi zvakaitika na Sosteni, kangaije ngowapi wakava muviyo?
14 Zvicinyi zvakaitika Pauro paakaguma ku tiribhunari? Mutongi, wainga govhernadhori Gariyo wo ku Akaya, nevanji vo muzivi anozwi Seneka. Vajudha vakananga kuti Pauro “ari kukhohwesa vandhu kuti vanamate Mwari ngo maitiro anohwisana no mutemo.” (Mab. 18:13) Vajudha vainanga kuti Pauro waitendeusa vandhu naacikazivi kutendehwa. Asi Gariyo wakavona kuti Pauro wainga acizivi kuita “ciro cakashata kana kuti cishaishi cikuru.” (Mab. 18:14) Gariyo aacaida kunghwinira pa mapope aya o Vajudha. Iyena wakatofungisa shwiro iyi, Pauro naacikazivi kuvereketa ciri cese. Asi vavengi va Pauro vakanyangajwa maningi, vobata Sostene wainga wacinja Krispo pa cigaro co mutungamiriri wo sinagoga “votanga kumutaka pamberi po vatongi.”—Mab. 18:17.
15 Ngenyi Gariyo aazivi kurambisa vandhu kutaka Sostene? Kangaije Gariyo wakarangarira kuti Sostene wainga mutungamiriri wo vandhu ava vaidaro kuuraya Pauro zvokuti wainga eciashira zvaaifanera. Azvinenyi hazvo, kangaije ciitiko ici cakavisa muviyo jaushoni. Pa karata yake yokutanga ku ungano yo Korinto, yaakazotara makore manganani akazotevera, Pauro wakadanija Sostene kuti hama. (1 Vak. 1:1, 2) Kureva kuti wainga Sostene wondhowo wakatakwaya? Kudari ndiyena, kutakwa kwake kwakamubesera kuti atendere jijiso ja Kristu.
16. Magama a Jesu okuti “ucadothya, asi endererai mberi wecivereketa, ucanyararisa, ngokuti ndina iwewe” anotindunda kuti tiitenyi mu basa ro kucumaera?
16 Ceujanyi kuti Mambo Jesu wakathembesa Pauro, Vajudha novapera kuramba masoko ake, iyena wakati: “Ucadothya, asi endererai mberi wecivereketa, ucanyararisa, ngokuti ndina iwewe.” (Mab. 18:9, 10) Zvaushoni kuceukija masoko aya, maningi-ningi vandhu pavanoramba masoko atinocumaera. Mucakanganwa kuti Jehovha anovona mwoyo, perapo wokwevera vanoda cokwadi. (1 Sam. 16:7; Joh. 6:44) Izvi zvinotivangisa kuti tienderere mberi takabatikana mu basa ro kucumaera. Makore ese, zviuru no zviuru zvo vandhu vari kubhabhatijwa dhiya jese. Kuna vaya vanozwira mutemo wo ‘kujijisa vandhu vo majinja ese,’ Jesu anovathembesa kudari: “Ndina imwimwi mbhera pa kupera ko nyika.”—Mat. 28:19, 20.
“Kudari Jehovha Akada” (Mab. 18:18-22)
17, 18. Kangaije Pauro wairangarirenyi paienda ku Efeso?
17 Atina cokwadi cokuti zvakaitari Gariyo kuna vaya vaipumbha Pauro zvakaita kuti ungano yo Cikristu yo ku Korinto ive no mukuvo wo runyararo. Asi Pauro wakagareyo “njiku jakawanda” acito aenekana no hama. Pakati po gore ra 52 Kristu Aviya, iyena wakaita urongwa wo kwenda ku Siriya ngo piketi, wakaipakira ku Kenkreya, kuvha ku dhorobha iri mbhera ku Korinto painga no makiromita anokwana 11 basi. Acito abuda ku Kenkreya, Pauro “wakagundhwa vhuji rake . . . , ngokuti wainga aita mbhiko.” c (Mab. 18:18) Perapo, iyena pamwepo na Akira na Prisira vakaambuka Murambo Ajheu vecienda ku Efeso, ku Aziya Menori.
18 Piketi payaienda ku Kenkreya, kangaije Pauro wairangarira mukuvo waakapeja ku Korinto. Iyena waiceukija zviro zvizinji zvaushoni, waidakara ngo zvaakaita kondhono. Kucumaera kwake kondhono ko gore rimwe no meya kwakavisa muviyo jaushoni. Ungano yo kutanga ku Korinto yainga yaumbhwa, nyumba ya Titiyo Jhustu yaishandiswa inga ndau yo kuitira musongano. Pakati pa vaya vainga vava Makristu painga na Titiyo Jhustu, Krispo no mbhuri yake no vamweni vazinji. Pauro waida maningi hama iji wari ngokuti wainga akajibesera kuti vave Makristu. Pa kufamba ko nguva, Pauro wakavatarira karata ecinanga kuti ivona vaidakajisa maningi mwoyo wake. Itusuvo tinojizwa phedo na vaya vatakava no mukana wo kubesera kuti vatendere manamatire o cokwadi. Tinovona vandhu ava kuva karata ‘yakatahwa mu mwoyo yedu.’—2 Vak. 3:1-3.
19, 20. Pauro wakaitenyi paakaguma ku Efeso, tinojijenyi patinoda kudadamira zvido zvoumwari?
19 Paakaguma ku Efeso, ngo kukasika wakatangisa basa rake. “Iyena wakanghwina mu sinagoga, wobesera Vajudha kuzwisisa Matahwa.” (Mab. 18:19) Pa vhaza iyi Pauro wakagara mukuvo mushoma ku Efeso. Pikija kuti ivona vakamukumbira kuti agareyo mukuvo wakareba, “iyena wakaramba.” Wakavaeneka ovavhunja kuti: “Ndinozoviyazve komuvona kudari Jehovha akada.” (Mab. 18:20, 21) Pauro waizviziva kuti ku Efeso kwaitodikana kuitwa basa guru ro kucumaera. Iyena waitoda kuviyazve asi wakasiya shwiro iyi mu nyara ja Jehovha. Uu asipi muezaniso waushoni wokutevejera? Patinopsaka kudadamira zvido zvoumwari, tinodikana kutanga kuita ciri cese. Asi nguva jese tinodikana kuthemba ndhungamiriro ja Jehovha no kuita zviro mukuzwirana no kuda kwake.—Jak. 4:15.
20 Naapera kusiya Akira na Prisira ku Efeso, Pauro wakaenda ngo piketi ku Sezareya. Kangaije iyena “wakaenda” Jerusarema wocungamija ungano kondhono. (Mab. 18:22) Perapo, wakaenda ku Antiyokiya yo Siriya kwaairongera basa rake ro misiyonariyo. Hwendo hwake hwocipiri inga misiyonariyo hwakaperera apa. Waro zvicinyi zvakazoitika pa hwendo hwake hwocitatu no hwo kupejisira inga misiyonariyo?
a Vonanyi bhokiso rinoti “ Ku Korinto Kwainga no Ndau Mbiri Jaicevera Piketi” pa pheji 169.
b Vonanyi bhokiso rinoti: “ Karata Jakafemehwa Jakapa Vangiso,” pa pheji 172.
c Vonanyi bhokiso rinoti “ Mbhiko ya Pauro,” pa pheji 174.
