Naapera 40 o dhiya Jesu ari mu zvipare zve acito ahwirira Garireya, wakahwirira ka Johani, wakamubhabhatijaya. Johani paakavona Jesu acikhwedera, wakamukhombija, wobvunja vaingepo kudari: “Nga iri bvuta ra Mwari rinofujura uxaixi hwo nyika. Nga uu wondakananga ngo njio yake kuti: ‘Sure kwangu anozoza mundhu anondipinda; ngokuti waingepo, inini ndicipo.’” (Johani 1:29, 30) Pikija kuti Johani ndi dhodha padoko kupinda Jesu, anozviziva kuti Jesu waingeyo mugore kareko inga cisikwa co kumujimu.

Jesu paakaviya kuzobhabhatijwa pa sumana nganani jakapera, Johani aacainga no cokwadi cokuti Jesu anozova Mesiya. Johani anotonanga ega kuti “inini andicaimuzivepi, kaveta ndaza kobapatiza ngo kumwa kuti atatijwe ku vaIsraeli.”—Johani 1:31.

Johani anobvunja vapurutani vake zvakaitika paakabhabhatija Jesu eciti: ‘Ndakavona Mujimu wecibzuka mugore inga njiva, womata panyezuru pake. Inini andicaimuzivepi; kaveta wiya wakandituma kobhabhatija ngo kumwa wakandibvunja kuti: Wiya wo unozovona eciderukihwa ngo Mujimu unomata panyezuru pake, ndi yena anobhabhatija ngo Mujimu Mucena. Inini ndinomuziva no kufakaza kuti ndiyena Mwana wa Mwari.’—Johani 1:32-34.

Pa njiku yakatevera, Johani ano vajiji vake vaviri Jesu paakakhwederazve. Johani anonanga kuti: “Nga iri bvuta ra Mwari.” (Johani 1:36) Ngo kunanga kwa Johani Mubhabhatiji kudaro, vajiji vake vaviri ava votevera Jesu. Umwe wo vaviri ava anodanijwa kuti Andereya. Umweni anodanijwavo kuti Johani, anoita inga ndiyena wakatara zviitiko izvi. Zvinovoneka kuti Johani i hama ya Jesu, mwana wa Saromee. Kangaije Saromee i munukuna wa Maria, mukaji wa Zebhedheu.

Jesu paakatendeuka wovona Andereya na Johani vecimutevera, wakabvunjisa kuti: ‘Munopsangenyi?’

Ivona vakadavira kuti ‘mujijisi, munogara kwapi?’

Jesu wakadavira kuti “izanyi, muvone.”—Johani 1:37-39.

Jaa nguva murongomuna jo madeko, zve Andereya na Johani vanogara na Jesu pa mukuvo wasararo wo njikuyo. Andereya anodakajihwa maningi zvokuti anoenda kopsaka hama yake inozwi Simoni, anodanijwazve kuti Pedhru, womubvunja kuti “tawana Mesia.” (Johani 1:41) Andereya anoenda na Pedhru kuna Jesu. Zviitiko zvinotevera zvinovonesa kuti Johani wakapsakavo Jakobo woenda nae kuna Jesu; asi, Johani aazvinangi paanotara zviitiko zvi.

Pa njiku inotevera, Jesu anowanana na Firipi wo Bhetsaidha, dhorobha riri kanjikazi ko mbhiripiri  yo Jombe ro Garireya. Ngo dhorobha rakabarihwa Andereya na Pedhru. Jesu anokoka Firipi kuti: “Nditeverei.”—Johani 1:43.

Firipi anowanavo Natanaeri, anodanijwazve kuti Bhartoromeu, womubvunja kudari: “Tawana wiya wakatahwa ngo njio yake mu Mupango ya Mosi no Vaporofeti: Jesu wo Nazareta, mwana wa Josefa.” Natanaeri aazvitendi wobvunja Firipi kuti: “Ku Nazareta kungabvavo bzauxoni kani?”

Firipi anomukoka kuti: “Izai uvone.” Jesu wovona Natanaeri acikhwedera, womubvunja kudari: “Nga uu muIsraeli wauxoni, acina manyepo.”

Natanaeri wobvunjisa kuti: “Unondizivira kwapi?”

Jesu wodavira kudari: “Filipe acito akakudana, inini ndakakuvona pasi po mukuyu.”

Natanaeri wodavira ecikahamara kuti: “Rabi, imwimwi muri Mwana wa Mwari, muri mambo wo vaIsraeli.”

Jesu wopingura kuti: “Unotenda ngo ndava yo kunanga kuti ndakakuvona pasi po mukuyu? Unozovona bziro bzikuru kupinda ibzi.” Perepo Jesu womugondesa kuti: “Bzokadi ndinokubvunja kuti: munozovona ku denga kwakazauka, no ngirozi ja Mwari jecikhwira no kuderuka panyezuru po Mwana wo mundhu.”—Johani 1:45-51.

Pozvakandopera izvi, Jesu no vajiji vake vapsa ava vanobva pa muterero wo Jordhani zve vanofamba kuenda ku Garireya.