Jesu aciri mu Pereya maari kupinda ndimona ecienda ku Jerusarema. Jaha rimweni rakakhupuka rinoenda kuna Jesu ropfukama. Jaha iri ndi umwe wo mutongi, kangaije umwe wo mutungamiriri wo musinagoga kana umwe wo cikwata co mu Sinedhrio. Iyena anobvunjisa kuti: “Mujijisi wauxoni! Ndinozoitenyi kuti ndiwane kurarama kucingaperi?”—Luka 8:41; 18:18; 24:20.

Jesu anomupingura eciti: “Unondidana ngenyi wauxoni? Apana wauxoni aciripi Mwari.” Kangaije jaha iri rinoshandisa gama ro kuti ‘waushoni’ inga zina ro kureremeja. Izvo zvainyanya kuithwa maningi ngo majirabhi. Pikija Jesu ari mujijisi wakanaka, iyena anojekesa kuti zina ro kureremeja ro kuti ‘waushoni’ ngo ra Mwari basi.

Jesu anomupekeja zano eciti: “Ukada kunghwina mu kupona, teverai Mipango.” Ngo kudaro Jaha iri rinobvunjisa kuti: “Ngo yapi?” Pakati po Gumi ro Mupango, Jesu anobhuya mupango mushanu jinoti: ucauraya, ucaita upombo, ucaba, ucaita ufakazi hwo kunyepa no wo kukuja vabari. Iyena anoengejera mupango umwenizve unosisira maningi unoti: “Disai mudoni wako inga ndiwe wambhwine.”—Mateu 19:17-19.

Jaha rinoti: “Bzese ibzi ndakabziita. Cinyi cimweni co ndinodikana kuita?” (Mateu 19:20) Kangaije rairangarira kuti riciri kudikana kuita basa rakanaka kana kuti ciro cinoshamaisa cingariita kuti ritendehwe kuwana upenyu hucikaperi. Ecivona kuti jaha riri kukumbira ngo mwoyo wese kamare, Jesu ‘anorida.’ (Marco 10:21) Asi jaha iri rainga rino ciphingo pamberi paro.

Irona raidisisa maningi zviro zvokunyama zvarainga nazvo. Ngo kudaro Jesu anoti: “Casara ciro cimwe: Endai, tengesai bzako bzese, bzipei vamasikini. Pondhopo unozova no upfumi mugore, sure kwabzo viai konditevera.” Jaha iri raidikana kukovanisa varombo mare yaro, varombo vo kuti avakwanisi kurihwirijira mare yaro, perepo rova mujiji  wa Jesu. Asi Jesu anozwira pena jahero parinomuka ropinda rakanyangajwa. Ngo kubatisisa maningi “upfumi huzinji,” zviro zvokunyama zvarainga nazvo, zvakaitisa kuti ritame kuvona upfumi hwokadi-kadi. (Marco 10:21, 22) Jesu anoti: “Kunonesa kuti vakhupuki vanghwine mu Umambo hwa Mwari.”—Luka 18:24.

Vajiji vanokahamara ngo masoko aya pomwe no masoko anotevera a Jesu okuti: “Bzakareruka kuti kamera inghwine ngo pa cibovo co njingano, kupinda mukhupuki kunghwina mu umambo hwa Mwari.” Izvo zvinoitisa kuti vajiji vabvunjise kuti: ‘Waro, ndiani anozoponeswa?’ Iyena anovasota ovabvunja kuti: “Bzicingakwanisiki ku mundhu, Mwari anobzikwanisa.”—Luka 18:25-27.

Pedhru anobhuya kuti iyena no vajiji vamweni vakakheta zviro zvakasiana no jaha mukhupuki riya, eciti: “Itisu takasiari bzese tomutevera, tinozowanenyi?” Jesu wobhuya muviyo wavanozova nawo ngo pamusoro po kunasa kukheta eciti: “Pakumusijira maponero mapsa, ngari yo Mwana wo mundhu yaanozogara pa cigaro cake co goja, imwimwi makanditeverari munozogaravo pa gumi ro bzigaro no bzigaro bziviri, kuti mutonge gumi ro majinja no majinja maviri o vaIsraeli.”—Mateu 19:27, 28.

Zviri pambhene kuti Jesu ari kunanga ngo pamusoro po kumbeji, pa kumusijihwa ko mugariro waingaya wakaita munda wo Edheni. Pedhru no vajiji vamweni vanozopfupwa ngo kuva vatongi vo Paradhiso pasi pano pamwepo na Jesu, uwu i mupfupo mukuru unopinda ciri cese catingaruza.

Asi, makomborero akona asipi o kumbeji basi. Vajiji vari kukomborehwa wari uno kamare, ngo kuti Jesu wakati: “Apana mundhu wakasia nyumba, mukaji nokuti hama, majibaba nokuti vana ngo njio yo umambo hwa Mwari, wozotama kuaxira bzizinji kamare mu nyika yo pasi, no kurarama kucingaperi mu mukuvo unozovia.”—Luka 18:29, 30.

Kuri kwese kwavanonga vari, vajiji va Jesu vano ushamwari hwakavanga maningi no vatendi-doni kupinda ushamwari hwavanaho no ukama hwavo hwo kunyama. Asi zvinosuruvarisa kuvona kuti jaha iri mukhupuki zve mutongi, riri kuda kuruza makomborero aya, pomwe no makomborero o upenyu ucikaperi mu Umambo hwa Mwari mugore.

Jesu anoengejera eciti: “Vatungamiri vazinji vanozoita vokupejisira, vokupejisira vanozoita vokutungamira.” (Mateu 19:30) Ari kuda kunangenyi?

Ari kunanga jaha riya, mukhupuki, zve mutongi ari umwe wo “vatungamiri,” ngo kuti iyena ndi umwe wo vatungamiriri vo ciJudha. Inga mundhu anozwira mupango wa Mwari, zvainga zvakamurerukira kuti ave mujiji. Asi ari kudira upfumi panyezuru po zvese mu upenyu hwake. Ngo divi rimweni, vandhu vakaderera vanozwisisa kuti zvinojijisa Jesu i zviro zvokadi zve igwanja ro ku upenyu. Ivona vari kuita “vokupejisira,” ngo manangire amweni, asi wari vova “vatungamiri,” ngo kuti vanovetero yo kuzogara pa dendemaro ro kudenga pamwepo na Jesu vecitonga Paradhiso pasi pano.