Paanoziva kuti vaFarisi no vandhu va Herodhi vaironga kumuuraya, Jesu no vajiji vake vanobudepo voenda ku Jombe ro Garireya. Mbungano yo mativi ese, akadari inga vo muGarireyemo, vo madhorobha ari ngo mumbhiripiri mo Jombe, o Tiro no Sidhoni, ngo divi ro ku Murambo wa Jordhani, vo ku Jerusarema no vo ku Idhumea ngo kanjikazi, vese vanoenda mbhera kondhono. Jesu anorapa vandhu vakawanda maningi. Ngo kudaro vano ndhendha yakashata vanoeja kukhwedera phedo naye kuti iyena avapsase. Asi avakwanisi kuvetera mbhera avapsase, ivona ndivona vanoita ngo kudadamira kuti vamupsase.—Marco 3:9, 10.

Apacaipfirikepi no mata ngo vandhu, zvo kuti Jesu wakabvunja vajiji vake kuti vamupsakire cingarava kuti ati khuu padoko pakati po vandhu vakamutendeneja. Ngo kudaro angavajijisa ari mungaravemo kana kwenda kumweni kobesera vandhu vamweni.

Mateu anonanga kuti mabasa a Jesu anokwanirisa “bzakanangwa ndi Isaia muporofeti.” (Mateu 12:17) Jesu anokwanirisa uporofita hwapi?

“Nga uu muranda wangu wo ndakasana. Mudiwa wangu. Wiya anopfaja mwiha wangu. Ndinozodira maari mujimu wangu. Yena anozotokotesa urungami ku vonyikanja. Aazovereketesani. Aazomimi. Izwi rake arizozwiki mu makwanja. Aazoguri njanga yakabwexuka. Aazojimi mwenje unopfukuta, mbhera ngo kuzisa urungami. Vandhu vanozogonda zina rake.”—Mateu 12:18-21; Isaia 42:1-4.

Pacina kukana-kana, Jesu i mushandiri anodiwa zve anodavihwa ndi Mwari. Jesu anodurujira zvinoreva urungami hwokadi-kadi, hucikaziviki ngo zvirovejeso zvo zviara zvo manyepo. Zvecivoneka kuti vaFarisi vanoshandisa Mutemo ja Mwari mu mavonero avo, avakwanisi kuita zvakarungama nee avaendi ku mundhu ari kuhwaja kuti vamubesere ngo Musabudu. Ecidurujira zvinoreva urungami hwa Mwari, pomwe no kuvonesa kuti mujimu wa Mwari uri panyezuru pake, Jesu anozoroja vandhu mu mutoro jo zvimutango-mutango zvicizivi kurungama. Ngo zvinoitisa kuti vatungamiriri vo zviara vade kumuuraya. Kusuruvarisa kwazvo vanemwi!

Waro zvinoda kurevenyi kuti “aazovereketesani. Aazomimi. Izwi rake arizozwiki mu makwanja”? Paanorapa vandhu, Jesu aatenderi kuti vaairaparo ‘vamutokotese ku vandhu’ nee madhimoni aacaidikana kumutokotesa. (Marco 3:12) Iyena aadi kuti ivona vafambe vecibhuya zvaanoita, zve aacaidepi kuti vandhu vandhandhanise masoko aciripi iwona ngo pamusoro pake.

 Jesu anopekeja masoko ake anonyaraja ku vandhu vakadari inga njanga yakabweshuka, zve yoda kuwa. Vakaita inga mwenje unopfukuta waaphedo no kujima. Jesu aapejesi kugura njanga yakabweshuka, nee aapejesi kujima mwenje unopfukuta woda kujima. Mukusiana, iyena anodakajisa vandhu vakapfava ngo rudo hwese kamare. Zvokadi kamare Jesu ndiyena vetero yo majinja ese!