Jesu paanojijisa vandhu mu ndharaundha yo Sezareya yo Firipi, inowanika pa mumango wo 25 o makirometro kubva pa Dundhu ro Hermoni, iyena anonanga masoko acikavetehwi ngo vapostori vake, okuti: “Ndinomubvunja bzokadi kuti vamweni vari pano wari, avazofi vacito vavona Mwana wo Mundhu kuvia no Umambo hwake.”—Mateu 16:28.

Kangaije vajiji vanopsaka kuziva kuti Jesu ari kunangenyi. No zvoda kuita sumana, Jesu anotora vapostori vatatu—Pedhru, Jakobo na Johani—woenda navo pa dundhu rakakhwiririsa. Zvingaita kuti zvinova cousiku, ngokuti vapostori vatatu ava vano hope. Jesu paanoita mukumbiro, anopinduka pamberi pavo. Vapostori vanovona mumeso mwake mucin’ganikira inga zuva zve zvokusimira zvake zvinobwaka inga rujhu, yakacenesesa.

Zve kunovoneka vandhu, vanodanijwa ngo Bhaibheri kuti ndi “Mosi na Elia.” Ivona vanotanga kubhuya na Jesu ngo pamusoro po kubuda “kwaizoitika mu Jerusalema.” (Luka 9:30, 31) Kubuda kwa Jesu zvinoreva kufa kwake no kumuswa, kwaabvaya kunanga pa mukuvo waperari. (Mateu 16:21) Mabhuyo aya anokhombija kuti mukusiyana no zvakanangaya Pedhru, rufu hwa Jesu ahudikani kuphingwa.

Wari vapostori vatatu ava no vamuka, vanosota no kupurukira vecikahamara. Ici wari i civoniso, asi Pedhru anovona inga zviri kutoitikadi kamare, wototanga kujidiravo mu ciitiko ici, ngo kunanga kudari: “Rabi mbzauxoni itisu kugara pano. Ngatiite matumba matatu: rimwe renyu, rimwe ra Mosi, rimwenibze ra Elia.” (Marco 9:5) Pedhru anoda kuita matumba kuitira kuti civoniso ici cienderere mberi here?

Pedhru paanonga ecivereketa, vanofukijwa ngo gwiti rinobwaka zve kunozika izwi recibva mu gwiti, riciti: “Nga uu mwana wangu wokudikana, wondakadira rudakaro hwangu hwese. Mupurukirenyi.” Povanozwa izwi ra Mwari, vapostori vanowa ngo hope javo ngo kuthya, asi Jesu anovati: “Mukanyi, mucathya.” (Mateu 17:5-7) Vapostori povanomuka, apana wovanovona kuciripi Jesu, ngokuti civoniso capera. Povanobzuka pa dundhu co mangwanafumi, Jesu anovabvunja kudari: “Mucasumurira mumdhu bzo mavonaro, mbhera ngo kumuka ko Mwana wo Mundhu ku vakafa.”—Mateu 17:9.

Kubuda ka Eria mu civoniso ici kunomusa mubvunjo. Vapostori vanobvunjisa kudari: “Vatari vanonangirenyi kuti anozotungamira kuvia ndi Elia?” Jesu anodavira kuti: “Elia wakavia, kaveta avazivi kumuziva.” (Mateu 17:10-12) Jesu ari kunangira Johani Mubhabhatiji, wakaitaya basa rakaezana no ra Eria. Eria wakanasiririra gwanja Erisha, zve Johani wakanasiririravo gwanja Kristu.

Jesu no vapostori vanovangiswa maningi ngo civoniso ici. Icona cinovonesa goja rinozova na Kristu mu Umambo. Ngokuti vajiji vakavona ‘Mwana wo Mundhu ecivia no Umambo hwake,’ inga zvakagondeswa ndi Jesu. (Mateu 16:28) Povanonga pa dundhu, ‘vakavona ngo majiso avo ukuru hwake.’ Asi vaFarisi vaida citatijo cinokhombija kuti Jesu anozova Mambo wakagajwa ndi Mwari, asi aazivi kuvapa na cimwe haco. Asi vajiji vophedo va Jesu ngo vakatendehwa kuti vavone kupinduka kwa Jesu, kunovonesa ucokwadi hwo uphorofita ngo pamusoro po Umambo. Ngokudaro, Pedhru wakazotara kudari: “Na itusu tinotendesesa mazwi o vaporofeti.”—2 Pedru 1:16-19.