Naapeja njiku mbiri ari mu Samaria, Jesu anoenda ku ndharaundha yaakabarihwa. Iyena anoita fafanya yakakura maningi yo kucumaira mu Judheya, asi aaripi kuhwirira ku Garireya kozorora. Kusiapo izvo, anotanga mushando wakakurisisa maningi mu nyika yaakakurira. Kangaije aaripi kuvetera kuti anoashihwa ushoni, ngokuti wainga wakananga kuti “muporofeti aareremejwi mu nyika yake.” (Johani 4:44) Kusiyapo kugara nae, vajiji vake vanoenda kanyi, mu ukama hwavo zve vanohwirira mu mabasa o vaiita.

Jesu anotanga kucumaira masoko api? Anocumaira kuti: “Umambo hwa Mwari hwaa phedo. Tenderukanyi, mutende Vangeri.” (Marco 1:15) Waro vandhu vanomuashirisa kudini? VaGarireya vazinji vanomuashira ushoni zve vanomukuja. Asi avazviiti ngondava yo masoko basi. Vanozviita ngokuti vamweni vokubva Garireya vaingavo ku Phasika mu Jerusarema pa mweji jakhirira zve vakavona zvitatijo zvinoshamaisa zvakaitwa ndi Jesu.—Johani 2:23.

Jesu anotangira kwapi mushando wake mukuru mu Garireya? Zvingaita kuti i mu Kanaa, maakacinjiraya kumwa kuita vhinyu pa mabuso o mucadho. Naari kondhoyo hwendo hwocipiri uhu, Jesu anozwa kuti umwe mujaha ari kuhwaja maningi zve voda kufa. Iyena i mwana wo mukuru-kuru wo muutongi hwa mambo Herodhi Atipa, vanozoitisaya kuti Johani Mubhabhatiji aguhwe musoro. Mukuru-kuru anozwa kuti Jesu waviya Judheya mu Kanaa. Anoita hwendo kubva Kafarnaume kwaakabarihwa mbhera Kanaa kopsaka Jesu. Naakasuruvara, anodeketerera Jesu aciti: “Tenji derukanyi kotiri, mwana wangu acito akafa.”—Johani 4:49.

Jesu anodavira mwanarume uu ngo maitiro anomushamaisa, okuti: “Endai, mwana wako anorarama.” (Johani 4:50) Mushandi wa Herodhi anotenda zvanangwaro ndi Jesu wohwirira kumuzi kwake. Naari mu gwanja anowanana no varanda vake vano cidaka-daka co kumubvunja masoko akanaka okuti mwakake ari kuponadi! Acipsaka kuzwisisa zvakaitika, anobvunjisa kuti: ‘Waita nane rini?’

Ivona vanodavira kudari: “Zuro: Mu nguva yocinomwe muviri wakatondhora [kana wakaita nane].”—Johani 4:52.

Mukuru-kuru uu anozwisisa kuti zvaitika pa nguva yakanangaya Jesu kamare kuti “mwana wako anorarama.” Pasure pazvo, mwanarume wokukhupuka uu, mbhuri yake no varanda vake, vese vanova vajiji va Jesu.

Ngokudaro, hwaa uviri Jesu aciita mushamaiso mu Kanaa, wakacinja kumwa kuti iite vhinyu zve anorapa mujaha pa mumango wo 26 o makirometro. Zvakajeka kuti Jesu aazivi kuita mushamaiso iji basi. Asi mushamaiso wocipiri uu unosisira maningi ngokuti unokhombija mukuvo wo kuviya kwake mu Garireya. Zvajeka kamare kuti iyena i muphorofita anotendehwa ndi Mwari. Waro muphorofita uu ‘anoreremejeswa kudini mu nyika yake’?

Izvo zvinozojeka Jesu paanozoenda kanyi kwake, Nazareta. Zvicinyi zvinozoitikeyo?