Pikija kuti Jesu ari kushohwa no kuitihwa zvakashata, kuvangisira ka Pirato kuti Jesu asununguhwe akucinji mwoyo yo vapiri vakuru no vadoni vavo. Ivona vanoda kuti Jesu aurawe, basi. Vanoenderera mberi vacimima veciti: “Ngaakohomehwe!” Pirato anodavira kudari: “Mutorenyi imwimwi, mumukohomere. Inini andiwani ndava iriyese kwaari.”—Johani 19:6.

VaJudha avakhohwesi Pirato kuti Jesu anodikana kufa ngokuti washaishira utongi. Waro tingati kudini ngo pamusoro po kushaishira zviara? Ivona vanokasika komupumbha kuti wakatuka paaitongwa mu Sinedriyo. Ivona vanoti: “Itusu tino Mupango; kudari ngo Mupango wedu, yena anodikana kufa, ngokuti wakajiita Mwana wa Mwari.” (Johani 19:7) Kuna Pirato, ndava yo vanomupumbhari i imbza.

Iyena anohwirira mu nyumba yake yo umambo zve wopsaka njira yo kusujunura mundhu uu wokuti wacijikira maningi kuitihwa zvakashata, zve mukaji wa Pirato wakarota ngo pamusoro pake. (Mateu 27:19) Waro tingati kudini ngo kupumbha kupsa kwamusari vaJudha, kokuti musungwi uu anojiti ndiri “Mwana wa Mwari”? Pirato anoziva kuti Jesu anobva Garireya. (Luka 23:5-7) Pikija zvakadaro, anobvunjisa Jesu kuti: “Unobva kwapi?” (Johani 19:9) Kunanga kuti Pirato ari kukana-kana kuti dangani Jesu waipona kareko zve anobva kumatenga ngo maitiro ariese here?

Pirato wainga wakazwa ndi Jesu kamare kuti iyena ndi mambo asi Umambo hwake ahuiti divi ro nyika ino. Zvecivoneka kuti apana dikano yo kuengejera zvaakanangaya, Jesu anogara akanyarara. Izvo zvinohwaja maningi Pirato no kujikuja kwake. Naakanyangajwa, anobvunjisa Jesu kudari: “Auzivi kudavira ciro? Auzivi kuti ndino simba ro kukusunungura no kukohomera”?—Johani 19:10.

Jesu anonanga basi kuti: “Aucaizovepi no simba kondiri noucakaripuwa kubva nyezuru. Ngokudaro uwo wakandipa mu nyara jako ngaano ndava huru kupinda yako.” (Johani 19:11) Zvingaita kuti Jesu aaripi kunangira mundhu umwe basi. Asi ari kunanga kuti Kaifasi, vadoni vake na Judha Iskariote vano ndava yakakura kupinda ina Pirato.

Ecikahamara ngo kugajana ka Jesu no masoko ake zve ecithya maningi kuti zvingaita kuti Jesu wakabva kumatenga, Pirato anopsakazve kumusujunura. Asi, vaJudha vanonanga ciro cimweni, kangaije caitoita kuti Pirato akayakaye. Ivona vanomuthyisijira vaciti: “Ukamuregera auripi xamwari ya Sézare: Mundhu wese anojiita mambo, anomukira Sézare!”—Johani 19:12.

Pirato anobudisazve Jesu kunja zve wogara pa cigaro co kutongera ndava, wobvunja vandhu kudari: “Nga uu mambo wenyu!” Asi, vaJudha avacinji mwoyo yavo. Ivona vanomima veciti: “Mubvisei! Mubvisei! Mukohomerei!” Pirato anovadeketerera kuti: “Ndikohomere mambo wenyu, here?” VaJudha vaizonda umambo hwo Roma kubvira kare. Pikija zvakadaro, vapiri vakuru avanyarari kunanga kuti: “Atina mambo umweni, aciripi Sézare.”—Johani 19:14, 15.

Ngo kuthya kwake kunanga zvinohwisana no zvinoda vaJudha, Pirato anopejisira ngo kuvapekeja Jesu kuti vamuuraye. Masoca anomubvurira nguvo yake yakapsukirikira yaaisimira, vomusimijazve nguvo yake yokunja. Jesu paanopindiswa, anovangijihwa kuthwara danda rake ro kutambujikira.

Koda kuita masikati o Mucishanu, dhiya 14 ya Nisani. Jesu aazivi kuvata kubvira Mucina comangwanani zve ecihwajihwa maningi ngo zvakashata zvaaindoitihwa. Jesu paanovangisira kuti acijikire kurema ko zimiti riya, simba rake rinopera. Ngokudaro, masoca anovangijira mundhu anokhirira ngo pondhopo, anozwi Simoni anobva Sirene, mu Afrika, kuti athware mbhera kundau inozokohomerehwa Jesu. Vandhu vakawanda vanotevera  zve vamweni vanojitaka paditi, vecicumba ngo zviri kuitikari.

Jesu anobvunja vanakaji vari kurira kudari: “Vanakaji vo Jerusalema! Mucarira ngo ndava yangu, riranyi ngo ndava yenyu no yo vana venyu. Anozoguma mazuva [o] bzinozonangwa kuti: ‘Vanogarisika bziumba no mimba icikabari no mazamu acito akamwisa.’ Pondhopo vanozoamba kubvunja matundhu kuti: ‘Wiranyi panyezuru pedu,’ no ku bzimatundhu kuti: ‘Tifukijirenyi.’ Kudari vakaita ibzo no huni mbixi, bzinozoitika kudini no huni yakaoma?”—Luka 23:28-31.

Jesu ari kunangira jinja ro vaJudha. Irona rakaita inga miti uri kuoma asi ucakapfara, ngokuti Jesu aciripo zve vaJudha vamweni vari kumutenda. Vandhu ava povanozobviswa mu jinja iri, kucazosara basi jinja rakaoma kumujimu, inga miti wakaoma. Panozova no kucumba kukuru masoca o Roma paanozoshandiswa ndi Mwari kuti aparaje jinja iri.