Vatungamiriri vo zviara vari kuzondaya Jesu, vanokonehwa kuita kuti vandhu vatame kumureremeja, kana kumubata ngo masoko ake kamare kuti vamuendese ku vaRoma. (Luka 20:20) I dhiya 11 yo mweji wa Nisani, Jesu aciri muthemberi. Wari ndiyena anovatangira, ecivabvunja kuti iyena ndiani kamare. Anovabvunjisa kuti: “Munorangarira cinyi ngo ndava ya Mesia? Yena, mwana waani?” (Mateu 22:42) Vese vanoziva kuti Mesia anozova mubarihwana wa Dhavhidhi zve ndizvona zvavanodavira kamare.—Mateu 9:27; 12:23; Johani 7:42.

Jesu anobvunjisa kuti: “Bzinoitisa kudini kuti Davidi, ngokufemehwa, amudane Tenji, pakunanga kuti: ‘[Jehovha] wakabvunja Tenji wangu: “Garai pa mukono wangu wo muho, mbhera ndidire vakorore vako pasi po soka jako”’? Davidi wakamudana Tenji, angaitisa kudini mwana wake?”—Mateu 22:43-45.

VaFarisi avanangi ciro ngokuti vari kuvetera kuti umwe wo mubarihwana wa Dhavhidhi anodika kuviya kuti azovasujunura kubva mu utongi hwo ciRoma. Asi paanonokora masoko a Nduyo 110:1, 2, Jesu ari kuvonesa kuti Mesia i mundhu anosisira kupinda utongi hwo mundhu. Iyena ndi Tenji wa Dhavhidhi, pasure po kugara ku mukono muho wa Mwari, iyena anozotonga. Mupinguro wa Jesu unofunga muromo jo vavengi vake.

Vajiji no vandhu vamweni vakawanda vari kuzvizwa. Wari Jesu anobhuya navo ecivangwaja ngo pamusoro po vatari no vaFarisi. Vanarume ava “vakagara pa cigaro ca Mosi,” kuti vajijise Mutemo wa Mwari. Jesu anojijisa vapurutani vake eciti: “Itanyi bzese bzo vanomubvunja, kaveta mucadoteveja maitiro avo; ngokuti vanonanga vacingaiti.”—Mateu 23:2, 3.

Ngo kudaro Jesu anoita muezaniso wo ujiitisi hwavo eciti: ‘Ivona vanoengejera zvimabhokiso zvino masoko avanoshandisa inga jiviriro.’ VaJudha vamweni vaisungira pa huma zvibhokiso zvakatahwa mutemo. VaFarisi vaishandisa zvimabhokiso zvakakura kuti zvinase kuvoneka kuti vanobatisisa maningi Mutemo. Kunja kwa izvi, ivona ‘vaiengejera mashanguyo o nguvo javo.’ VaIziraeri vaidikana kuita mashanguyo pa nguvo javo, asi vaFarisi vaiita mashanguyo akareba maningi. (Bzviverengo 15:38-40) Ivona vaiita zvese izvi kuti vanase kuvoneka ngo vandhu.—Mateu 23:5.

Pikija vajiji va Jesu vangatotohwavo ngomujimu wo kuda kuva no nduma. Ngo kudaro anovabvunja kuti: ‘Mucadavira kudanwa Rabi, ngokuti mujijisi wenyu ndi umwe ega: Imwimwi mwese muri hama no hama. Mucadana ariwese pasi pano baba wenyu, ngokuti Baba wenyu ndi umwe ega: Vomugore. Mucadabze kudanwa [“mutungamiriri,” Shanduro yeNyika Itsva], ngokuti Mutungamiriri wenyu ndi umwe ega: Kristu.’ Waro vajiji vanodikana kujivona kudini, zve vanodikana kuitenyi? Jesu anovabvunja kuti: “Mukuru pakati penyu anozova mubatiri wenyu. Wiya anojikuja anozododokeswa, wiya anojidodokesa anozokujwa.”—Mateu 23:8-12.

Tevere Jesu anonanga matambujiko anozoviira vatari no vajiitisi eciti: “Nyatwa komuri vatari no vaFarisi vajiitisi! Munofungira vandhu Umambo hwo mugore. Imwimwi amunghwini, morambisa kunghwina vanoda kunghwinavo.”—Mateu 23:13.

Jesu anoshora vaFarisi ngokuti avareremeji zviro zvo kumujimu, izvo zvinovonesa kuti vanomavonero akapeyama. Inga muezaniso, ivona vanoti: “Kudari mundhu akapika mu zina ro Nyumba ya Mwari, aavangirijwi; kaveta akapika ngo ndava yo ndarama yo Nyumba ya Mwari, anovangirijwa ngo mbhiko yake.” Izvi zvinovonesa kuti ivona vakazara ngo upofu hwo kumujimu, ngokuti kwavari ndarama yo nyumba ndiyona inosisira maningi kupinda mavonekere o kumujimu ndau yo kunamatira  ya Jehovha. Zve ivona vanokanganwa “bziro bzikuru-kuru bzo Mutemo: urungami, unyaxa no ugondeki.”—Mateu 23:16, 23; Luka 11:42.

Jesu anodaninja vaFarisi ava kuti i vaperekeji vari ‘mapofu! Vanobvisa mu mukheyo mutunga, vecimija kamera.’ (Mateu 23:24) Vanocujisa kana kuti vanosusundha vhinyu kuti vatame kumija mutunga ngokuti yakasvipiswa. Asi vanosiya shwiro jinosisira maningi jo mutemo, zve izvi zvinotojaniswa no kumija kamera, yakapsipiswavo, zve yakatokurisisa.—VaLevi 11:4, 21-24.