1, 2. (a) Munonasa kuziva kamare mundhu ano nduma, ngo kuti munoziva zina rake basi here? Durujiranyi. (b) Vandhu vanoti kudini ngo pamusoro pa Jesu?

MUNYIKAMUNO muno vandhu vakawanda maningi vano nduma. Kangaije munotoziva mazina o vandhu vanganani vano nduma. Asi kuziva zina basi, azvirevi kuti munonasa kumuziva kamare. Azvirevi kuti munoziva zvese ngo pamusoro po upenyu hwake kana kuziva kuti iyena i mundhu wo mushovonyi.

² Makambozwa ngo pamusoro pa Jesu, pikija akararama pasi pano kare sure ko makore 2.000 akapera. Asi vandhu vazinji avamuzivi kuti Jesu wainga akaita mundhu wo mushovonyi. Vamweni vanonanga kuti iyena wainga mundhu wakanaka, vamweni vanonanga kuti iyena wainga muporofeti, vamweni vanonanga kuti iyena ndi Mwari. Munovonavo kudini?—Vonanyi Masoko o Kupejisira civerengo 12.

3. Ngenyi zvinosisira maningi kuti muzive Jehovha Mwari na Jesu Kristu?

³ Zvinosisira maningi kuti muzive cokwadi ngo pamusoro pa Jesu. Ngenyi? Bhaibheri rinotibvunja kuti: “Uhomi hucingaperi nga uhu: kuti vamuzive imwimwi, Mwari umwe ega wokadi-kadi, na wiya wakatumwa ndimwi: Jesu Kristu.” (Johani 17:3) Hina, kudari mukaziva cokwadi ngo pamusoro pa Jehovha na Jesu, mungararama mbhera na rini mu paradhiso pasi pano. (Johani 14:6) Zvimwenizve, Kuziva Jesu kunozomubesera ngo kuti iyena i muezaniso wakanaka wo mararamire atingaita no matajire atingaita vamweni. (Johani  13:34, 35) Mu Cipauko 1, takajija cokwadi ngo pamusoro pa Mwari. Wari tiri kuda kujija kuti Bhaibheri rinojijisenyi ngo pamusoro pa Jesu.

4. Magama o kuti “Mesia” zve “Kristu” anorevenyi?

⁴ Mu makore mazinji Jesu acito abahwa, Jehovha wakagondesa mu Bhaibheri kuti waizotumira Mesia, kana kuti Kristu. Gama ro kuti “Mesia,” rinobva mu ndumi yo ciHebheru, zve gama ro kuti “Kristu,” rinobva mu ciGiriki. Mazina okuti Mesia kana kuti Kristu anoreva kuti Mwari anozosana Mesia wakagondeswa zve womupekeja cigaro cinosisira maningi. Mesia anozoita kuti zvigondiso zva Mwari zvese zvikwanirisike. Jesu angatomubeseravo wari uno. Asi Jesu acito abahwa, vandhu vazinji vaibvunjisa kuti: ‘Ndiyani anozova Mesia?’

5. Vajiji va Jesu vakamuziva kuti iyena wainga Mesia here?

⁵ Vajiji va Jesu avazivi kuphikiza kuti iyena wainga Mesia wakagondeswa. (Johani 1:41) Inga muezaniso, Simoni Pedru wakabvunja Jesu kuti: “Imwimwi muri Kristu.” (Mateu 16:16) Tingaitisa kudini kuti tive no cokwadi co kuti Jesu ndi Mesia?

6. Zvicinyi zvakaita Jehovha kuti abesere vandhu vakanaka kuti vazive Mesia?

⁶ Kare Jesu acito abahwa, vaporofeti va Mwari vakatara zvakawanda maningi zvaizobesera vandhu kuti vazive Mesia. Zvingabeseresa kudini? Ngatiti makumbihwa kuti muende kootora mundhu wamucikazivi ari pakazara vandhu. Kudari mukapuwa masoko aushoni ngo pamusoro po mundhuwo, maizokwanisa kumuwana. Mukufananavo, Jehovha wakashandisa vaporofeti vake kuti vatibvunje zvaizoita Mesia pomwe no  zvaizomuitikira. Kukwanirisika ko zviporofita izvi, kunobesera vandhu vakanaka kuti vazive kuti Jesu ndi Mesia.

7. Ngozvapi zviporofita zviviri zvinovonesa kuti Jesu ndi Mesia?

⁷ Ngativone zviporofita zviviri. Cokutanga, 700 o makore Jesu acito abahwa, Mika wakaporofita kuti Mesia waizobarihwa mu cidhorobha cidoko co Bheterehema. (MIKEYA 5:1) Ndikona kamare kwakabarihwa Jesu! (Mateu 2:1, 3-9) Cocipiri, Danieri wakaporofita kuti Mesia waizovia mu gore 29 N.V.Y. (Danieli 9:25) Izvi i zviporofita zviviri basi pakati po zviporofita zvizinji zvinovonesa kuti Jesu ndi Mesia wakagondeswa.—Vonanyi Masoko o Kupejisira civerengo 13.

8, 9. Zvicinyi zvakaitika pa kubhabhatijwa ka Jesu zvakakhombija kuti iyena ndi Mesia?

⁸ Jehovha wainga akazvijekesa kuti Jesu ndi Mesia. Mwari wakagondesa kuti waizopekeja citatijo kuna Johani mu Bhabhatiji kuti azive Mesia. Jesu paakaenda kuna Johani kuti abhabhatijwe mu Murambo wo Jorodhani mu gore ro 29 N.Y.Y., Johani wakavona citatijo. Bhaibheri rinotibvunja zvakaitika: “Naapera kubapatizwa, Jesu wakabuda mu kumwa. Gore rakazauka [kovari], wakavoneka Mwiha wa Mwari wecibzuka inga njiva, womata panyezuru pake. Kwakazika izwi ro mugore, reciti: ‘Nga uu mwana wangu anodikana, wiya anondidakajisa.’” (Mateu 3:16, 17) Johani paakavona no kuzwa zvitatijo izvi, iyena wakaziva kuti Jesu wainga Mesia. (Johani 1:32-34) Munjiku iyi, Jehovha paakadurura mujimu wake kuna Jesu, Jesu wakava Mesia. Iyena  wainga ari wiya wainga akasanwa ndi Mwari kuti ave Mutungamiriri zve Mambo.—Isaia 55:4.

⁹ Zviporofita zvo Bhaibheri, soko ra Jehovha pacake pomwe no zvitatijo zvakapekeja Jehovha pa kubhabhatijwa kwa Jesu zvakavonesa kuti Jesu ndi Mesia. Asi Jesu wakabva kwapi, zve iyena wainga ari ani? Imanyi tivone kuti Bhaibheri rinonangenyi.

10. Bhaibheri rinojijisenyi ngo pamusoro po upenyu hwa Jesu acito aviya pasi pano?

¹⁰ Bhaibheri rinojijisa kuti Jesu wakararama kudenga kare acito avia pasi pano. Mika wakananga kuti maambo a Mesia ngo “o kare.” (Mikeya 5:1) Jesu wakananga pacake kuti wakamborarama kudenga kare acito akabahwa inga mundhu. (Verenganyi Johani 3:13; 6:38, 62; 17:4, 5) Pikija acito aviya pasi pano, Jesu wainga no ushamwari hwaisisira na Jehovha.

11. Ngenyi Jesu anosisira maningi kuna Jehovha?

¹¹ Jesu anosisira maningi kuna Jehovha. Ngenyi? Ngokuti Mwari wakarura Jesu acito arura ciri cese haco kana ari wese. Ngokudaro Jesu anodaninjwa kuti “dangwe ro bzisikwa bzese.” * (VaKolosi 1:15) Jesu anosisira maningi kuna Jehovha ngokuti ndiyena ega basi wakasikwa ndi Jehovha kamare. Ngo zvinoitisa kuti iyena adaninjwe kuti “Mwana umwe ega.” (Johani 3:16) Jesu ndiyenavo ega wakashandiswa ndi Jehovha paainga ecisika zviro zvimweni zvese. (VaKolosi 1:16) Zve Jesu ndiyena ega basi anodaninjwa kuti “Soko,” ngokuti ndiyena wakashandiswa ndi Jehovha kuti apekeje masoko no ndhungamiro kuno ngirozi no vandhu.—Johani 1:14, Shanduro yeNyika Itsva.

12. Tinozvizivisa kudini kuti Jesu na Mwari asipi mundhu umwe?

¹² Vandhu vamweni vanodavira kuti Jesu na Jehovha i mundhu umwe. Asi andizvopi zvinojijisa Bhaibheri. Bhaibheri rinonanga kuti Jesu wakaruhwa, izvi zvinovonesa kuti Jesu ano maambo. Asi Jehovha, marure wo  zvese, aana maambo. (Nduyo 90:2) Inga Mwana wa Mwari, Jesu aazivi kumborangarira kuva inga Mwari. Bhaibheri rinojijisa zvakajeka kuti Baba mukuru kupinda Mwana. (Verenganyi Johani 14:28; 1 VaKorinto 11:3.) Jehovha basi ndiyena “Mwari wo Simba Rese.” (Genesi 17:1) Iyena mukuru maningi zve i mundhu ano simba kupinda zvese.—Vonanyi Masoko o Kupejisira civerengo 14.

13. Ngenyi Bhaibheri rinonanga kuti Jesu i “muezaniso wa Mwari acikavoneki”?

¹³ Jehovha no Mwana wake, Jesu, vakashanda pamwepo ko mabhirioni o makore pacito paruhwa denga no nyika. Ivona vaidisana maningi! (Johani 3:35; 14:31) Jesu waitevejera mugariro jakanaka ja baba wake zvokuti Bhaibheri rinomudaninja kuti “muezaniso wa Mwari acikavoneki.”—VaKolosi 1:15.

14. Zvakaitisa kudini kuti Mwana wa Jehovha anosisira abahwe inga mundhu?

¹⁴ Mwana wa Jehovha anosisira wainga ano cido co kusia denga wovia kuzobahwa pasi pano inga mundhu. Zvakaitikisa kudini? Jehovha wakaita cishamaiso othuthisa upenyu hwo Mwana wake womudira mu ndani mo mbhandwe inodaninja Maria. Mu njira iyi, Jesu aazivi kuva na baba vo mundhu. Ngo kudaro Maria wakabara mwana wakakwana, zve iyena wakamudanija Jesu.—Luka 1:30-35.

15. Tingaitisa kudini kuti tinase kuziva Jehovha?

¹⁵ Mungakwanisa kuverenga zvizinji ngo pamusoro pa Jesu, no upenyu hwake, no mugariro jake ngo kuverenga ma Bhuku o Bhaibheri a Mateu, Marco, Luka, zve Johani. Mabhuku aya anodaninjwa kuti ma Vhangeri. Zvecivoneka kuti Jesu wakatojana na Baba vake,  zvamunozoverenga zvinozomubesera kuguma pa kunasa kuziva Jehovha. Ngo zvakaitisa kuti Jesu anange kuti: “Ndiyani anondivona anovonavo Baba.”—Johani 14:9.

16. Jesu waijijisenyi? Ngokwapi kwaibva jijiso ja Jesu?

¹⁶ Uzinji hwo vandhu hwaidaninja Jesu kuti “Mujijisi.” (Johani 1:38; 13:13) Cimwe co zviro zvaisisira maningi zvaijijiswa ndi Jesu, kwainga kujijisa “Vangeri ro Umambo.” Icinyi Umambo uhu? Umambo hwa Mwari, utongi hwo kudenga unozotonga pasi pano pese zve unozoviisa makomborero acikaperi kuno vandhu vanozwira Mwari. (Mateu 4:23) Zvese zvaaijijisa Jesu zvaibva kuna Jehovha. Jesu wakati: “Majijisiro angu asipi angu ndega, asi ngha wiya wakandituma.” (Johani 7:16) Jesu waiziva kuti Jehovha waida kuti vandhu vazwe Masoko akanaka o Umambo unozotonga pasi pese.

17. Jesu waijijisa kwapi? Ngenyi waishanda ngo simba kuti ajijise vamweni?

¹⁷ Jesu waijijisa kwapi? Kuri kwese kwaaiwana vandhu. Iyena waijijisira mu ndau jakasiyana-siyana jakadari inga muzvitaka, muzvidhorobha, mumabazari, mu ndau jo kunamatira, no mamuzi mo vandhu. Iyena aacaivetera kuti vandhu vaviye kwaari. Kazinji ndiyena waienda kovari. (Marco 6:56; Luka 19:5, 6) Jesu waishanda ngo simba ecipeja nguva zinji ecijijisa vandhu. Ngenyi? Ngo kuti iyena waiziva kuti Mwari waida kuti iyena aite zvondhozvo zve Jesu waizwira Baba vake. (Johani 8:28, 29) Jesu waicumaera ngokuti waizwira usizi kuno vandhu. (Verenganyi Mateu 9:35, 36.) Iyena wakavona kuti vatungamiriri vo zviara avacaijijisepi cokwadi ngo pamusoro pa Mwari no Umambo hwake. Ngokudaro iyena waida kubesera uzinji hwo vandhu kuti vazwe masoko akanaka.

18. Mugariro japi ja Jesu jamunodakarira maningi?

 ¹⁸ Jesu wainga no rudo maningi no vandhu zve waivataja. Iyena wainga akanaka mwoyo zve akareruka kubhuya naye. Pikija vana vadoko vaida kotamba nae. (Marco 10:13-16) Jesu wainga akanaka. Iyena wainyenya uvori no kutama kurungama. (Mateu 21:12, 13) Iyena wakararama pa nguva yo kuti vanakaji avacaitendehwepi kuita zvizinji zve vainga vacikareremejwi. Asi nguva jese Jesu wainasa kutaja vanakaji zve ecivareremeja. (Johani 4:9, 27) Jesu waijidodokesa kamare. Inga muezaniso, pa usiku humweni iyena wakasuka soka jo vapostori vake, zvokuti kazinji zvinoanja kuithwa ngo murekhi.—Johani 13:2-5, 12-17.

19. Muezaniso japi jinokhombija kuti Jesu anoziva zvinodiwa ngo vandhu zve kuti anoda kuvabesa?

¹⁹ Jesu waiziva kuti ngozvapi zvinodiwa ngo vandhu, zve iyena waida kuvabesera. Izvi zvakavoneka maningi paakashandisa simba ra Mwari kuti arape vandhu ngo mushamaiso. (Mateu 14:14) Inga muezaniso, mwanarume wainga no mapere wakaenda kuna Jesu zve onanga kuti: “Kudari mecida, mungandirapa.” Jesu wakazwa kuhwajihwa ngo kutambujika ko mwanarume uwu. Iyena wakamuzwira pena zve waida kumubesera. Ngokudaro Jesu wakatambanuja mukono wake, zve omubvunja kuti: “Ndinoda, cenai.” Zve mwanarume waihwajaya wakarapika! (Marco 1:40-42) Mungakwanisa kurangarira kuti mwanarume uwu wakazwa kudini?

20, 21. Ngenyi Jesu muezaniso wakanaka wo kuzwira Mwari?

²⁰ Jesu muezaniso wakanaka wo kuzwira Mwari. Azvinenyi no kuti zvicinyi zvakaitika kana kuti zvakamuitira vavengi vake, iyena wainga akagondeka kuna  Baba vake. Inga muezaniso, Sathana paakaeja Jesu, Jesu aazivi kushaisha. (Mateu 4:1-11) Vamweni vo mbhuri ya Jesu avazivi kudavira kuti iyena wainga Mesia zve vainanga kuti: “Yena anopenga,” asi Jesu wakaramba eciita basa ra Mwari. (Marco 3:21) Vavengi vake pavaida kumuuraya, Jesu wairamba akagondeka kuna Mwari zve narini iyena aazivi kuda kuvakhuvaza.—1 Pedru 2:21-23.

²¹ Pikija Jesu akatambujwa ngo vavengi mbhera kufira munyathwa, iyena wakaramba akagondeka kuna Jehovha. (Verenganyi VaFilipi 2:8.) Rangariranyi zvaaidikana kucungirira pa njiku yo kupejisira yo rufu hwake. Iyena wakasungwa, wakapumbhwa ngo zvapupu zvo kunyepa, wakatongehwa nyathwa ngo vatongi vakashata, wakaizwa jee ngo mbungano yaiita joweyowe, zve masoca akamutambuja zve o mukohomera pa mu tanda wo kutambujikira. Paainga oda kufa iyena wakacema eciti: “Bzese bzapera!” (Johani 19:30) Mu njiku yo citatu pasure po kufa ka Jesu, Jehovha wakamumusa zve omupa muviri wo kumujimu. (1 Pedru 3:18) Pasure po mabviki manganani akatevera, Jesu wakahwirira kudenga, “wakagara pa mukono muho wa Mwari,” ecivetera kuti Mwari amuite Mambo.—Vaheberi 10:12, 13.

22. Mukana wapi watinawo nyamasi ngo kugondeka kwa Jesu kuna Baba vake?

²² Zvecivoneka kuti Jesu wakaramba akagondeka kuna Baba vake, itusuvo nyamasi tinomukana wo kurarama no kucingaperi mu paradhiso pasi pano, inga cidisiso ca Jehovha. Cipauko cinotevera, tinozobhuya ngo pamusoro po kuti rufu hwa Jesu hwakaitisa kudini kuti tikwanise kurarama nokucingaperi..