1. Ndiyani angatibvunja manamatire atingaita Mwari?

ZVIARA zvizinji zvinonanga kuti izvona zvinojijisa cokwadi ngo pamusoro pa Mwari. Asi izvi azviitiki ngo kuti zviara zvinojijisa zviro zvakasiyana maningi pa shwiro yo kuti ndiyani Mwari zve tingamunamatisa kudini. Tingazivisa kudini njira yakanaka yo kunamata Mwari? Ndi Jehovha basi angatibvunja manamatire atingamuita.

2. Mungajijisa kudini njira yakanaka yo kunamata Mwari?

² Jehovha wakatipekeja Bhaibheri kuti tijije njira yakanaka yo kumunamata. Waro jijanyi Bhaibheri, zve Jehovha anozomubesera kuti muwane besero rinobva kujijiso yake ngo kuti iyena anomutaja maningi.—Isaia 48:17.

3. Mwari anoda kuti tiitenyi?

³ Vandhu vamweni vanonanga kuti Mwari anotendera zviara zvese, asi andizvopi zvakajijisa Jesu. Iyena wakati: “Avanghwini mu Umambo hwo mugore vese vanoti: ‘Tenji, Tenji’; kaveta vaya vanoita kuda ka Baba wangu.” Ngo kudaro zvinosisira kuti tijije kuti ngozvapi zvinoda Mwari zve tozviita. Iyi ishwiro huru maningi ngo kuti Jesu wakaezanisira vandhu vacikazwiri Mwari inga vashaishi, “vaiti vo bzakaxata.”—Mateu 7:21-23.

4. Jesu wakanangenyi ngo pamusoro po kuita kuda ka Mwari?

⁴ Jesu wakatingwaja kuti kudari tecida kuita kuda ka Mwari, tinozohwisana no zvineso. Iyena wakati: “Nghwinanyi ngo pa musuvo wakamanika; ngokuti musuvo wakapambhama no gwanja rakaxama  bzinogumisa mu kupsejeka, vazinji vanopinda ndibzona. Musuvo wakamanana, no gwanja rakadokoka bzinogumisa mu kupona. Ngokudaro vaxoma vanopinda ndibzona.” (Mateu 7:13, 14) Gwanja rakadokoka, kana kuti njira yakanaka yo kunamata Mwari inotungamirira kuupenyu ucikaperi. Gwanja rakashama, kana kuti njira yakashata yo kunamata Mwari, inoendesa ku rufu. Asi Jehovha aadi kuti ari wese afe. Iyena anopekeja ari wese mukana wo kujija ngo pamusoro pake.—2 Pedru 3:9.

5. Mungavazivisa kudini vanonamata Mwari ngo njira yakanaka?

⁵ Jesu wakananga kuti itisu tingavavona vacikanamati Mwari ngo njira yakanaka. Tingazviita ngo kupopora zvavanotenda no zvavanoita. Iyena wakati: “Munozovaziva ngo micero yavo.” Wakaengejera eciti: “Muti wese wakanaka unobara micero yakanaka.” (Mateu 7:16, 17) Izvi azvirevi kuti vanonamata Mwari vakakwana. Asi vashandiri va Mwari vanovangisira kuti vaite zvakanaka. Tinozovona zvingatibesera kuziva vanonamata Mwari ngo njira yakanaka.

6, 7. Ngenyi kunamata kokadi-kadi kwakacijikira mu Bhaibheri? Muezaniso wa Jesu unotijijisenyi?

⁶ Kunamata kwedu kunodikana kucijikira mu Bhaibheri. Bhaibheri rinoti: “Matahwa ese anofemehwa ndi Mwari, anobesa kujijisa, kupangira, kufujura unyepi no kurebesa mu urungami; kuti mundhu wa Mwari aite munasi no kutojanira mabasa ese auxoni.” (2 Timoti 3:16, 17) Mupostori Pauro wakatarira maKristu kuti: “Makaaxira Izwi rake rakatokoteswa ndisu, bziciripi inga izwi ro vandhu, kaveta inga riri rona bzakadi: Izwi ra Mwari, rinobara mucero momuri,  vatendi.” (1 VaTesalònika 2:13) Vanamati vokadi-kadi vanocijikira mu Soko ra Mwari basi, Bhaibheri. Avacijikiri pa murangariro wo mundhu, zvirovejeso, kana ciri cese haco.

⁷ Zvese zvakajijisa Jesu zvaicijikira mu Soko ra Mwari. (Verenganyi Johani 17:17.) Nguva jese wainokora mavhesi. (Mateu 4:4, 7, 10) Mushandiri wokadi-kadi wa Mwari, anoteveja muezaniso wa Jesu zve ciri cese caanojijisa cinobva mu Bhaibheri.

8. Jesu wakatijijisenyi ngo pamusoro pa Jehovha?

⁸ Tinodikana kunamata Jehovha basi. Nduyo 83:19 inoti: “Ndimwi basi [Jehovha] Mwari, Mukuru-kuru panyezuru po nyika yese.” Jesu waida kuti vandhu vazive kuti ndiyani kamare Mwari wokadi-kadi, zve wakajijisa vandhu zina ra Mwari. (Verenganyi Johani 17:6.) Jesu wakati: “Unozoromberera [Jehovha] Mwari wako. Yena basi ngo wo unozobatira.” (Mateu 4:10) Waro, inga vashandiri va Mwari, tinotevera muezaniso wa Jesu. Tinonamata Jehovha basi, tinoshandisa zina rake, zve tinojijisa vamweni zina ra Mwari no zvaanozoita kwatiri.

9, 10. Tingakhombijisa kudini kudisana kwedu?

⁹ Tinodikana kunasa kuda vandhu kamare. Jesu wakajijisa vandhu kuti vadisane. (Verenganyi Johani 13:35.) Azvinenyi no kwatinobva, mugariro wedu, kana kuti takapfuma kana kuti haiwa. Kudisana kwedu kunotibatanija inga hama no hambzaji. (VaKolosi 3:14) Ngo kudaro atiendi kuhondo kouraya vandhu vamweni. Bhaibheri rinonanga kuti: “Ndipona pavanosiana vana va Mwari no vana va Sathana. Ndiani acikaiti bzakarurama aabvi kuna Mwari; ndibzonavo zvondhobzo bzaanoita wiya acikadisi hama yake.” Zve  irona rinoengejera reciti: “Tidisane ngocedu. Ticaita inga ndi Kaini, wainga wo muxati, wouraya hama yake.”—1 Johani 3:10-12; 4:20, 21.

¹⁰ Tinoshandisa nguva yedu, simba no zviro zvo kunyama kuti tibesere no kuvangisana. (Vaheberi 10:24, 25) “Ngatiitire uxoni vandhu vese.”—VaGalàsia 6:10.

11. Ngenyi tinodavira kuti Jesu anotiendesa ka Mwari?

¹¹ Tinodikana kuzwira Jesu ngo kuti ndiyena njira yo kwenda kuna Mwari. Bhaibheri rinoti: “Apacina umweni ano ruponeso; apacinabze pasi po denga zina rimweni rakapuwa vandhu ro tingaponeswa ndirona.” (Maitiro o Vapostori 4:12) Mu Cipauko 5 co bhuku iri, takajija kuti Jehovha wakagaja Jesu kuti apekeje upenyu hwake inga muripo ku vandhu vanozwira. (Mateu 20:28) Jehovha wakakheta Jesu kuti ave Mambo wo pasi pano. Ngo zvinoitisa kuti Bhaibheri ritibvunje kuti kudari tecida kurarama mbhera na rini tinodikana kuzwira Jesu.—Verenganyi Johani 3:36.

12. Ngenyi ticikanghwini mu zvomatongehwe o nyika?

¹² Atidikani kunghwina mu zvomatongehwe o nyika. Jesu aazivi kunghwina mu zvomatongehwe o nyika. Paainga mu ciejo, iyena wakabvunja Pilato mutongi wo ciRoma kuti: “Umambo hwangu asipi hwo pasi pano.” (Verenganyi Johani 18:36) Inga Jesu, takatendeseka ku Umambo hwo kudenga hwa Mwari, no muripo wake, pacinenyi no kwatinogara, atizombonghwini mu zvomatongehwe o nyika. Asi Bhaibheri rinotipangira kuti tizwire “vatongi vo nyika.” (VaRoma 13:1) Tinozwira mutemo jo nyika yatinogara. Asi pajinosiana no mutemo ja Mwari, tinotevejera vapostori, vakananga kuti: “Bzinodikana kutenda Mwari kupinda vandhu.”—Maitiro o Vapostori 5:29; Marco 12:17.

13. Zvicinyi zvatinocumaera ngo pamusoro po Umambo hwa Mwari?

 ¹³ Tinodavira kuti Umambo hwa Mwari basi hunokwanisa kupeja zvineso zvo nyika. Jesu wakananga kuti “vangeri iri ro Umambo” rinodikana kutokoteswa pasi pese. (Verenganyi Mateu 24:14.) Apana umambo hwo vandhu ungakwanisa kuita zvatingazoitihwa ngo Umambo hwa Mwari. (Nduyo 146:3) Jesu wakatijijisa kuti tikumbire kuviya ko Umambo hwa Mwari paakati: “Umambo hwenyu ngahuze kwedu, kuda kwenyu ngakuitwe pasi pano inga nyezuru.” (Mateu 6:10) Bhaibheri rinotibvunja kuti Umambo hwa Mwari unozokwiya-kwiya utongi hwese hwo vandhu zve “ihwona hunozogara mbhera narini.”—Danieli 2:44.

14. Ngovapi vamunovona kuti vanonamata Mwari mu njira yakanaka?

¹⁴ Pakupera kujija mafundo aya, jibvunjisenyi kudari: ‘Ngovapi vanojijisa zvinobva mu Bhaibheri? Ngovapi vanobvunja vamweni zina ra Mwari? Ngovapi vano khombijirana rudo ngocavo? Ngovapi vacikanghwini mu zvomatongehwe o nyika? Ngovapi vanocumaera kuti Umambo hwa Mwari basi ndihwona hunopeja zvineso zvedu?’ I Zvapupu zva Jehovha basi.—Isaia 43:10-12.

15. Kuti Mwari adavire kunamata kwedu tinodikana kuitenyi?

¹⁵ Azvikwani kutenda basi kuti Mwari ariyo. Nee madhimoni anotendavo kuti Mwari ariyo, asi aamuzwiri. (Jakobo 2:19) Kuti Mwari adavire kunamata kwedu, tinodikana kuita zvaanonanga kuciripi kutenda basi kuti iyena ariyo.

16. Ngenyi tinodikana kuramba kunamata ko manyepo?

 ¹⁶ Kuti Mwari adavire kunamata kwedu tinodikana kuramba manamatire o kunyepa. Muporofita Isaia wakatara kuti: “Mucadopsasa bziro bzakangora; bzisienyi, jicenesenyi.” (Isaia 52:11; 2 VaKorinto 6:17) Ngo zvinoitisa kuti tirambe ciri cese cakabatana no kunamata ko manyepo.

17, 18. ‘Bhabhironi Guru’ icinyi, zve ngenyi tinodikana kukasika kuriramba?

¹⁷ Icinyi ciara co manyepo? I ciara ciri cese cinotijijisa kuti tinamate Mwari munjira yakasiyana no Soko rake. Bhaibheri rinodanija zviara zvese zvo manyepo inga “Babilónia Guru.” (Apokalipsi 17:5) Ngenyi? Pasure po Ndambi ya Nowa, jijiso jo zviara zvizinji jakatangira ku dhorobha ro Bhabhironi. Jijiso jo manyepo iji, jakandhandhanika pasi pese. Inga muezaniso, vandhu vaigara ku Bhabhironi vainamata cikwata co majimwari. Nyamasivo, zviara zvizinji zvinojijisa kuti Mwari Utatu, asi Bhaibheri rinojijisa pambhene kuti kuna Mwari umwe basi wokadi-kadi, Jehovha, zve Jesu i Mwana wake. (Johani 17:3) Vandhu vaigara mu Bhabhironi vaidavira kuti divi rimweni ro mundhu rinosara recirarama pasure po kufa ko muviri zve kuti divi iri ringatotambujika mu gehena. Aya manyepo.—Vonanyi Masoko o Kupejisira zviverengo 14, 17, no 18.

¹⁸ Mwari wakananga kuti sambi-sambi zviara zvo manyepo zvinozoparajwa. (Apokalipsi 18:8) Munozwisisa kuti ngenyi munodikana kukasika kubuda mu ciara co manyepo here? Jehovha Mwari anoda kuti mubude nguva iciripo.—Apokalipsi 18:4.

19. Pamunosunga kushandira Jehovha, iyena angamubeseresa kudini?

 ¹⁹ Pamunosunga kuramba ciara co manyepo no kushandira Jehovha, shamwari jimweni jenyu jingatama kuzwisisa cisungo cenyu pikija kutomutambuja. Asi Jehovha aazombomutisiyi. Munozova umwe wo zviuru no zviuru zvo ukama hwo nyika yese yo vandhu vanodisana kamare, zve munozova no vetero yo kurarama mbhera narini mu nyika impsa ya Mwari. (Marco 10:28-30) Kangaije shamwari no vopaukama hwenyu vanonga vakamurambija kushandira Jehovha vangazosunga kujija Bhaibheri.

20. Ngenyi zvinosisira kunamata Mwari ngo njira yakanaka?

²⁰ Sambi-sambi kamare, Mwari anozoparaja ushati hwese zve Umambo hwake unozotonga pasi pano. (2 Pedru 3: 9, 13) Iyi inozova nguva inodakajisa! Vese vanozonamata Jehova ngo njira inodiwa ndi Jehovha kuti tiite. Waro zvinosisira maningi kuti muite ciri cese wari zve munamate Mwari ngo njira yakanaka.