1. Cicinyi camuri kurangarira pa kupera kunasa kujija bhuku iri?

MAKAJIJA zvokadi zinji jo Bhaibheri kubvira pamakatanga kujija bhuku iri, zvakadari inga zvigondiso zva Mwari zvo upenyu ucikaperi, mugariro wo vakafa, no vetero yo rumuko. (Mucumaeri 9:5; Luka 23:43; Johani 5:​28, 29; Apokalipsi 21:​3, 4) Kangaije matotanga kwenda ku musongano jo Zvapupu zva Jehovha mecidavira kuti ivona vanoita zvo kunamata kokadi-kadi. (Johani 13:35) Kangaije matotanga kuita ushamwari hwo phedo na Jehovha, zve matosunga kuti  mu mushandire. Waro munodikana ­kurangarira kuti: ‘Cicinyi candinodikana kuita kuti ndishandire Mwari?’

2. Ngenyi mwanarume umweni, muEtiopia, wainga woda kubha­bhatijwa?

² Izvi ndizvona zvairangarihwa ngo muEtiopia, mwanarume umweni, wakararama munguva ja Jesu. Nguva imweni Jesu naapera kumuswa, Filipi mujiji wa Jesu wakacumaera muEtiopia. Filipi wakamutatija kuti Jesu wainga Mesia. MuEtiopia wakadakajihwa ngo zvaakajijiswa zvo kuti ciriporipoco wakananga kuti: “Nga ii kumwa. Bzinyi bzingandirambisa kubapatizwa?”​—Maitiro o Vapostori 8:26-37.

3. (a) Jesu wakapangirenyi vateveri vake? (b) Mundhu anodikana kubhabhatijiswa kudini?

³ Bhaibheri rinojijisa pambhene kuti kudari mecida kushandira Jehovha, munodikana kubhabhatijwa. Jesu wakabvunja vateveri vake kuti: “Jijisanyi vandhu vese no kuvabapatiza.” (Mateu 28:19) Jesu wakagajavo muezaniso ngo kuvavo anobhabhatijwa. Iyena wakabijwa mukumwa muviri wese, kuciripi kuita ngo kurasihwa kumwa mu musoro basi. (Mateu 3:16) MuKristu paanobhabhatijwa nyamasi uno, anodikanavo kubijwa muviri wese kana kubobojwa ngo kumwa.

4. Rubhabhatijo hwenyu unokhombijenyi kuno vamweni?

⁴ Pamunobhabhatijwa, munokhombija vamweni kuti munoda kuva shamwari ya Mwari zve no kumushandira kamare. (Nduyo 40:8, 9) Asi mungarangarira kuti, ‘Ndinodikana kuitenyi kuti ndibhabhatijwe?’

5. (a) Ngozvapi zvamunodikana kuita mucito mukabhabhatijwa? (b) Ngenyi musongano jo ciKristu jinosisira maningi?

⁵ Mucito mukabhabhatijwa, munodikana kuguma  pa kuziva Jehovha na Jesu. Makatanga kuita izvi ngo kujija Bhaibheri. (Verenganyi Johani 17:3.) Asi izvi azvikwani. Bhaibheri rinonanga kuti imwimwi munodikana kuva no “uzivi” hwokadi hwo kuda ka Mwari. (VaKolosi 1:9) Musongano jo Zvapupu Zva Jehovha jinozomubesera kuti muve no ushamwari hwo phedo na Jehovha. Izvi ngozvinoitisa kuti imwi­mwi mupinde musongano iyi nguva jese.​—Vaheberi 10:24, 25.

6. Munodikana kuzivisa kudini Bhaibheri kuti mubhabhatijwe?

⁶ Zvokadi kamare, Jehovha aaveteri kuti muzive zvese zviri mu Bhaibheri perapo mozobhabhatijwa. Iyena aazivi kuvetera muEtiopia wiyana kuti azive zvese perapo obhabhatijwa. (Maitiro o Vapostori 8:​30, 31) Zve tinozoenderera mberi tecijija ngo pamusoro pa Mwari mbhera na rini. (Mucumaeri 3:​11) Asi kuti mubhabhatijwe, munodikana kuziva no kutendera jijiso huru jo Bhaibheri.​—Vaheberi 5:​12.

7. Jijo yenyu yo Bhaibheri yakamubeseresa kudini?

⁷ Bhaibheri rinoti: “Pacina rutendo, apana anodakarisa Mwari.” (Vaheberi 11:6) Asi munodikana kuva no rutendo mucito mukabhabhatijwa. Bhaibheri rinotibvunja kuti vandhu vamweni vo mudhorobha ro kuKorinto yo kare vakazwa zvakajijiswa ngo vateveri va Jesu, zve muviyo wakona, “vakatenda vobapatizwa.” (Maitiro o Vapostori 18:8, 9) Mukufananavo jijo yenyu yo Bhaibheri yakamubesera kuti muve no rutendo kuna Mwari no zvigondiso zvake zve no simba ro kujipira ka Jesu, kungakwanisa kutiponesa kubva ku cishaishi no rufu.​—Joxwa 23:14; Maitiro o Vapostori 4:​12; 2 Timoti 3:16, 17.

8. Ngozvapi zvinozomuita kuti muve no cido co kubvunja vamweni zvamakajija?

⁸ Pamunojija zvizinji ngo pamusoro po Bhaibheri mecivona mabesere arinoita upenyu hwenyu, rutendo hwenyu hunozoramba hwecivanga. Munozova no cido co kubvunja vamweni zvamakajija. (Jeremia 20:9; 2 VaKorinto 4:​13) Asi munodikana kubvunja ani?

9, 10. (a) Munodikana kutanga kubvunja ani zvamuri kujija? (b) Munodikana kuitenyi kudari mecida kocumaera no ungano?

⁹ Kangaije mungada kubvunja mbhuri yenyu, shamwari, vocigarisano kana mushandi doni ngo pamusoro po zvamuri kujija. Izvi zvakanaka, asi zviitenyi ngo kunaka mwoyo no rudo. Pakupejisira mungazokwanisa kutanga kucumaera no ungano. Pamunovona kuti mokwanisa kuzviita, bvunjanyi Capupu ciri kumujijisaro Bhaibheri kuti muri kuda kuitavo basa ro kucumaera no ungano. Mundhu uwu akavona kuti munokwanisa zve kudari mecirarama mukuzwirana no ndhungamiro jo Bhaibheri, imwimwi no mujijisi wenyu munozosongana no vakuru vaviri vo ungano.

¹⁰ Cicinyi cinozoitika pa musongano uwu? Vakuru ava vanozobhuya na imwimwi dengani munozwisisa no kudavira jijiso huru jo Bhaibheri, dengani munoita zvinonanga Bhaibheri mu upenyu hwenyu, dengani munoda kamare kuva umwe wo Capupu ca Jehovha. Rangariranyi kuti vakuru vanotaja vandhu vese pa ungano, zve na imwimwivo, waro mucathya kubhuya navo. (Maitiro o Vapostori 20:28; 1 Pedru 5:​2, 3) Pasure po musongano uwu, vakuru vanozomubvunja dengani mungaenda kocumaera no ungano kana kuti haiwa.

11. Ngenyi zvinosisira maningi kuita cinjo mucito macumaera no ungano?

 ¹¹ Vakuru kangaije vangamubvunja kuti munodikana kuita cinjo jakawanda mucito maenda koocumaera no ungano. Ngenyi zvinosisira maningi kuita cinjo iji? Ngo kuti pamunobhuya no vamweni ngo pamusoro pa Mwari, tinoimirira Jehovha, waro tinodikana kurarama munjira inomureremeja.​—1 VaKorinto 6:​9, 10; VaGalàsia 5:​19-​21.

12. Ngenyi vandhu vese vanodikana kukhauya?

¹² Kunocimwenizve camunodikana kuita mucito mabhabhatijwa. Mupostori Pedhru wakati: ‘Kaveta, Khauyanyi mutendeuke, kuti zvishaishi zvenyu zvipfujuhwe.’ (Maitiro o Vapostori 3:19, Shanduro yeNyika Itsva) Kukhauya kunorevenyi? Izvi zvinoreva kusuruvara kamare ngo pamusoro po cakashata cataita. Inga muezaniso, kudari muno mufambiro wo vatano yakashata mu upenyu, munodikana kukhauya. Pikija maiita zvakanaka mu upenyu hwenyu hwese munodikana kukhauya, ngo kuti tese tinoshaisha zve tinodikana kukumbira Mwari ruregerero.​—VaRoma 3:​23; 5:​12.

13. “Kutendeuka” kunorevenyi?

¹³ Zvinokwana kusuruvara ngo zvamaita here? Haiwa. Pedhru wakananga kuti “mutendeuke.” Izvi zvinoreva kuti munodikana kuramba mushovo wese wo mufambire wakashata zve motanga kuita zvakanaka. Inga muezaniso, rangariranyi kuti muri kwenda nyika imweni pa vhaza yo kutanga. Asi movona kuti marasika. Maizoitenyi? Pacina mubvunjo maizothuruja, moima, motendeuka, motevera gwanja rakanaka. Mukufananavo, inga zvamakajija Bhaibheri, kangaije mavona  kuti pano zviro zvamunodikana kucinja mu upenyu hwenyu. Ivanyi no cido co ‘kutendeuka’​—kana kuita cinjo iri yese inodikana kuithwa​—zve motanga kuita zvakanaka.

14. Munoitisa kudini kuti mujipire kuna Mwari?

¹⁴ Mudanyu umweni wamunodikana kuita mucito mabhabhatijwa, kujipira kuna Jehovha. Kujipira kuna Jehovha, kuita mukumbiro mecigodesa kunamata iyena basi no kuita kuti kuda kwake kuve ciro cinosisira maningi mu upenyu hwenyu.​—Deuteronòmio 6:​15.

15, 16. Zvicinyi zvinoitisa kuti mundhu ajipire kuna Mwari?

¹⁵ Kugondesa kushandira Jehovha basi kwakaita inga kugondesa kupeja upenyu hwese no mundhu wamunoda. Rangariranyi mwanarume no mwanakaji vari kunomorari. Mwanarume paanoguma pa kunasa kuziva mwanakaji waanoda, anoguma pa kumuda zve woda kumurovora. Pikija ciri cisungo cikuru, mwanarume anoramba anaco cido cokudavira mutoro uwu ngo kuti anomuda.

¹⁶ Pamunojija ngo pamusoro pa Jehovha, munoguma pa kumuda moda kuita zvamunokwanisa kuti mu mushandire. Izvi zvinozomuitisa kuti muve no cido co kuita mukumbiro wo kugondesa kuti mu mushandire. Bhaibheri rinonanga kuti ari wese anoda kutevera Jesu “ngaajirambe.” (Marco 8:34) Izvi zvinorevenyi? Zvinoreva kudira pa ndau yo kutanga kuzwira Jehovha mu upenyu hwenyu. Zvinoda Jehovha ngo zvinosisira maningi kupinda zvamunoda no cidisiso cenyu.​—Verenganyi 1 Pedru 4:2.

17. Ngenyi vandhu vamweni avajipiri kuna Jehovha?

¹⁷ Vandhu vamweni avajipiri kuna Jehovha, ngo kuthya kuzotama kukwanirisa cigondiso cavo co kumushandira. Ivona avadi kunyangajisa Jehovha, kangaije vangarangarira kuti kudari vacizivi kujipira kwaari, Jehovha anovasiya veciita madire avo.

18. Zvicinyi zvinozomubesera kunyisa kuthya kunyangaja Jehovha?

¹⁸ Rudo hwenyu kuna Jehovha hunozomubesera kuti munyise kuthya kumunyangaja. Ngo kumuda kwenyu, munozoita zvamunokwanisa kuti mukwanirise cigondiso cenyu. (Mucumaeri 5:4; VaKolosi 1:​10) Amuzorangariri kuti zvinonesa maningi kuita kuda ka Jehovha. Mupostori Johani wakatara kuti: “Kudisa Mwari ndikona kuteveja mupango yake. Mupango yake airemi.”​—1 Johani 5:3.

19. Ngenyi mucikadikani kuthya kujipira kuna Jehovha?

¹⁹ Amudikani kuva wakakwana kuti mujipire kuna Jehovha. Iyena aatikumbiri kuita zvaticikakwanisi. (Nduyo 103:14) Iyena anozomubesera kuita zvakanaka. (Isaia 41:10) Thembanyi Jehovha ngo mwoyo wenyu wese, zve “yena anozorungamisa njira [jenyu] jese.”​—Mazwi Akangwara 3:5, 6.

20. Mukapera kujipira kuna Mwari, ngo wapi mudanyu unotevera?

²⁰ Munorangarira kuti manasirira kuti mujipire kuna Jehovha here? Mukapera kujipira kuna Jehovha, munonga manasirira kuti muite mudanyu unotevera. Munodikana kubhabhatijwa.

21, 22. Mungaitisa kudini kuti ‘mutokotese’ pambhene rutendo hwenyu?

 ²¹ Zivisanyi murongi wo dare ro vakuru vo ungano ­yenyu kuti makajipira kuna Jehovha zve motoda kubhabhatijwa. Zve iyena anozopsaka vakuru vanganani kuti vahwirijire jijiso huru jo Bhaibheri na imwimwi. Kudari vakavona kuti mungaenda koobhabhatijwa, ivona vanozomubvunja kuti muende koobhabhatijwa pa gungano rinotevera ro Zvapupu zva Jehovha. Kugunganoyo, kunozova no hurukuro inodurujira zvinoreva rubhabhatijo. Muiti wo hurukuro  anozoita mubvunjo muviri jakareruka kuno vanozoda kubhabhatijwa. Ngo kudavira mubvunjo muviri iji, ­munonga ‘mecitokotesa’ pambhene kutenda kwenyu.​—VaRoma 10:10.

²² Perapo munozobhabhatijwa. Munozobijwa muviri wese mukumwa. Rubhabhatijo hunozokhombija vese kuti makajipira kuna Jehovha zve wari mava umwe wo Capupu ca Jehovha.

23. Zvinorevenyi kubhabhatijwa “mu zina ra Baba no ro Mwana no ro mujimu mucena”?

²³ Jesu wakananga kuti vajiji vake vaidikana kubhabhatijwa “mu zina ra Baba no ro Mwana no ro mujimu mucena.” (Verenganyi Mateu 28:19.) Izvi zvinorevenyi? Izvi zvinoreva kuti munoziva simba ra Jehovha no cigaro ca Jesu mu cidisiso ca Mwari no mashandisire anoita Mwari mujimu mucena kuti akwanirise kuda kwake.​—Nduyo 83:19; Mateu 28:18; VaGalàsia 5:​22, 23; 2 Pedru 1:21.

24, 25. (a) Rubhabhatijo hunoimirirenyi? (b) Tinozojijenyi mu cipauko cinotevera?

²⁴ Rubhabhatijo hunoimirira ciro cinosisira maningi. Pamunondondomejwa mukumwa, zvinoreva kuti muri kufa, kana kuti muri kusia mararamire enyu okare. Pamunobudiswa mu kumwa, muri kutanga upenyu hupsa hwo kuita kuda ka Mwari. Izvi zvinovonesa kuti munozoshandira Jehovha kubvira pondhopo. Mucakanganwa kuti amuzivi kujipira kuno vandhu, ku sangano riri rese, kana kujipira pa basa. Makapira upenyu hwenyu kuna Jehovha.

²⁵ Kujipira kwenyu kunozomubesera kuti muengejere ushamwari hwenyu hwo phedo na Mwari. (Nduyo 25:14) Izvi azvirevi kuti mundhu anotoponeswa ngo kuti wabhabhatijwa. Mupostori Pauro wakatara kuti: “Batiranyi [shandiranyi kuitira] ruponeso hwenyu, mecitetemera no kuthya.” (VaFilipi 2:​12) Rubhabhatijo maambo basi. Waro mungaitisa kudini kuti murambe muri phedo na Jehovha? Cipauko co kupejisira co bhuku iri cinozodavira mubvunjo uwu.