Bhaibheri rinosanangura zvikwata zviviri zvo vanarume vo ciKristu vanongwarira mutoro jo pa ungano—‘vavonereri no vabati vanoshandira’. (VaFilipi 1:1, Shanduro yeNyika Itsva) Kazinji, kuno civerengo cakakhwirira co hama iji jinoshanda muungano imwe na imwe. Ngo rapi basa rinoizwa ngo vabati vanoshandira kuti vatibesere?

Ivona vanobesera mukhumbi wo vakuru. Vabatiri vanoshandira vano murangariro wo kumujimu, vanothembeka zve vanoshanda ngo mwoyo wese, vamweni vakuru, vamweni majaha. Vanongwarira zvinodikanwa maningi asi kazinji zviro zvo caunga zvinoda kushandisa simba pa ungano. Izvi zvinoita kuti vakuru vabatikane mu kujijisa no kuhavisa.

Ivona vanobata basa ro pambhene. Vabatiri vamweni vano shandira inga varindiri kuti vaashire vese vanoviya kumusongano. Vamweni vanongwarira mucini jo kuengejera izwi, kukovaniswa ko mabhuku, kuvonerera zvipo zvo ungano, zve kugaja zvihwa zvo ungano ndau jo kucumaira. Vanobeserazve kunajirihwa ko Nyumba yo Umambo. Vakuru vangavakumbira kuti vabesere vasharuka. Azvinenyi kuti mutoro wapi wavanopuwa, kujipira kwavo mu kuita mabasa aya kunovaita kuti vafaneye kuashira nderemejo.—1 Timoti 3:13.

Ivona vanogaja muezaniso wakanaka inga vanarume vo ciKristu. Vabatiri vanoshandira vanokhetwa ngo ndava jo mugariro jo kumujimu. Pavanoita mativi omusongano ivona vanovangisa kutenda kwedu. Ngo kutungamirira mubasa ro kucumaera, vanokhwijirija kuvangirira kwedu. Ngondava yo mujimu wavo wo mushandira pamwe ivona vano musijira rubatano no mudakaro. (VaEfeso 4:16) Mukufamba ko nguva ivona vamgakwanirisa kuti vashande inga vakuru.

• Vabati vanoshandira, vandhu vomushovonyi?

• Vabati ava vanobeseresa kudini kuti ungano ishande zvaushoni?