“Imwimwi kamare . . . maidikana kuita vajijisi.” (Heb. 5:12) Amborangariranyi basi! Kukokwavo ndi Jehovha kamare Mujijisi mukuru kupinda vese, kuti tijijise vamweni ngo pamusoro pake! Mativi ari ese atingagajwa kuti tijijise cokwadi ngo pamusoro pa Jehovha, akadari inga pambhuri, paungano, pomwe no mubasa ro kucumaera, i basa rinodakajisa zve muthwaro mukuru. Waro tingaitisa kudini kuti tibudirire?

Mupinguro wakona unowanika mu masoko o mupostori Pauro aakatarira Timoti kuti aenderere mberi ecijijira kuverengera vandhu vese, ‘kupangira no kujijisa.’ Pauro wakaengejera eciti: “Ukaita kudaro unozopona iwewe, woponesavo vanokupurukira.” (1 Tim. 4:13, 16) Imwimwi muno masoko anoponesa kuti muabvunje vamweni. Ngo kudaro zvinosisira maningi kuti mupsake kuitisa nane maverengere enyu no majijisire enyu. Bhurushura iri, rakaitihwa kuti rimubesere pa kuita zvondhozvo. Ambovonanyi zvarinazvo basi.

Jehovha ndi “Mujijisi” mukuru. (Is. 30:20) Bhurushura iri parinonga recimubesera kuti muitise nane kuziva kwenyu inga muverengi no mujijisi, mucadokanganwa kuti masoko atinojijisa anobva kuna Jehovha no kutizve ndiyena anokwevera vandhu. (Jo. 6:44) Ngo kudaro rambanyi mecikumbira mujimu mucena. Nasanyi kushandisa Soko ra Mwari. Itanyi kuti vandhu vakuje Jehovha kuciripi imwimwi. Vangisiranyi kuti musime mu mwoyo yo vapurutani venyu, rudo hwakavanga kuna Jehovha.

Imwimwi makakokwa kuti mujijise masoko anosisira kupinda ese akambopuwa vandhu. Tinozviziva kuti mukambhera ngo kuthemba “simba ra Mwari,” munozobudirira.—1 Ped. 4:11.

Vajijisi doni venyu,

Mukhumbi Unotonga wo Zvapupu zva Jehovha