Tinoda mare kuti tikorondhe mbhuri jedu no zviro zvovanoda. (Mazwi Akangwara 30:8) Kunja kwa zvese, mare “cifindariro.” (Mucumaeri 7:12) Inga varovorani, zvingava zvinonesa kubhuya ngo pamusoro po mare, asi mucaregera kuti mare imuviisire zvineso mu mucadho wenyu. (VaEfeso 4:32) Varovorani vanodikana kugondana zve kushandira pamwepo pavanonga vecisunga kuti mare vanoda kuishandisisa kudini.

BHAIBHERI RINOTI KUDINI: “Ngowapi wenyu, akada kuvaka rusingo, acingaambi kugara pasi kuti averenge mare, dangani inokwanana kupeja rusingo?” (Luka 14:28) Zvinodikana maningi kuti muronge pondhopo njira jamunozoshandisa mare yenyu. (Amosi 3:3) Sunganyi kuti zvicinyi zvamunoda kutenga zve i mare yakadini yamunayo kuti mucitenge. (Mazwi Akangwara 31:16) Ngo kuti muno mare kuti mutenge ciro azvinangi kuti munodikana kucitenga. Ngwariranyi magava. Shandisanyi mare yamunayo basi.—Mazwi Akangwara 21:5; 22:7.

ZVAMUNGAITA:

• Kudari muno mare imweni pamutivi pakupera ko mweji, sunganyi pondhopo kuti munoda kuishandisisa kudini

• Mukavona kuti aicakwani, itanyi urongwa kamare kuitira kuti mupungure zvamunoda kutenga. Inga muezaniso, mungabika zvokuha zvenyu kuciripi kuenda kootenga zvakapera kubikwa

BHAIBHERI RINOTI KUDINI: “Tinongwara kuita bzauxoni, asi panyasi pa Mwari basi, kaveta no pa nyasivo po vandhu.” (2 VaKorinto 8:21) Ivanyi anogondeka no mudoni wenyu ngo pamusoro po yamunowana no yamunomosha.

Nguva jese bvunjisanyi mudoni wenyu apo munoita zvisungo zvikuru ngo pamusoro po mare. (Mazwi Akangwara 13:10) Kubhuisana ngo pamusoro po mare zvinozomubesera kuti murambe muno runyararo mu mucadho wenyu. Vonanyi mare yamunowana, kuciripi inga yenyu basi pa mundhu ega, asi inga mare yo mbhuri yese.—1 Timoti 5:8.

ZVAMUNGAITA:

• Tenderananyi kuti umwe na umwe wenyu ave no mutengo wake wo mare yaangamosha acizivi kuzivisa mudoni

• Mucavetera kuti pamuke cineso mucito mabhuisana ngo pamusoro po mare